Read Pashto (Nangahari) — د پښتو مقدس کتاب پيدايښت 17 Bible Online

پيدايښت 17 - Pashto (Nangahari) — د پښتو مقدس کتاب bible

پيدايښت 17

¹هغه وخت چې حضرت ابرام د نهه نوي کالو په عمر ؤ، څښتن هغه ته ښکاره شو او ويې فرمايل: ”زه مطلق قادر خدای يم. زما منونکی او بې ګناه اوسه.

²زه به ستا سره يو لوظ وکړم او ډېره اولاده به درکړم.“

³نو هغه وخت حضرت ابرام پړمخې پرېوت او خدای پاک هغه ته وفرمايل:

⁴”ستا سره دا لوظ کوم چې ته به د ډېرو قومونو پلار شې.

⁵له دې وروسته به ستا نوم ابرام نه بلکه ابراهيم * وي، ځکه چې ته مې د ډېرو قومونو پلار کړی يې.

⁶زه به ستا نسل زيات کړم او ستا څخه به قومونه پيدا کړم او د هغوى څخه به ځينې پادشاهان شي.

⁷زه به خپل لوظ ستا، ستا د اوﻻدې او ستا څخه وروسته ستا د راتلونکي نسل سره ټينګ وساتم او دا به آبدي لوظ وي. زه به ستا خدای يم او ستا څخه وروسته به ستا د اوﻻدې خدای يم.

⁸زه به د کنعان ټوله خاوره په کومه کې چې ته اوس مسافر يې، تاته او ستا څخه وروسته ستا اوﻻدې ته د آبدي ملکيت په توګه درکړم او زه به د هغوى خدای يم.“

⁹خدای پاک حضرت ابراهيم ته وفرمايل: ”ته او ستا څخه وروسته ستا ټوله اولاده بايد زما په لوظ باندې ټينګ ودرېږئ.

¹⁰ته او ستا اولاده بايد سره موافقه وکړئ چې ستاسو هر يو نارينه دې سنت شي.

¹¹۱۱‏-۱۲ له همدا اوس نه تاسو بايد هر اته ورځينی هلک سنت کړئ. په دې کې هغه غلامان چې ستاسو په کورنيو کې پيدا شوي وي او هغه غلامان چې د بېګانه خلکو څخه په بيه اخيستل شوي وي هم شامل دي. په دې کار سره به دا معلومه شي چې زما او ستاسو ترمنځ يو لوظ شته.

¹³هر يو نفر بايد سنت شي. دا به ستاسو په بدن باندې زما د آبدي لوظ نښه وي.

¹⁴هر يو نارينه چې سنت شوی نه وي بايد زما له قوم څخه وشړل شي ځکه چې هغه زما لوظ مات کړی دی.“

¹⁵خدای پاک حضرت ابراهيم ته وفرمايل: ”له دې وروسته خپلې ښځې ته سارای مه وايه، د هغې نوم دې له همدا اوس څخه ساره * شي.

¹⁶زه به هغې ته برکت ورکړم او د هغې په وسيله به تاته زوی درکړم. هغه به د قومونو مور شي او د هغې څخه به د قومونو پادشاهان راپيدا شي.“

¹⁷حضرت ابراهيم پړمخې پرېوت او ويې خندل او د خپل ځان سره يې وويل: ”آيا د سل کلن سړي څخه به زوی پيدا شي؟ آيا ساره به په نوي کلنۍ کې ماشوم وزېږوي؟“

¹⁸حضرت ابراهيم خدای پاک ته وفرمايل: ”اسماعيل ولې زما ميراث خور نشي؟“

¹⁹مګر خدای پاک وفرمايل: ”نه، خو ستا ښځه ساره به ستا دپاره زوی راوړي او ته به په هغه باندې اسحاق نوم کېږدې. زه به ستا د زوی اسحاق سره خپل لوظ ټينګ وساتم ترڅو د هغه څخه وروسته د هغه د نسل دپاره يو آبدي لوظ وي.

²⁰ما د اسماعيل په هکله ستا غوښتنه واورېدله. نو زه به هغه ته هم برکت ورکړم او هغه ته به زيات ماشومان او ډېره اوﻻده ورکړم. هغه به د دولسو زامنو پلار وي چې مشران به وي او زه به د هغه د اولادې څخه يو لوی قوم جوړ کړم.

²¹مګر خپل لوظ به ستا د زوی اسحاق سره چې ساره به يې په راتلونکي کال کې په همدې وخت وزېږوي ټينګ وساتم.“

²²کله چې خدای پاک د حضرت ابراهيم سره خپلې خبرې خلاصې کړې نو د هغه څخه لاړ.

²³حضرت ابراهيم خپل زوی حضرت اسماعيل او نور ټول نارينه چې د هغه په کورنۍ کې ؤو او هغه غلامان چې د هغه په کورنۍ کې زېږېدلي ؤو او هغه غلامان چې په پيسو باندې اخيستل شوي ؤو لکه څنګه چې خدای پاک هغه ته فرمايلي ؤو په هماغه ورځ سنت کړل.

²⁴حضرت ابراهيم د نهه نوي کالو په عمر ؤ چې سنت کړای شو

²⁵او د هغه زوی حضرت اسماعيل د ديارلسو کالو په عمر ؤ.

²⁶حضرت ابراهيم او د هغه زوی حضرت اسماعيل دواړه په يوه ورځ سنت شول.

²⁷د حضرت ابراهيم د کورنۍ هر نارينه او هغه غلامان چې د هغوى په کورنۍ کې زېږېدلي ؤو يا هغوى چې په پيسو اخيستل شوي ؤو د هغه سره يوځای سنت شول.