Read Pashto (Nangahari) — د پښتو مقدس کتاب پيدايښت 2 Bible Online

پيدايښت 2 - Pashto (Nangahari) — د پښتو مقدس کتاب bible

پيدايښت 2

¹نو آسمان او ځمکه او نور ټول شيان جوړ شول.

²په اوومه ورځ خدای پاک هغه ټول کارونه چې کول يې سرته ورسول او کار يې بس کړ.

³خدای پاک اوومه ورځ مبارکه وبلله او هغه يې خاصه وګرځوله ځکه چې په هغه ورځ هغه پيدايښت پوره کړ او کار يې بس کړ.

⁴دا د آسمان او ځمکې پيدا کېدل ؤو. <h>د عدن باغ</h> څه وخت چې څښتن خدای آسمانونه او ځمکه جوړ کړل،

⁵تر هغه وخته پورې لا هيڅ واښه يا نور بوټي راشنه شوي نه ؤو، ځکه چې څښتن خدای باران نه ؤ اورولی او څوک نه ؤ چې په ځمکه باندې کار وکړي.

⁶نو د ځمکې څخه د اوبو ويالې راووتلې او د ځمکې مخ ته يې اوبه ورکړې.

⁷څښتن خدای خاوره راواخيستله او د هغې څخه يې آدم * جوړ کړ او د هغه په پوزه کې يې د ژوندون روح پو کړ او هغه ژوندی بدن شو.

⁸څښتن خدای په عدن کې لمرخاته خواته يو باغ جوړ کړ او هغه انسان چې هغه جوړ کړی ؤ هغه يې په دې باغ کې واچاوه.

⁹خدای پاک په دې باغ کې هر قسم ښايسته او مېوه دارې ونې راشنې کړلې او د باغ په منځ کې دوه نورې ونې وې. يوه د ژوندانه ونه او بله د ښو او بدو د پېژندلو ونه.

¹⁰د عدن څخه يو سيند جاري شو چې باغ ته اوبه ورکړي او دا سيند بيا په څلورو سيندونو باندې ووېشل شو.

¹¹د اولني سيند نوم فيشون دی چې د حويلې په ټوله ځمکه باندې راتاو شوی دی او هلته سره زر دي،

¹²چې د هغه ځای سره زر ډېر ښه دي. د خوشبويۍ مواد او قيمتي تيږې هم په کې پيدا کيږي.

¹³دوهم يې د جيحون سيند دی چې د کوش د ټولې ځمکې څخه راتاو شوی دی.

¹⁴دريم سيند د دجلې په نوم ياديږي چې د آشور لمرخاته خواته بهيږي او څلورم د فرات سيند دی.

¹⁵نو څښتن خدای حضرت آدم د عدن په باغ کې واچاوه چې د هغه خدمت او ساتنه وکړي.

¹⁶څښتن خدای حضرت آدم ته وفرمايل: ”د باغ د ټولو ونو څخه مېوه خوړلی شې.

¹⁷مګر د ښو او بدو د پېژندلو د ونې څخه نه، ځکه کله چې د هغې ونې مېوه وخورې بې شکه چې مړ به شې.“

¹⁸څښتن خدای وفرمايل: ”دا ښه نه ده چې آدم دې يوازې اوسي، زه به د هغه دپاره يو مناسب ملګری جوړوم چې د هغه سره مرسته وکړي.“

¹⁹نو بيا څښتن خدای د خاورې څخه ټول حيوانات او مرغان جوړ کړل او هغه يې حضرت آدم ته راوستل ترڅو وګوري چې په هغوى باندې کوم نوم ږدي. په دې ترتيب سره په هغوى ټولو باندې نومونه کېښودل شول.

²⁰بيا حضرت آدم په ټولو کورني او وحشي حيواناتو او مرغانو باندې نومونه کېښودل. د هغوى څخه يو هم د حضرت آدم دپاره مناسب ملګری نه ؤ.

²¹نو څښتن خدای حضرت آدم په درانه خوب باندې ويده کړ او د هغه د پوښتيو څخه يې يوه راواخيستله او د هغې ځای يې په غوښه باندې ډک کړ.

²²څښتن خدای د هغې پوښتۍ څخه ښځه جوړه کړه او هغه يې حضرت آدم ته راوستله.

²³حضرت آدم وفرمايل: ”دلته اوس زما په شان يو څوک شته! هډوکی يې زما د هډوکي څخه اخيستل شوی او غوښه يې زما له غوښې څخه د هغې نوم ښځه ده ځکه چې هغه د سړي څخه اخيستل شوې ده“

²⁴له همدې کبله سړی خپل مور او پلار پرېږدي او د خپلې ښځې سره يوځای شي او سره يو وجود شي.

²⁵سره د دې چې حضرت آدم او د هغه ښځه دواړه لوڅ ؤو، خو دوى نه شرمېدل.