Read Pashto (Nangahari) — د پښتو مقدس کتاب پيدايښت 11 Bible Online

پيدايښت 11 - Pashto (Nangahari) — د پښتو مقدس کتاب bible

پيدايښت 11

¹په هغه وخت کې د ټولې دنيا خلکو يوه ژبه درلودله او يو قسم خبرې به يې کولې.

²خو وروسته هغوى د مشرق خواته کډه وکړه او د شنعار په ځمکه کې يې يوه ميداني پيدا کړه او هلته اوسېدل.

³هغوى يو بل ته وويل: ”راځئ چې خښتې جوړې کړو او هغه ښې پخې کړو.“ هغوى د تيږو په ځای خښتې او د مسالې په ځای قير استعمال کړ.

⁴هغوى وويل: ”راځئ چې د خپل ځان دپاره يو ښار ودان کړو او په هغه کې يو لوړ څلی جوړ کړو چې سر يې آسمان ته ورسيږي، ترڅو د خپل ځان دپاره يو نوم وګټو، داسې نشي چې په ټوله دنيا کې خپاره شو.“

⁵مګر کله چې څښتن راښکته شو چې هغه ښار او څلی چې خلکو جوړ کړی ؤ وګوري،

⁶هغه وفرمايل: ”اوس هغوى يو قوم دی او په يوه ژبه خبرې کوي. دا يوازې د کار شروع ده. هغوى به ډېر ژر د دې توان پيدا کړي چې هرڅه وغواړي هغه به سرته ورسوي.

⁷راځئ چې کوز شو او د هغوى ژبه سره ګډه وډه کړو ترڅو دوى يو د بل په خبرو باندې پوه نشي.“

⁸نو څښتن هغوى په ټوله دنيا کې خپاره کړل او هغوى مجبور شول چې د ښار د جوړولو څخه ﻻس واخلي.

⁹په دې سبب هغه ځای د بابل * په نوم ياد شو ځکه چې څښتن هلته د هغوى ژبه ګډه وډه کړه او هغوى يې په ټوله دنيا کې خپاره کړل.

¹⁰دا د سام اوﻻده ده: د سيلاب څخه دوه کاله وروسته هغه وخت چې سام د سلو کالو په عمر ؤ د هغه زوی آرفکشاد پيدا شو.

¹¹د آرفکشاد د پيدا کېدو څخه وروسته سام پنځه سوه کاله نور هم ژوند وکړ او نور اولادونه يې پيدا شول.

¹²آرفکشاد د پنځه دېرشو کالو په عمر ؤ چې د هغه زوی شالح پيدا شو.

¹³د شالح د پيدا کېدو څخه وروسته آرفکشاد څلورسوه درې کاله نور ژوند وکړ او نور زامن او لورګانې يې پيدا شوې.

¹⁴هغه وخت چې شالح د دېرشو کالو په عمر ؤ د هغه زوی عابر پيدا شو.

¹⁵پس له هغې، شالح څلورسوه درې کاله نور هم ژوند وکړ او نور زامن او لورګانې يې پيدا شوې.

¹⁶عابر د څلوردېرشو کالو په عمر ؤ چې د هغه زوی فالج پيدا شو.

¹⁷کله چې فالج پيدا شو، عابر څلورسوه دېرش کاله نور هم ژوند وکړ او زامن او لورګانې يې پيدا شوې.

¹⁸فالج د دېرشو کالو په عمر ؤ چې د هغه زوی رعو پيدا شو.

¹⁹د رعو د پيدا کېدلو څخه وروسته فالج دوه سوه نهه کاله نور هم ژوند وکړ او نور زامن او لورګانې يې پيدا شوې.

²⁰رعو د دوه دېرشو کالو په عمر ؤ چې د هغه زوی سروج پيدا شو.

²¹د سروج د پيدا کېدلو څخه وروسته رعو دوه سوه اوه کاله ژوند وکړ او نور زامن او لورګانې يې پيدا شوې.

²²سروج د دېرشو کالو په عمر ؤ چې د هغه زوی ناحور پيدا شو.

²³د ناحور د پيدا کېدلو څخه وروسته سروج دوه سوه کاله ژوند وکړ او نور زامن او لورګانې يې پيدا شوې.

²⁴ناحور د نهه ويشتو کالو په عمر ؤ چې د هغه زوی تارح پيدا شو.

²⁵د تارح د پيدا کېدلو څخه وروسته ناحور يوسلو نولس کاله ژوند وکړ او نور زامن او لورګانې يې پيدا شوې.

²⁶وروسته له دې چې تارح د اويا کالو په عمر شو، د هغه زامن حضرت ابرام، ناحور او هاران پيدا شول.

²⁷دا د تارح اوﻻده ده چې د هغه څخه حضرت ابرام، ناحور او هاران پيدا شول. هاران د حضرت لوط پلار ؤ.

²⁸د هاران پلار ﻻ ژوندی ؤ چې هغه خپل د زېږېدو په ځای يعنې اور کلدانيانو کې مړ شو.

²⁹حضرت ابرام د سارای سره واده وکړ او ناحور د ملکې سره چې د هاران لور وه واده وکړ. هاران د يسکا پلار هم ؤ.

³⁰سارای شنډه وه او ماشومان يې نه درلودل.

³¹تارح خپل زوی حضرت ابرام، خپل لمسی حضرت لوط چې د هاران زوی ؤ او د هغه انږور يعنې د حضرت ابرام ښځه سارای د ځان سره واخيستل او د اور کلدانيانو څخه ووتل چې د کنعان خاورې ته ﻻړ شي. خو کله چې هغوى حران ته راغلل هلته پاتې شول.

³²تارح د دوه سوه پنځو کالو په عمر په حران کې مړ شو.