Read Pashto (Nangahari) — د پښتو مقدس کتاب پيدايښت 16 Bible Online

پيدايښت 16 - Pashto (Nangahari) — د پښتو مقدس کتاب bible

پيدايښت 16

¹نو د حضرت ابرام ښځه سارای شنډه وه او هيڅ اولاد يې نه درلود. مګر هغې يوه مصرۍ وينځه درلودله چې هاجره نومېدله.

²نو هغې حضرت ابرام ته وويل: ”څښتن زه د اولادونو د راوړلو څخه بنده کړې يم. ﻻړ شه او زما د وينځې سره يوځای شه، کېدای شي چې هغه زما دپاره اولاد وزېږوي.“ حضرت ابرام د سارای خبره ومنله.

³نو د حضرت ابرام ښځې ساراى خپله وينځه هاجره خپل مېړه ته ورکړه چې د هغه ښځه شي. (دا کار هغه وخت وشو چې د کنعان په خاوره کې د حضرت ابرام د اوسېدلو لس کاله شوي ؤ.)

⁴حضرت ابرام د هاجرې سره يوځای شو او هغه اميدواره شوه او کله چې هاجره پوه شوه چې اميدواره ده، نو مغروره شوه او سارای ته يې په سپک نظر کتل.

⁵نو سارای حضرت ابرام ته وويل: ”دا ستا ګناه ده چې دغه وينځه ما سپکوي. ما په خپله هغه تاته درکړه او له هغه وخت څخه چې هغه پوه شوه چې اميدواره شوه، نو زه د هغې په نظر کې سپکه ښکاره شوم. څښتن دې زما او ستا ترمنځ انصاف وکړي.“

⁶حضرت ابرام ځواب ورکړ: ”ډېر ښه ستا وينځه ستا په لاس کې ده، نو څه چې غواړې د هغې سره يې وکړه.“ نو سارای هاجره دومره وځوروله چې د هغې څخه وتښتېدله.

⁷د څښتن فرښتې د هاجرې سره په دښته کې د اوبو چينې يعنې هغې چينې ته نژدې چې د شور په لاره کې وه ملاقات وکړ.

⁸فرښتې وفرمايل: ”ای هاجرې د سارای وينځې! له کومه ځايه راغلې يې او چېرته روانه يې؟“ هغې ځواب ورکړ: ”زه د خپلې بادارې سارای څخه تښتېدلې يم.“

⁹د څښتن فرښتې هغې ته وفرمايل: ”بېرته خپلې بادارې ته ورشه او د هغې غلامي کوه.“

¹⁰د څښتن فرښتې زياته کړه: ”زه به ستا اولاده دومره زياته کړم چې هيڅوک يې ونه شمېرلی شي.“

¹¹د څښتن فرښتې هغې ته وفرمايل: ”ستا به زوی پيدا شي او په هغه باندې به اسماعيل * نوم کېږدې، ځکه چې څښتن ستا د غم فرياد اورېدلی دی.

¹²ستا زوی به په خپل سر وي. هغه به د ټولو خلکو په ضد وي او ټول خلک به د هغه په ضد وي او د ټولو خپلو خپلوانو څخه به جدا اوسيږي.“

¹³هاجرې له خپل ځان څخه پوښتنه وکړه: ”آيا په رښتيا مې خدای پاک وليده او زه تر اوسه پورې ژوندۍ يم؟“ نو هغې د څښتن نوم چې خبرې يې ورسره کړې وې هغه خدای پاک چې ما ويني وباله.

¹⁴په دې خاطر خلکو هغه کوهی د هغه ژوندي ذات کوهی چې ما ويني په نوم ياد کړ او هغه تر اوسه پورې د قادش او بارد په منځ کې دی.

¹⁵د هاجرې څخه د حضرت ابرام زوی پيدا شو او حضرت ابرام په هغه باندې اسماعيل نوم کېښود.

¹⁶حضرت ابرام د شپږ اتياو کالو په عمر ؤ چې د هاجرې څخه هغه ته زوی پيدا شو.