Read Papiamento 1 Samuel 20 Bible Online

1 Samuel 20 - Papiamento bible

1 Samuel 20

¹David a hui for di kas di e profetanan na Rama. El a yega serka Yonatan i bisa: ‘Kiko mi a hasi, di kiko nan ta kulpa mi, ki krímen mi a kometé kontra bo tata, ku e ta buska mi pa mata?’

²Yonatan a kontestá: ‘Dios mester libra ku e ta buska bo pa mata! Mi tata no ta hasi apsolutamente nada sin bisa mi. Pakiko mi tata lo skonde e asuntu akí pa mi? Dios mester libra!’

³Pero David a insistí: ‘Bo tata sa mashá bon kuantu bo ta apresiá mi. P'esei e no ke pa bo sa su intenshon, pa bo no bira fèrdrit. Pero mi ta hura pa Dios i pa bo bida, ku mi bida ta kologá na un hilu.’

⁴Yonatan a puntra David: ‘Kiko bo ke mi hasi pa bo?’

⁵David a rospondé: ‘Bo sa ku mañan ta fiesta di Luna Nobo i ku mi mester keda kome serka rei. Si bo laga mi bai, mi ta skonde den kunuku te ótromañan anochi.

⁶Si bo tata ripará ku mi no t'ei, bo ta bis'é ku mi a pidi bo mashá pa bo laga mi bai mi stat, Betlehèm, ya ku aya henter mi famia ta selebrá e sakrifisio anual.

⁷Si e bisa: “Ta bon”, esei ke men ku mi ta for di peliger; pero si e bira di malu, bo por tin sigur ku el a disidí di hasi mi daño.

⁸Hasi mi e fabor ei, demostrá ku bo ta un bon amigu ya ku abo a sera un pakto ku mi, bo sirbidó, dilanti di SEÑOR. Si resultá ku mi ta kulpabel, mata mi bo mes, no entregá mi den man di bo tata.’

⁹Pero Yonatan a rospondé: ‘No papia asina! Si mi haña sa sigur ku mi tata a disidí di kita bo for di kaminda, konta ku mi ta bisa bo.’

¹⁰David a puntra Yonatan: ‘Ken ta bin bisa mi si bo tata rospondé bo malu?’

¹¹Yonatan a bis'é: ‘Ban den kunuku.’ Nan a kohe kaminda pa kunuku.

¹²Aya Yonatan a bisa David: ‘SEÑOR, Dios di Israel, ta mi testigu ku ótromañan na e mesun ora akí lo mi papia ku mi tata pa fula su boka. Si e tin bon intenshon ku bo, mi ta laga bo sa,

¹³pero si mi tata ke hasi bo daño, Dios kastigá mi mal kastigá, si mi no avisá bo i yuda bo hui. Mara Dios ta ku bo e ora ei, manera E tabata ku mi tata.

¹⁴Si mi keda na bida, trata mi bon manera Dios ta trata mi. Si mi muri,

¹⁵keda semper fiel na mi famia, asta ora SEÑOR bari kita tur bo enemigunan un pa un for di riba tera.’

¹⁶Despues di esei Yonatan a sera un pakto ku famia di David ku e palabranan akí: ‘SEÑOR pidi abo i bo enemigunan kuenta i rason!’

¹⁷Kaba Yonatan den su amor pa David a pone David hura un bia mas, pasobra e tabata stima David manera e tabata stima su mes.

¹⁸Despues Yonatan a bis'é: ‘Mañan ta fiesta di Luna Nobo, nan lo sinti bo falta ora bo lugá na mesa keda bashí.

¹⁹Warda te ótromañan, antó bo ta kana bai zùit, te na e lugá kaminda bo a skonde bia pasá, keda para na e piedra Hazael.

²⁰Lo mi hasi manera ta riba punta di un piedra mi ta mek i tira tres flecha banda di e piedra.

²¹Despues mi ta manda e mucha ku ta sirbi mi bai buska nan. Si mi grit'é: “Nan ta djis banda di bo, kohe nan,” bo por sali trankil, pasobra e ora ei nada lo no pasa bo. SEÑOR ta testigu entre abo ku mi.

²²Pero si mi bisa mi kriá: “E flechanan ta mas leu,” bai e ora ei, pasobra SEÑOR mes ke pa bo bai.

²³SEÑOR lo husga nos, si nos no atené nos na nos palabra.’ E ora ei David a bai skonde den kunuku.

²⁴Ora fiesta di Luna Nobo a kuminsá, rei a kai sinta na mesa.

²⁵E tabata sintá na su lugá di kustumber, kantu di muraya. Yonatan a sinta dilanti di Saul[24] i Abner banda di Saul, e lugá di David a keda bashí.

²⁶E dia ei Saul no a bisa nada. El a pensa: ‘Kualke kos lo a pas'é ku e no por a bini mesa manera lei ta manda; sigur ta impuru e ta.’

²⁷Su manisé, e di dos dia di e fiesta di Luna Nobo, lugá di David a bolbe keda bashí. E ora ei Saul a puntra su yu Yonatan: ‘Pakiko e yu di Ishai no a bini mesa ni ayera ni awe?’

²⁸Yonatan a kontestá: ‘David a pidi mi mashá pa mi lag'é bai Betlehèm.

²⁹El a bisa mi: “Laga mi bai, por fabor, ta asina ku mi famia ta selebrá un sakrifisio den siudat i mi ruman hòmber a manda bisa mi: No keda sin bini. Sea asina bon di duna mi liber pa mi bishitá mi rumannan.” P'esei e no a bin kome huntu ku su mahestat.’

³⁰E ora ei Saul a bira razu riba Yonatan i e di kuné: ‘Yugu di sarna rebelde! Mi tabata sa ku bo ta tuma parti pa e yu di Ishai ei, bo ta pone bo mes kara i barika di bo mama na bèrgwensa!

³¹Tanten ku e ta kana bibu riba e mundu akí, bo no ta sigur di bo bida ni di bo reino. Ban mira, manda busk'é i tres'é pa mi, pasobra e mester muri. No tin awa pa lab'é!’

³²Pero Yonatan a kontestá su tata: ‘Pakiko e mester muri? Kiko el a hasi?’

³³E ora ei Saul a tira su lansa riba Yonatan ku intenshon di mat'é. Yonatan a komprondé ku su tata a disidí firmemente di kita David for di kaminda.

³⁴Furioso el a lanta for di mesa. E di dos dia di e fiesta di Luna Nobo ei e no a kome nada. A duel e ku su tata a ofendé David asina.

³⁵Su manisé Yonatan a bai kunuku, manera el a palabrá ku David. Un mucha hòmber hóben a kompañ'é.

³⁶Yonatan a bis'é: ‘Bo mester kore bai kohe e flechanan ku mi tira.’ E hóben a kuminsá kore i Yonatan a tira un flecha pasa riba su kabes.

³⁷Ora e hóben a yega na e lugá kaminda e flecha a kai, Yonatan a grita su tras: ‘Hei, e flecha a kai mas leu!’

³⁸Un bia mas Yonatan a grita: ‘Hasi lihé, kore, no keda para!’ E mucha a kohe e flecha i bini bèk serka su shon.

³⁹E no tabata sa di nada; Yonatan ku David so tabata sa de ke se trata.

⁴⁰Despues Yonatan a duna e mucha su armanan i a bis'é: ‘Bai hiba nan stat pa mi!’

⁴¹Ora e mucha hòmber a bai, David a sali for di tras di e piedra[25] i a bùig tres bia te na suela. Nan a yora i brasa otro te ora David a logra dominá su mes.

⁴²Yonatan a bisa David: ‘Bai na pas, pasobra e huramentu ku nos a hasi tabata den nòmber di SEÑOR, i nos a pidi pa semper E ta meimei di nos i meimei di bo desendientenan i di mi.’ Despues di esei David a bai i Yonatan a bolbe siudat.