Read Pashto (Nangahari) — د پښتو مقدس کتاب پيدايښت 26 Bible Online

پيدايښت 26 - Pashto (Nangahari) — د پښتو مقدس کتاب bible

پيدايښت 26

¹په هغه وطن کې برسېره په هغې قحطۍ باندې چې پخوا د حضرت ابراهيم په وخت کې راغلې وه بله قحطي هم راغله. حضرت اسحاق د فلسطينيانو پادشاه ابي ملک ته چې په جرار کې ؤ ورغی.

²څښتن حضرت اسحاق ته ښکاره شو او ويې فرمايل: ”مصر ته مه ځه. په همدې وطن کې په هغه ځای کې چې زه يې درته وايم اوسېږه.

³همدلته اوسېږه. زه به ستا سره مل يم او تاته به برکت درکړم. زه به تاته او ستا اولادې ته دا ټوله سيمه درکړم او په هغې وعدې باندې به ټينګ ولاړ يم چې ستا د پلار ابراهيم سره مې کړې وه.

⁴ستا اولاده به د آسمان د ستورو په شان زياته کړم او هغوى ته به دا ټوله سيمه ورکړم. ستا د اولادې په وسيله به د ځمکې په مخ ټول قومونه برکت ومومي،

⁵ځکه چې ابراهيم زما اطاعت کړی دی او زما په ټولو حکمونو او قوانينو باندې يې عمل کړی دی.“

⁶نو حضرت اسحاق په جرار کې پاتې شو.

⁷کله چې د هغه ځای خلکو د حضرت اسحاق څخه د ربکا په باره کې پوښتنه وکړه، هغه وفرمايل: ”هغه زما خور ده.“ ځکه هغه وېرېده داسې ووايي چې هغه زما ښځه ده. هغه فکر کاوه چې د هغه ځای خلک به هغه د ربکا په خاطر ووژني، ځکه چې هغه ډېره ښکلې وه.

⁸څرنګه چې حضرت اسحاق هلته زيات وخت تېر کړ، ابي ملک د فلسطينيانو پادشاه د کړکۍ څخه لاندې وکتل او ويې ليدل چې حضرت اسحاق خپله ښځه ربکا په غېږ کې نيولې وه او هغه يې ښکلوله.

⁹نو ابي ملک حضرت اسحاق راوغوښت او ورته ويې ويل: ”هغه په رښتيا سره ستا ښځه ده! نو ولې دې وويل چې هغه ستا خور ده؟“ حضرت اسحاق ځواب ورکړ: ”ما فکر وکړ چې کېدای شي د هغې په خاطر ووژل شم.“

¹⁰ابي ملک وويل: ”دا څه دې زمونږ سره وکړل؟ کېدای شو چې زما د نفرو څخه کوم يو ستا د ښځې سره څملاستلی وای او مونږ به دې ګناهکار کړي وای.“

¹¹ابي ملک ټولو خلکو ته خبرداری ورکړ: ”که هرڅوک د دې سړي يا دې ښځې سره بده رويه وکړي هغه به ووژل شي.“

¹²حضرت اسحاق په هغې ځمکې کې فصل وکاره او په هغه کال يې چې څه کرلي ؤو د هغې څخه يې يو په سل حاصل واخيست، ځکه چې څښتن هغه ته برکت ورکړ.

¹³حضرت اسحاق ورځ په ورځ خوشبخته کېده او هغه ډېر شتمن سړی شو.

¹⁴هغه دومره زياتې رمې، پادې او غلامان درلودل چې فلسطينيانو ورباندې بخيلي کوله.

¹⁵نو هغه ټول کوهيان چې د هغه د پلار حضرت ابراهيم غلامانو د هغه د پلار په وخت کې کيندلي ؤو، فلسطينيانو هغه د خاورو څخه ډک کړل.

¹⁶نو بيا ابي ملک حضرت اسحاق ته وويل: ”ته زمونږ څخه ډېر قوي شوی يې، نو زمونږ د وطن څخه لاړ شه.“

¹⁷نو حضرت اسحاق له هغه ځای څخه لاړ او د جرار په دره کې يې خېمې ودرولې او هلته پاتې شو.

¹⁸حضرت اسحاق هغه کوهيان چې د هغه د پلار حضرت ابراهيم په وخت کې کيندل شوي ؤو او فلسطينيانو هغه د حضرت ابراهيم د وفات کېدلو څخه وروسته بند کړي ؤو بېرته وکيندل او هماغه نومونه يې ورباندې کېښودل چې پلار يې ورباندې ايښي ؤو.

¹⁹د حضرت اسحاق غلامانو په دې دره کې يو کوهی وکينده چې تازه اوبه يې درلودلې.

²⁰مګر د جرار شپانو د حضرت اسحاق د شپانو سره دعوه شروع کړه او ويې ويل: ”دا زمونږ اوبه دي!“ نو حضرت اسحاق هغه کوهی د دعوې په نوم ياد کړ.

²¹د حضرت اسحاق غلامانو بل کوهی وکينده او په هغه باندې يې هم دعوه وکړه او هغه يې د دښمنۍ په نوم ياد کړ.

²²او له هغه ځای څخه يې کډه وکړه او بل کوهی يې وکينده مګر په هغه باندې چا دعوه ونه کړه او هغه يې د پرېمانه ځای په نوم ياد کړ، ويې فرمايل: ”اوس څښتن مونږ ته ځای راکړی دی او په دې خاوره کې به خوشبخته شو.“

²³حضرت اسحاق له هغه ځايه بئرشبع ته لاړ.

²⁴په هماغه شپه څښتن هغه ته ښکاره شو او ويې فرمايل: ”زه ستا د پلار ابراهيم خدای يم. مه وېرېږه ځکه چې زه ستا سره مل يم او تاته به برکت درکړم او ستا اولاده به د خپل خدمتګار ابراهيم په خاطر زياته کړم.“

²⁵حضرت اسحاق هلته د قربانۍ ځای جوړ کړ او د څښتن عبادت يې وکړ. بيا يې په هغه ځای کې خپلې خېمې ودرولې او د هغه غلامانو هلته يو بل کوهی وکينده.

²⁶يوه ورځ ابي ملک د خپل مشاور احوزات او د خپلو لښکرو د مشر فيکول سره د جرار څخه د حضرت اسحاق د ليدلو دپاره راغی.

²⁷حضرت اسحاق د هغوى څخه پوښتنه وکړه: ”تاسو خو زما سره دښمني کوله او زه مو له خپل وطن څخه وشړلم. نو اوس ولې زما د ليدلو دپاره راغلي يئ؟“

²⁸هغوى ځواب ورکړ: ”مونږ وليدل چې څښتن په رښتيا ستا سره مل دی نو مونږ وويل چې زمونږ او ستاسو ترمنځ دې داسې يو قوي تړون وي

²⁹چې مونږ ته زيان راونه رسوئ لکه څنګه چې مونږ تاته زيان نه دی دررسولی، بلکه ستا سره مو ښه رويه کړې ده او ته مو په سلامتۍ سره لېږلى يې. اوس څښتن تاته برکت درکړی دی.“

³⁰حضرت اسحاق د هغوى دپاره مېلمستيا تياره کړه او هغوى وخوړل او وڅښل.

³¹سهار وختي هغوى پاڅېدل او يو او بل ته يې قسم ورکړ. حضرت اسحاق هغوى رخصت کړل او په سلامتۍ سره د هغه څخه لاړل.

³²په هماغه ورځ د حضرت اسحاق غلامان راغلل او هغه ته يې د هغه کوهي په باره کې خبر ورکړ چې دوى کيندلی ؤ. هغوى وويل: ”مونږ اوبه وموندلې.“

³³نو هغه يې د شبع په نوم ياد کړ. تر نن ورځې پورې هغه ښار د بئرشبع په نوم ياديږي.

³⁴کله چې عيسو څلوېښت کلن شو، د بيري حيتي د لور يوديه او د ايلون حيتي لور بسمې سره يې واده وکړ.

³⁵هغوى د حضرت اسحاق او ربکا ژوند تريخ کړ.