Read Pashto (Nangahari) — د پښتو مقدس کتاب پيدايښت 14 Bible Online

پيدايښت 14 - Pashto (Nangahari) — د پښتو مقدس کتاب bible

پيدايښت 14

¹په هغه وخت کې د شنعار پادشاه امرافل، د اﻻسار پادشاه اريوک، د عيلام پادشاه کدرﻻعمر او د قوئيم پادشاه تدعال

²لاړل چې د نورو پنځو پادشاهانو يعنې د سدوم د پادشاه بارع، د عمورې د پادشاه برشاع، د ادمه د پادشاه شنعاب، د صبوئيم د پادشاه شمئيبر او د بالع د پادشاه سره (بالع هماغه صوغر دی) جنګ وکړي.

³دغو پنځو پادشاهانو خپل ځواکونه د سديم په دره کې چې اوس د آرام درياب په نوم ياديږي سره يوځای کړل.

⁴هغوى دولس کاله د کدرﻻعمر د ﻻس ﻻندې ؤو، خو په ديارلسم کال هغوى ياغي شول.

⁵په څوارلسم کال کدرﻻعمر د هغو پادشاهانو سره چې د ده سره ملګري شوي ؤو، لاړ او رفائيانو ته يې په عشتروت قرنين، زوزيانو ته يې په هام او ايميانو ته يې په شاوه قريتين کې

⁶او حوريانو ته يې د ادوم په غرنۍ سيمه کې تر ايل فاران پورې چې دښتې ته نژدې دی ماتې ورکړه.

⁷بيا هغوى بېرته راوګرځېدل او عين مشفاط ته چې وروسته د قادش په نوم ياد شو راغلل او د عماليقيانو ټوله خاوره يې فتح کړه او اموريانو ته يې چې په حززون تامار کې اوسېدل ماتې ورکړه.

⁸په هغه وخت کې د سدوم، عموره، ادمه، صبوئيم او د بالع (صوغر) پادشاهان ووتل او د سديم په دره کې يې خپلې جنګي ليکې جوړې کړې

⁹ترڅو د عيلام د پادشاه کدرﻻعمر، د قوئيم د پادشاه تدعال، د شنعار د پادشاه امرافل او د اﻻسار د پادشاه اريوک په مقابل کې جنګ وکړي، يعنې څلور پادشاهان د پنځو په مقابل کې.

¹⁰د سديم په دره کې د قير ډېرې کندې وې. کله چې د سدوم او عمورې پادشاهان د جګړې څخه وتښتېدل، هغوى په دې کندو کې وغورزېدل او پاتې پادشاهان غرونو ته وتښتېدل.

¹¹نو څلورو پادشاهانو د سدوم او عمورې ټول شيان چې په هغو کې د هغوى خواړه هم شامل ؤو واخيستل او ﻻړل.

¹²هغوى د حضرت ابرام وراره لوط هم د هغه د ټول مال او جايداد سره د ځان سره يووړ، ځکه چې هغه په سدوم کې اوسېده.

¹³يو نفر چې د هغو څخه تښتېدلى ؤ عبراني ابرام ته خبر ورکړ. په دې وخت کې حضرت ابرام هغو لويو ونو ته نژدې چې د اموري ممري پورې يې اړه درلودله اوسېده. ممری او د هغه ورونه اشکول او عانر ټول د حضرت ابرام سره ملګري ؤو.

¹⁴کله چې حضرت ابرام خبر شو چې د هغه وراره نيول شوى دی، نو هغه خپل درې سوه اتلس جنګي نفر راوغوښتل او تر دان پورې په هغو څلورو پادشاهانو پسې شول.

¹⁵د شپې په وخت کې حضرت ابرام خپل نفر سره ووېشل چې په دښمن باندې حمله وکړي او هغوى ته يې ماتې ورکړه او تر حوبې پورې چې د دمشق په شمال کې ده ورپسې شول.

¹⁶حضرت ابرام هغه ټول سامان چې هغوى لوټ کړى ؤ او د ځان سره يې وړى ؤ بېرته راوګرځاوه. همدارنګه هغه خپل وراره حضرت لوط د هغه د شتمنۍ سره او ښځې او نور بنديان د ځان سره بېرته راوستل.

¹⁷کله چې حضرت ابرام کدرﻻعمر او د هغه سره ملګرو پادشاهانو ته ماتې ورکړه او بېرته راستون شو، د سدوم پادشاه د شاوه د درې پورې (چې د پادشاه د درې په نوم هم ياديږي) د هغه د ليدلو دپاره راغی.

¹⁸ملکيصدق د ساليم پادشاه چې د خدای تعالیٰ کاهن * ؤ د حضرت ابرام دپاره ډوډۍ او د انګورو شربت راوړل.

¹⁹هغه حضرت ابرام ته برکت ورکړ او ويې ويل: ”خدای تعالیٰ چې د ځمکې او آسمانونو پيدا کوونکی دی تاته برکت درکړي.

²⁰د خدای تعالیٰ ثناه دې وي چې ستا دښمنان يې تاته تسليم کړل.“ نو حضرت ابرام ملکيصدق ته د هغو شيانو چې هغه بېرته اخيستي ؤو، لسمه برخه ورکړه.

²¹د سدوم پادشاه حضرت ابرام ته وويل: ”زما ټول خلک بېرته ماته راکړه او شيان دې خپل ځان ته وساته.“

²²حضرت ابرام ځواب ورکړ: ”زه د څښتن يعنې خدای تعالیٰ په حضور کې چې د ځمکې او آسمانونو پيدا کوونکی دی په کلکه قسم خورم

²³چې زه به ستا د شيانو څخه هيڅ شی حتیٰ يو تار يا د څپلۍ تسمه هم وانخلم. داسې نه چې بيا ووايې چې ابرام ما شتمن کړ.

²⁴زه به د خپل ځان دپاره هيڅ شی وانخلم. يوازينی شی چې زه به يې قبول کړم هغه هغه څه دي چې زما خلکو خوړلي دي او د هغه چا برخه چې زما سره تللي ؤو يعنې د عانر، اشکول او ممري برخه هغوى ته ورکړه.“