Read Pashto (Nangahari) — د پښتو مقدس کتاب پيدايښت 13 Bible Online

پيدايښت 13 - Pashto (Nangahari) — د پښتو مقدس کتاب bible

پيدايښت 13

¹حضرت ابرام د خپلې ښځې او خپلو ټولو شيانو سره چې درلودل يې د مصر څخه د کنعان جنوبي خواته ﻻړ او حضرت لوط د هغه سره ﻻړ.

²حضرت ابرام شتمن سړی ؤ او هغه ډېر حيوانات، سره زر او سپين زر درلودل.

³هغه يو ځای او بل ځای ګرځېده او د بيت ئيل طرف ته ﻻړ. او هغه ځای ته ورسېده چې د بيت ئيل او عای ترمنځ پروت دی او حضرت ابرام پخوا هلته خپلې خېمې ودرولې وې.

⁴چېرته چې هغه د قربانۍ ځای جوړ کړی ؤ، هلته هغه د څښتن عبادت وکړ.

⁵او حضرت لوط هم چې د حضرت ابرام سره ؤ د پسونو او وزو رمې او پادې او خېمې درلودلې.

⁶په دې خاطر چې هغوى دواړو ډېر زيات حيوانات درلودل او د هغوى دپاره په کافي اندازه د څړځايونه نه ؤو، نو دوى نشو کولی چې دواړه يوځای سره واوسيږي.

⁷نو د حضرت ابرام او حضرت لوط د شپانو ترمنځ شخړه رامنځته شوه. په هغه وخت کې کنعانيان او فرزيان هم په دې خاوره کې اوسېدل.

⁸نو حضرت ابرام لوط ته وفرمايل: ”زما او ستا، يا زما د شپانو او ستا د شپانو ترمنځ بايد شخړه نه وي، ځکه چې مونږ يو د بل سره ورونه يو.

⁹نو بيا راځئ چې سره جدا شو. د ځمکې هره برخه چې ته غواړې هغه انتخاب کړه. ته يو خوا لاړ شه او زه به بلې خواته لاړ شم.“

¹⁰حضرت لوط شاوخوا ته وکتل او د اردن ټوله دره يې وليدله چې د سوغر پورې لکه د څښتن د باغ * او مصر په شان شنه وه. دا هغه وخت ؤ چې څښتن ﻻ سدوم او عموره له منځه نه ؤو وړي.

¹¹نو حضرت لوط د اردن ټوله دره د خپل ځان دپاره خوښه کړه او د لمرخاته خواته يې کډه وکړه. په دې ډول هغوى يو د بل څخه بېل شول.

¹²حضرت ابرام د کنعان په خاوره کې پاتې شو او حضرت لوط د هغو ښارونو په منځ کې چې په دره کې پراته ؤو ځای په ځای شو او سدوم ته نژدې يې خېمې ودرولې.

¹³د سدوم خلک ډېر بدکاره ؤو او د څښتن په مقابل کې يې ډېر سخت ګناهونه کول.

¹⁴د حضرت ابرام څخه د حضرت لوط له جدا کېدلو وروسته څښتن حضرت ابرام ته وفرمايل: ”اوس دې خپلې سترګې پورته کړه او د هغه ځای څخه چې ته په کې يې، شمال، جنوب، لمرخاته او لمرپرېواته خواته وګوره.

¹⁵دا ټوله ځمکه چې ته يې وينې زه به يې تا او ستا اوﻻدې ته درکړم او دا به تر آبده پورې ستاسو وي.

¹⁶زه به تاته دومره زياته اولاده درکړم چې د خاورو د ذرو په شان وي چې څوک يې نشي شمارلى.

¹⁷اوس لاړ شه او ټول هېواد وګوره، ځکه چې هغه ټول تاته درکوم.“

¹⁸نو حضرت ابرام خپلې خېمې واخيستلې او د ممري لويو ونو ته نژدې چې په حبرون کې دي ځای په ځای شو او په هغه ځای کې يې د څښتن دپاره د قربانۍ ځای جوړ کړ.