Read Pashto (Nangahari) — د پښتو مقدس کتاب پيدايښت 1 Bible Online

پيدايښت 1 - Pashto (Nangahari) — د پښتو مقدس کتاب bible

پيدايښت 1

¹په ابتدا کې خدای پاک آسمان او ځمکه پيدا کړل.

²ځمکه خالي او بې شکله وه او د ژورو دريابونو په سطح باندې تياره وه او د خدای پاک روح د اوبو په مخ باندې ګرځېده.

³خدای پاک وفرمايل: ”رڼايي دې شي“ او رڼايي شوه.

⁴خدای پاک رڼايي وليدله چې ښه ده او هغه رڼايي د تيارې څخه جدا کړه.

⁵خدای پاک رڼايي د ورځې په نوم ياده کړه او تياره يې د شپې په نوم ياده کړه، ماښام ؤ او سهار شو. دا اوله ورځ وه.

⁶خدای پاک وفرمايل: ”د اوبو ترمنځ دې فضا وي چې پاسنۍ اوبه د لاندې اوبو څخه جدا کړي.“

⁷خدای پاک فضا جوړه کړه او د فضا ﻻندې اوبه يې د پاسنيو اوبو څخه جدا کړې او هماغه شان وشول.

⁸خدای پاک فضا د آسمان په نوم ياده کړه، ماښام ؤ او سهار شو. دا دوهمه ورځ وه.

⁹خدای پاک وفرمايل: ”د آسمان ﻻندې اوبه دې په يو ځای کې راټولې شي او وچه دې ښکاره شي“ او هماغه شان وشول.

¹⁰خدای پاک وچه د ځمکې په نوم ياده کړه او اوبه يې د درياب په نوم يادې کړې او خدای پاک وليدل چې دا ښه دي.

¹¹خدای پاک وفرمايل: ”ځمکه دې نباتات راشنه کړي. هغه تخم لرونکي نباتات، مېوه لرونکې ونې چې خپل جنس او شکل ته ورته مېوه او تخم د ځمکې پرمخ ونيسي.“ او هماغه شان وشول.

¹²ځمکې هغه بوټي راشنه کړل چې د خپل جنس په شان تخم نيسي او هغه مېوه دارې ونې چې د هغو تخم د هغوى د جنس په شان وي او خدای پاک وليدل چې دا ښه دي.

¹³ماښام ؤ او سهار شو. دا دريمه ورځ وه.

¹⁴خدای پاک وفرمايل چې ”د آسمان په فضا کې دې رڼاګانې وي چې ورځ د شپې څخه جدا کړي او هغه دې د نښو په څېر د ورځو، فصلونو او کلونو دپاره وي،

¹⁵او د آسمان په فضا کې دې رڼاګانې وي چې ځمکه روښانه کړي“ او هماغه شان وشول.

¹⁶خدای پاک دوه لويې رڼاګانې جوړې کړې، لمر يې د ورځې د رڼا ورکولو دپاره او سپوږمۍ يې د شپې د رڼا ورکولو دپاره او ستوري يې هم جوړ کړل.

¹⁷خدای پاک هغوى د آسمان په فضا کې ځای په ځای کړل ترڅو ځمکې ته رڼايي ورکړي،

¹⁸چې ورځ او شپه ورباندې رڼا شي او رڼا د تيارې څخه جدا کړي او خدای پاک وليدل چې دا ښه دي.

¹⁹ماښام ؤ او سهار شو، دا څلورمه ورځ وه.

²⁰خدای پاک وفرمايل: ”اوبه دې د ژونديو موجوداتو څخه ډکې شي او مرغان دې د ځمکې د پاسه د آسمان په فضا کې والوزي.“

²¹نو خدای پاک لوی دريابي حيوانات او د مخلوقاتو ټول ډولونه چې په اوبو کې اوسيږي جوړ کړل. هغه همدارنګه ډول ډول مرغان د هغوى د جنس په شان جوړ کړل او خدای پاک وليدل چې دا ښه دي.

²²خدای پاک هغوى ته برکت ورکړ، ويې فرمايل: ”بارداره او زيات شئ او دريابونه ډک کړئ او مرغان دې د ځمکې په مخ زيات شي.“

²³ماښام ؤ او سهار شو. دا پنځمه ورځ وه.

²⁴خدای پاک وفرمايل: ”په ځمکه کې دې ژوندي حيوانات د دوى د جنس په څېر راپيدا شي، کورني حيوانات او وحشي حيوانات او خزندې دې د هغوى د جنس په شان راپيدا کړي“ او هماغه شان وشول.

²⁵نو خدای پاک وحشي حيوانات د هغو د جنس په شان او کورني حيوانات او خزندې د هغوى د جنس په شان جوړ کړل او خدای پاک وليدل چې دا ښه دي.

²⁶خدای پاک وفرمايل: ”مونږ به انسان * په خپل شکل او زمونږ په شان جوړ کړو ترڅو دوى په ماهيانو، په مرغانو، په کورني حيواناتو، په ټوله ځمکه او خزندو باندې حکم چلوي.“

²⁷نو خدای پاک انسان په خپل شکل پيدا کړ، هغه يې د خدای پاک په شکل پيدا کړ. هغوى يې نر او ښځه پيدا کړل.

²⁸خدای پاک هغوى ته برکت ورکړ او ويې فرمايل: ”بارداره او زيات شئ او ځمکه د خلکو څخه ډکه کړئ او د خپل واک ﻻندې يې راولئ او په ماهيانو، په مرغانو او په ټولو حيواناتو باندې حکم چلوئ.“

²⁹خدای پاک وفرمايل: ”ما تاسو ته د ځمکې په مخ باندې ستاسو د خوراک دپاره هغه بوټي او هغه مېوه دارې ونې درکړي دي چې تخم نيسي.

³⁰ما ټولو وحشي حيواناتو، مرغانو، خزندو او هغو ټولو ته چې د ژوندون ساه په کې ده ټول شنه بوټي د هغوى د خوراک دپاره ورکړل.“ او همداسې وشول.

³¹هر هغه څه چې خدای پاک جوړ کړي ؤو هغه يې وليدل چې ټول ډېر ښه ؤو! ماښام ؤ او سهار شو. دا شپږمه ورځ وه.