Read Pashto (Nangahari) — د پښتو مقدس کتاب پيدايښت 22 Bible Online

پيدايښت 22 - Pashto (Nangahari) — د پښتو مقدس کتاب bible

پيدايښت 22

¹څه موده وروسته خدای پاک په حضرت ابراهيم باندې ازمايښت وکړ او هغه ته يې وفرمايل: ”ای ابراهيمه!“ او حضرت ابراهيم ځواب ورکړ: ”هو، زه حاضر يم!“

²خدای پاک وفرمايل: ”خپل زوی اسحاق چې ستا يوازينی زوی دی او په تا باندې ډېر ګران دی واخله او د موريا سيمې ته لاړ شه او هغه په هغه غره باندې چې زه يې درته ښايم زما دپاره د سوزېدونکې نذرانې په توګه قرباني کړه.“

³حضرت ابراهيم سهار وختي پاڅېد، د سوزېدونکې نذرانې دپاره يې لرګي مات کړل او هغه يې په خره باندې بار کړل. خپل دوه نوکران او خپل زوی حضرت اسحاق يې د ځان سره واخيستل او هغه ځای ته روان شول چې خدای پاک ورته فرمايلي ؤو.

⁴په دريمه ورځ حضرت ابراهيم هغه ځای د لېرې څخه وليد.

⁵بيا هغه خپلو نوکرانو ته وفرمايل: ”تاسو دلته د خره سره پاتې شئ، زه او هلک به هلته سره لاړ شو. مونږ به هلته عبادت وکړو او بېرته به بيا تاسو ته راشو.“

⁶حضرت ابراهيم د قربانۍ لرګي خپل زوی ته په اوږو باندې کېښودل او خپله يې چاقو او اور واخيستل او دواړه يوځای سره روان شول.

⁷حضرت اسحاق خپل پلار ته وويل: ”ای پلاره!“ هغه ځواب ورکړ: ”وايه زما زويه!“ هغه وويل: ”زه پوهېږم چې ستا سره اور او لرګي شته، مګر د سوزېدونکې نذرانې دپاره وری چېرته دی؟“

⁸حضرت ابراهيم ځواب ورکړ: ”اى زما زويه، خدای پاک به په خپله د سوزېدونکې نذرانې دپاره وری پيدا کړي.“ او دواړه يوځای سره روان شول.

⁹کله چې هغه ځای ته چې خدای پاک ورته فرمايلي ؤو ورسېدل، حضرت ابراهيم هلته د قربانۍ ځای جوړ کړ او په هغه باندې يې لرګي په ترتيب سره کېښودل. هغه خپل زوی حضرت اسحاق وتاړه او د لرګيو د پاسه يې کېښود.

¹⁰بيا هغه چاقو راواخيست چې خپل زوی حلال کړي.

¹¹مګر د څښتن فرښتې د آسمان څخه هغه ته غږ وکړ: ”ای ابراهيمه، ای ابراهيمه!“ هغه ځواب ورکړ: ”زه حاضر يم.“

¹²هغه وفرمايل: ”هلک ژوبل نه کړې او په هغه باندې هيڅ ونه کړې! زه اوس پوه شوم چې ته د خدای پاک څخه وېرېږې، ځکه چې خپل يوازينی زوی دې زما څخه دريغ نه کړ.“

¹³حضرت ابراهيم سترګې پورته کړې او ويې ليدل چې شاته يې يو ګډ دی چې ښکرونه يې په بوټي کې نښتي ؤو. حضرت ابراهيم ورغی، هغه يې راونيوه او د خپل زوی په ځای يې د سوزېدونکې نذرانې په توګه قرباني کړ.

¹⁴او حضرت ابراهيم دغه ځای د څښتن به يې برابروي په نوم ياد کړ او حتیٰ تر نن ورځې پورې داسې ويل کيږي: ”هغه به د څښتن په غره کې تيار شي.“

¹⁵د څښتن فرښتې د دوهم ځل دپاره د آسمان څخه په حضرت ابراهيم باندې غږ وکړ

¹⁶او ويې فرمايل: ”څښتن داسې وايي: په دې خاطر چې تا دا کار وکړ او خپل يوازينی زوی دې زما څخه دريغ نه کړ، زه په خپل ذات باندې قسم خورم،

¹⁷زه به تاته برکت درکړم او ستا نسل به لکه د آسمان د ستورو او هغو شګو په شان چې د درياب په غاړه پرتې وي زيات کړم. هغوى به خپلو دښمنانو ته ماتې ورکړي او د هغوى ښارونه به ونيسي.

¹⁸د ځمکې ټول قومونه به ستا د اولادې په وسيله برکت ومومي، ځکه چې تا زما حکم منلی دی.“

¹⁹نو حضرت ابراهيم بېرته خپلو نوکرانو ته راستون شو او هغوى ټول يوځای بئرشبع ته لاړل او حضرت ابراهيم په بئرشبع کې پاتې شو.

²⁰څه موده وروسته حضرت ابراهيم خبر شو چې د ده د ورور ناحور ښځه ملکه هم مور شوه او زامن يې زېږولي دي:

²¹د هغه اولنی اولاد عوص، د هغه ورور بوز، قموئيل د ارام پلار،

²²کاسد، حزو، فلداش، يدلاف او بتوئيل.

²³د بتوئيل څخه ربکا پيدا شوه. ملکې د حضرت ابراهيم ورور ناحور ته دا اته زامن وزېږول.

²⁴رئومه د ناحور وينځې هم طابح، جاحم، تاحش او معکه وزېږول.