Read Papiamento Ruth 4 Bible Online

Ruth 4 - Papiamento bible

Ruth 4

¹Mientrastantu Boaz a bai porta di siudat, kaminda nan sa reuní. E no a sinta ei ku el a mira e pariente, ku el a papia di dje, pasa. Boaz a bis'é: ‘Amigu, bin tende.’ E hòmber a kai sinta.

²Despues Boaz a yama dies ansiano di e siudat i a kombidá nan tambe bin sinta aserka. Ora nan a sinta

³el a bis'é: ‘Noemi, ku a bolbe di Moab, ke bende e pida tera ku tabata pertenesé na nos pariente Elimelèk.

⁴Mi a pensa ku ta bon pa pone bo na altura pa por si akaso ta interesá bo, bo kumpr'é awor, den presensia di esnan ku ta sintá aki i di e ansianonan di siudat. Si ta asina bo ke kumpli ku bo deber di pariente, hasié, pero si bo no ke, bisa mi pa mi sa. Pasobra aparte di bo, ta ami so ta bini na konsiderashon pa kumpra.’ E hòmber a bisa: ‘Mi ke kumpra.’

⁵Boaz a bisa: ‘Dia ku bo kumpra e tera di Noemi, di mes bo ta tuma Ruth, e biuda moabita, pa bo kasá. Asina e tera ta keda komo herensia riba nòmber di su defuntu.’

⁶E hòmber a rospondé: ‘Den e kaso ei mi no por kumpra, pasobra lo mi perhudiká mi mes herensia. Hasi ábo uso di mi derecho, pasobra ami no por.’

⁷Den e tempu aya tabata kustumber na Israel ku esun ku tabata bende òf interkambiá tabata kita un pia di sandalia duna e otro na momento di transakshon pa duna esaki balides legal. Asina nan tabata seya e kombenio.

⁸Ora e pariente a bisa Boaz pa Boaz kumpr'é, el a kita un pia di sandalia.

⁹E ora ei Boaz a bisa e ansianonan i tur esnan presente: ‘Boso ta testigu ku mi ta kumpra di Noemi tur loke tabata pertenesé tantu na Elimelèk komo na Kilion i Maglon.

¹⁰Asin'akí tambe mi ta tuma Ruth, e moabita, biuda di Maglon, pa mi kasá. Di e manera akí e tera ta keda herensia di e defuntu pa su nòmber sigui biba den su famia i siudat. Boso ta testigu.’

¹¹E ansianonan i tur ku tabata presente na e porta a kontestá: ‘Sí, nos ta testigu. SEÑOR hasi pa e muhé ku drenta den bo kas ta manera Raquel i Lea, ku a forma pueblo di Israel, i pa abo ta un hòmber poderoso den Efrata i bira famoso den Betlehèm.

¹²SEÑOR duna bo hopi yu ku e mucha muhé akí pa bo desendientenan ta mes hopi ku esnan di Pèrèsh, yu hòmber di Tamar i Huda.’

¹³Asin'ei Boaz a kasa ku Ruth. E tabatin relashon kuné i Dios a perkurá pa e sali na estado i haña un yu hòmber.

¹⁴E ora ei e muhénan a bisa Noemi: ‘Alabá sea SEÑOR ku awe a duna bo un ñetu pa sòru pa bo i mare e por bira famoso den Israel.

¹⁵Lo e duna bo ánimo pa biba atrobe i lo kuida bo den bo behes, pasobra e ta yu di bo suegra, ku tantu ta stima bo i ku ta bal pa bo mas ku shete yu.’

¹⁶Noemi a pone e yu riba su skochi i a tuma riba dje pa kri'é.

¹⁷I e muhénan, bisiña di Noemi, tabata bisa: ‘Noemi a haña un yu.’ Nan a yam'é Obed. E ta tata di Ishai, i Ishai ta tata di David.

¹⁸Di tata pa yu e liña di famia di Pèrèsh pa David ta: Pèrèsh, Hèsron, Ram, Aminadab, Nashon, Salmon, Boaz, Obed, Ishai, David.