Read Pashto (Nangahari) — د پښتو مقدس کتاب پيدايښت 15 Bible Online

پيدايښت 15 - Pashto (Nangahari) — د پښتو مقدس کتاب bible

پيدايښت 15

¹وروسته بيا څښتن په رويا کې حضرت ابرام ته وفرمايل: ”ای ابرامه مه وېرېږه، زه ستا سپر يم او تاته به ډېر لوی اجر درکړم.“

²حضرت ابرام وفرمايل: ”ای څښتن تعالیٰ، ماته به څه راکړې ځکه چې زه بې اوﻻده پاتې شوم. زما يوازينی وارث دمشقي العازار دی.

³ماته دې اولادونه نه دي راکړي، نو زما د کورنۍ نوکر به زما ميراث خور شي.“

⁴څښتن په ځواب کې وفرمايل: ”دا سړی به ستا ميراث خور نه وي بلکه ستا خپل زوی چې په خپله ستا څخه به پيدا شي، ستا ميراث خور وي.“

⁵څښتن هغه دباندې وويست او ورته ويې فرمايل: ”آسمان ته وګوره او هڅه وکړه چې ستوري وشمارې، نو ستا اولاده به د هغو په شان دومره زياته وي.“

⁶حضرت ابرام په څښتن باندې باور وکړ او په دې خاطر څښتن د هغه څخه خوشاله شو او هغه يې قبول کړ.

⁷بيا څښتن هغه ته وفرمايل: ”زه هغه څښتن يم چې ته مې د اور کلدانيانو څخه راوويستلې چې دا ځمکه تاته درکړم او ستا ملکيت شي.“

⁸مګر حضرت ابرام وفرمايل: ”ای څښتن تعالیٰ، زه به څنګه پوه شم چې هغه به زما شي؟“

⁹نو څښتن هغه ته وفرمايل: ”ماته يوه درې کلنه غوا، درې کلنه وزه، درې کلن پسه، يوه کوتره او يوه قمري راوړه.“

¹⁰حضرت ابرام دا ټول هغه ته راوړل او هر يو يې په منځ کې دوه ټوټې کړ او هره نيمه شوې ټوټه يې بلې ټوټې ته مخامخ کېښودله، مګر مرغان يې دوه ټوټې نه کړل.

¹¹کله چې ټپوسان د دې مړو حيواناتو په تنو باندې راکوز شول حضرت ابرام هغه وشړل.

¹²کله چې لمر په پرېوتلو شو، په حضرت ابرام باندې ډېر دروند خوب راغی او سخته وېروونکې تياره ورباندې راغله.

¹³څښتن هغه ته وفرمايل: ”په دې پوه شه چې ستا اولاده به په پردۍ خاوره کې مسافره شي او هغوى به هلته غلامان شي او په دوى باندې به څلورسوه کاله ظلم کيږي.

¹⁴مګر زه به هغه قوم ته چې دوى يې غلامي کوي جزا ورکړم او پس له هغې به دوى د ډېرې شتمنۍ سره ووزي.

¹⁵ته به په پاخه عمر کې په آرامۍ سره مړ شې او ښخ به شې.

¹⁶ستا اولاده به له څلورم نسل څخه وروسته بېرته دلته راشي، ځکه زه به تر هغې پورې اموريان ونه شړم ترڅو پورې چې هغوى دومره بدکاره شي چې بايد سزا ومومي.“

¹⁷کله چې لمر پرېوت او تياره شوه، د لوګي څخه ډک يو تنور او بلېدونکی څراغ راښکاره شول او د دې ټوټو له منځ څخه تېر شول.

¹⁸په هماغه ورځ څښتن د حضرت ابرام سره لوظ وکړ او ويې فرمايل: ”زه ستا اولادې ته دا ټوله خاوره د مصر د سيند څخه نيولې د فرات تر لوی سيند پورې ورکوم

¹⁹يعنې د قينيانو، قنزيانو، قدمونيانو،

²⁰حيتيانو، فرزيانو، رفائيانو،

²¹اموريانو، کنعانيانو، جرجاشيانو او يبوسيانو خاوره.“