Read Pashto (Nangahari) — د پښتو مقدس کتاب پيدايښت 23 Bible Online

پيدايښت 23 - Pashto (Nangahari) — د پښتو مقدس کتاب bible

پيدايښت 23

¹ساره يوسلو اوه ويشت کاله ژوندۍ وه.

²هغه په قريه اربع (حبرون) کې چې د کنعان په هېواد کې دی مړه شوه او حضرت ابراهيم د ساره دپاره غمجن شو او په هغې پسې يې وژړل.

³بيا حضرت ابراهيم د خپلې ښځې د مړي له څنګه پاڅېده او حيتيانو ته ورغی او ويې فرمايل:

⁴”زه دلته ستاسو په منځ کې پردی او مسافر يم. يو څه ځمکه په ما باندې خرڅه کړئ ترڅو خپله ښځه په کې ښخه کړم.“

⁵هغوى ځواب ورکړ:

⁶”باداره، زمونږ خبره واوره. مونږ تاته د يو قوي مشر په سترګه ګورو. زمونږ په ډېرو ښو قبرونو کې خپل مړی ښخ کړه. مونږ هر يو به خوشاله شو چې تاته د قبر دپاره ځای درکړو ترڅو خپله ښځه په کې ښخه کړې.“

⁷نو حضرت ابراهيم پاڅېد او د احترام په خاطر يې هغوى ته خپل سر ټيټ کړ

⁸او ورته ويې فرمايل: ”که ستاسو خوښه وي پرېږدئ چې خپل مړی ښخ کړم. تاسو زما په خاطر د صوحار د زوی عفرون څخه وغواړئ

⁹چې د مکفيلې سمڅه چې د هغه جايداد دی او د هغه د پټي سرته پرته ده، په پوره بيه په ما باندې خرڅه کړي. دا به ستاسو په منځ کې زمونږ هديره وي.“

¹⁰عفرون په خپله د نورو حيتيانو سره د ښار په دروازه کې د غونډې په ځای کې ناست ؤ. هغه حضرت ابراهيم ته د ټولو حيتيانو په مخکې چې هلته حاضر ؤو ځواب ورکړ،

¹¹هغه وويل: ”نه، زما باداره! زما خبره واوره. زه دا پټی او هغه سمڅه چې په هغه کې ده د خپل قوم په مخکې تاته درکوم، خپل مړی دې په کې ښخ کړه.“

¹²حضرت ابراهيم يو ځل بيا د حيتيانو په وړاندې د احترام سر ټيټ کړ.

¹³هغه د ټولو په مخکې عفرون ته وفرمايل: ”زما خبره واوره. که چېرې ستا رضا وي زه به د پټي بيه تاته درکړم. دا زما له خوا قبوله کړه ترڅو خپل مړی هلته ښخ کړم.“

¹⁴عفرون ځواب ورکړ:

¹⁵”ای زما باداره، زما خبره واوره. د دې ځمکې بيه څلورسوه مثقاله سپين زر دي، خو دا زما او ستا ترمنځ هيڅ شی نه دی. خپل مړی دې په کې ښخ کړه.“

¹⁶نو حضرت ابراهيم د عفرون خبره قبوله کړه او هغه بيه چې عفرون د حيتيانو په مخکې ټاکلې وه، يعنې څلورسوه مثقاله سپين زر عفرون ته وتلل. دا د هغه وزن سره سم ؤو چې په هغه وخت کې يې د سوداګرانو په منځ کې رواج درلود.

¹⁷په دې ډول د عفرون جايداد چې په مکفيله کې د ممري په لمرخاته کې ؤ هغه د حضرت ابراهيم شو. په هغه کې پټی او هغه سمڅه چې په هغه پټي کې وه او د هغې ځمکې شاوخوا ټولې ونې شاملې وې.

¹⁸دا ځمکه د ټولو حيتيانو په مخکې چې په هغې غونډې کې حاضر ؤو د حضرت ابراهيم د جايداد په توګه وپېژندل شوه.

¹⁹نو حضرت ابراهيم خپله ښځه ساره ممري ته نژدې چې په حبرون کې ده د مکفيله په سمڅه کې د کنعان په خاوره کې ښخه کړه.

²⁰نو هغه پټی او سمڅه چې په هغې کې وه د حيتيانو له خوا په حضرت ابراهيم باندې د هديرې لپاره په قباله ورکړای شول.