Read Pashto (Nangahari) — د پښتو مقدس کتاب پيدايښت 25 Bible Online

پيدايښت 25 - Pashto (Nangahari) — د پښتو مقدس کتاب bible

پيدايښت 25

¹حضرت ابراهيم بله ښځه وکړه چې نوم يې قطوره ؤ.

²د هغې څخه د حضرت ابراهيم زامن زمران، يقشان، مدان، مديان، يشباق او شوعه پيدا شول.

³يقشان د شبا او ددان پلار ؤ او اشوريم، لطوشيم او لئوميم د ددان اولاده وه.

⁴عيفه، عيفر، حنوک، ابيداع او الداعه د مديان زامن ؤو. دا ټول د قطورې اولاده وه.

⁵حضرت ابراهيم خپله ټوله شتمني حضرت اسحاق ته پرېښودله.

⁶مګر هغه ﻻ ژوندی ؤ چې د خپلو وينځو زامنو ته يې سوغاتونه ورکړل او هغوى يې د خپل زوی حضرت اسحاق څخه د مشرق خواته لېرې ولېږل.

⁷حضرت ابراهيم پوره يوسلو پنځه اويا کاله ژوند وکړ.

⁸هغه په پاخه عمر کې وفات شو او د خپلو نيکونو سره يوځای شو.

⁹د هغه زامنو حضرت اسحاق او حضرت اسماعيل هغه ممري ته نژدې د حيتي صوحار د زوی عفرون په پټي کې د مکفيله په سمڅه کې ښخ کړ.

¹⁰دا هغه پټی ؤ چې حضرت ابراهيم د حيتيانو څخه په بيه اخيستی ؤ. حضرت ابراهيم او د هغه ښځه ساره دواړه په هغه کې ښخ کړای شول.

¹¹د حضرت ابراهيم د وفات څخه وروسته خدای پاک د هغه زوی حضرت اسحاق ته برکت ورکړ او حضرت اسحاق بئرلحي ريي ته نژدې اوسېده.

¹²دا د حضرت ابراهيم د زوی حضرت اسماعيل اولاده ده. دا هغه اسماعيل ؤ چې د ساره د مصرۍ وينځې هاجرې څخه پيدا شوی ؤ.

¹³د حضرت اسماعيل د زامنو نومونه د هغوى د زېږېدو د ترتيب له مخې چې په لست کې ليکل شوي دي دا دي: د حضرت اسماعيل مشر زوی نبايوت، قيدار، ادبيل، مبسام،

¹⁴مشماع، دومه، مسا،

¹⁵حداد، تيما، يطور، نافيش او قدمه.

¹⁶دا د حضرت اسماعيل زامن ؤو او دا د دولسو قبيلو د مشرانو نومونه ؤو چې د هغوى د کليو او کمپونو په مطابق ؤو.

¹⁷حضرت اسماعيل پوره د يوسلو اوه دېرشو کالو په عمر وفات شو او د خپلو نيکونو سره يوځای شو.

¹⁸د هغه اولاده د شور او حويلې ترمنځ سيمه کې اوسېدله چې د مصر پولې ته نژدې د آشور په لاره پرته ده. هغوى د خپلو ټولو ورونو سره په دښمنۍ کې ژوند کاوه.

¹⁹دا د حضرت ابراهيم د زوی حضرت اسحاق اولاده ده: د حضرت ابراهيم څخه حضرت اسحاق پيدا شو.

²⁰حضرت اسحاق د څلوېښتو کالو په عمر ؤ چې د ربکا سره يې واده وکړ. هغه د ارامي بتوئيل لور وه چې د بين النهرين څخه ؤ او د لابان خور وه.

²¹حضرت اسحاق د خپلې ښځې په خاطر چې شنډه وه څښتن ته دعا وکړه. څښتن د هغه دعا قبوله کړه او د هغه ښځه ربکا اميدواره شوه.

²²مخکې له دې چې ربکا اولاد وزېږوي هغه پوه شوه چې هغه به غبرګوني وزېږوي، ځکه چې هغې دا احساس کړه چې هغوى د مور په نس کې يو د بل سره جګړه کوي. هغې وويل: ”زما سره ولې داسې کيږي؟“ نو هغې د څښتن څخه پوښتنه وکړه.

²³څښتن هغې ته وفرمايل: ”ستا د دواړو زامنو څخه به دوه رقيب قومونه جوړ شي په هغو دواړو کې به کشر قوي وي او مشر به د هغه غلام وي“

²⁴کله چې د هغې د اولاد د زېږولو وخت راورسېد، د هغې څخه غبرګوني پيدا شول.

²⁵اولنی زوی چې پيدا شو هغه سور ؤ او د هغه ټول بدن لکه د ببرې چپنې په شان ؤ، نو د هغه نوم يې عيسو * کېښود.

²⁶د هغه څخه وروسته د هغه ورور پيدا شو او هغه د عيسو پونده په خپل لاس کې کلکه نيولې وه، نو ځکه د هغه نوم يعقوب * شو. حضرت اسحاق د شپېتو کالو په عمر ؤ چې دوى پيدا شول.

²⁷هلکان لوی شول. عيسو يو ماهر ښکاري او داسې سړی ؤ چې صحرا يې خوښېدله، خو حضرت يعقوب يو آرام سړی ؤ او د کور څخه به نه ووت.

²⁸حضرت اسحاق د عيسو سره مينه کوله ځکه چې هغه د هغو حيواناتو غوښه خوړله چې عيسو ښکار کول. مګر ربکا د حضرت يعقوب سره مينه کوله.

²⁹يوه ورځ حضرت يعقوب د قورمې په پخولو باندې مشغول ؤ. عيسو د ښکار څخه راغی او ډېر وږی ؤ

³⁰او حضرت يعقوب ته يې وويل: ”زه د لوږې له لاسه مړ کېږم، د دې لوبيا له قورمې څخه لږه راکړه!“ (په دې خاطر يې په هغه باندې د ادوم * نوم هم کېښود.)

³¹حضرت يعقوب ځواب ورکړ: ”اول په ما باندې خپل د مشرتوب حق خرڅ کړه.“

³²عيسو وويل: ”ګوره، زه مړ کېږم. دا مشرتوب ماته څه ګټه رسوي؟“

³³مګر حضرت يعقوب وفرمايل: ”اول ماته قسم وخوره“، نو هغه قسم وخوړ او خپل د مشرتوب حق يې په حضرت يعقوب باندې خرڅ کړ.

³⁴بيا حضرت يعقوب عيسو ته لږه ډوډۍ او قورمه ورکړه. هغه خوراک او څښاک وکړ، پاڅېده او لاړ. نو عيسو د خپل مشرتوب حق ته په سپکه سترګه وکتل.