Read Pashto (Nangahari) — د پښتو مقدس کتاب پيدايښت 20 Bible Online

پيدايښت 20 - Pashto (Nangahari) — د پښتو مقدس کتاب bible

پيدايښت 20

¹حضرت ابراهيم له ممري څخه د کنعان جنوب خواته کډه وکړه او د قادش او شور په منځ کې يې سکونت اختيار کړ او د يو څه وخت دپاره په جرار کې پاتې شو.

²هلته حضرت ابراهيم د خپلې ښځې ساره په هکله وفرمايل: ”هغه زما خور ده.“ د جرار پادشاه ابي ملک په ساره پسې نفر ولېږل او هغه يې راوستله.

³يوه شپه خدای پاک په خوب کې ابي ملک ته ښکاره شو او ويې فرمايل: ”ته به مړ شې ځکه هغه ښځه چې تا خپل ځان ته راوستې ده، هغه واده شوې ښځه ده.“

⁴مګر ابي ملک هغې ته ورنژدې شوی نه ؤ هغه وويل: ”ای څښتنه، آيا ته به بې ګناه خلک ووژنې؟

⁵حضرت ابراهيم په خپله وفرمايل چې هغه زما خور ده او هغې هم دا خبره وکړه چې دی زما ورور دی او دا کار ما د پاک وجدان له مخې کړی دی او هيڅ غلطي مې نه ده کړې.“

⁶خدای پاک په خوب کې هغه ته وفرمايل: ”هو، زه پوهېږم چې تا دا کار د پاک وجدان له مخې کړی دی او ته مې د دې څخه وساتلې چې زما په مقابل کې کومه ګناه وکړې او دې ته مې پرېنښودلې چې هغې ته لاس وروړې.

⁷اوس هغه ښځه بېرته خپل مېړه ته ورکړه. هغه نبي دی او هغه به ستا دپاره دعا وکړي ترڅو ژوندی پاتې شې. خو که چېرې هغه بېرته ورنه کړې، په دې پوه شه چې ته او ستا ټول خلک به مړه شئ.“

⁸سبا سهار وختي ابي ملک خپل ټول درباريان راوغوښتل او څه چې پېښ شوي ؤو هغوى ته يې بيان کړل او هغوى ډېر ووېرېدل.

⁹بيا ابي ملک حضرت ابراهيم راوغوښت او پوښتنه يې ورڅخه وکړه: ”زمونږ سره دې څه وکړل؟ ما ستا سره څه بد کړي ؤو چې داسې لوی مصيبت دې په ما او زما په پادشاهۍ باندې راوست؟ تا زما سره داسې کار وکړ چې د کولو نه ؤ.“

¹⁰بيا ابي ملک د حضرت ابراهيم څخه پوښتنه وکړه: ”داسې کار دې ولې وکړ؟“

¹¹حضرت ابراهيم ځواب ورکړ: ”ما فکر وکړ چې د دې ځای خلک د خدای پاک څخه نه وېريږي او ما به د خپلې ښځې په خاطر ووژني.

¹²هغه په رښتيا سره زما خور ده، هغه زما ناسکه خور ده. هغه زما د پلار لور ده، مګر زما د مور لور نه ده او ما د هغې سره واده کړی دی.

¹³کله چې خدای پاک زه د خپل پلار د کور څخه پردي هېواد ته ولېږلم، ما هغې ته وويل: دا به زما سره ستا وفاداري وي چې مونږ هرځای ته لاړ شو، زما په هکله به وايې چې هغه زما ورور دی.“

¹⁴نو ابي ملک پسونه او غوايان، غلامان او وينځې حضرت ابراهيم ته ورکړل او د هغه ښځه ساره يې بېرته هغه ته ورکړه.

¹⁵ابي ملک وويل: ”زما ټوله ځمکه ستا په مخکې ده، هرځای چې ستا خوښ وي هلته واوسېږه.“

¹⁶هغه ساره ته وويل: ”زه ستا ورور ته زر مثقاله سپين زر ورکوم ترڅو هغو ټولو خلکو ته چې ستا سره دي دا ثابته شي چې ته بې ګناه يې او هر يو په دې باندې پوه شي چې تا کومه غلطي نه ده کړې.“

¹⁷۱۷‏-۱۸ د هغه څه په خاطر چې د حضرت ابراهيم په ښځې ساره باندې شوي ؤو، څښتن د ابي ملک د کورنۍ ټولې ښځې شنډې کړې وې. نو حضرت ابراهيم د ابي ملک دپاره دعا وکړه او خدای پاک هغه ته شفا ورکړه. هغه همدارنګه د هغه ښځې او د هغه وينځو ته هم شفا ورکړه چې ماشومان وزېږوي.