Read Pashto (Nangahari) — د پښتو مقدس کتاب پيدايښت 28 Bible Online

پيدايښت 28 - Pashto (Nangahari) — د پښتو مقدس کتاب bible

پيدايښت 28

¹حضرت اسحاق يعقوب راوغوښت، هغه ته يې برکت ورکړ او حکم يې ورته وکړ: ”د کنعانۍ ښځې سره واده ونه کړې.

²همدا اوس بين النهرين ته د خپل نيکه بتوئيل کور ته لاړ شه او هلته د خپل ماما لابان د لورګانو څخه خپل ځان ته ښځه وکړه.

³مطلق قادر خدای دې تاته برکت درکړي او تاته دې ډېر اولادونه درکړي ترڅو ستا څخه ډېر قومونه پيدا شي.

⁴هغه دې تا او ستا اولادې ته د حضرت ابراهيم په شان برکت درکړي او د هغې ځمکې خاوند شې چې خدای پاک حضرت ابراهيم ته ورکړې ده او ته په کې اوس د يو پردي په شان اوسېږې.“

⁵نو حضرت اسحاق يعقوب ولېږه او هغه بين النهرين ته د بتوئيل ارامي زوی د حضرت يعقوب او عيسو د مور ربکا ورور لابان ته ورغی.

⁶عيسو پوه شو چې حضرت اسحاق يعقوب ته برکت ورکړ او هغه يې بين النهرين ته ولېږه چې په هغه ځای کې ځان ته ښځه وکړي. هغه په دې هم پوه شو چې کله حضرت اسحاق هغه ته برکت ورکاوه، هغه ته يې حکم وکړ چې د کنعانۍ ښځې سره به واده نه کوي.

⁷هغه خبر شو چې حضرت يعقوب د خپل مور او پلار اطاعت وکړ او بين النهرين ته لاړ.

⁸عيسو په دې پوهېده چې د هغه پلار حضرت اسحاق کنعانۍ ښځې نه خوښوي.

⁹نو هغه د حضرت ابراهيم زوی حضرت اسماعيل ته لاړ او سره له دې چې نورې ښځې يې هم درلودلې د حضرت اسماعيل د لور محلت سره يې چې د نبايوت خور وه واده وکړ.

¹⁰حضرت يعقوب د بئرشبع څخه حران ته روان شو.

¹¹څه وخت چې نوموړی يو ځای ته ورسېده لمر پرېوتى ؤ. هغه د شپې هلته پاتې شو او يوه تيږه يې راواخيستله، د خپل سر لاندې يې کېښودله او په هغه ځای کې ويده شو.

¹²هغه په خوب کې يوه زينه وليده چې په ځمکه باندې ولاړه وه او سر يې آسمان ته رسېده او د خدای پاک فرښتې په هغې باندې ښکته او پورته تللې.

¹³څښتن د حضرت يعقوب په څنګ کې ولاړ ؤ او ويې فرمايل: ”زه څښتن يم، ستا د نيکه ابراهيم خدای او د اسحاق خدای يم. دغه ځمکه چې ته ورباندې پروت يې، تا او ستا اولادې ته به يې ورکړم.

¹⁴ستا اولاده به د خاورو د ذرو په شان زياته کړم او تاسو به د خپل هېواد لمرپرېواته، لمرخاته، شمال او جنوب خواته خپاره شئ او د دنيا ټول قومونه به ستا او ستا د اولادې په وسيله برکت مومي.

¹⁵زه به ستا سره مل يم او هرچېرته چې ځې زه به تا ساتم او بېرته به دې دې وطن ته راولم. تر هغې پورې به زه تا پرېنږدم ترڅو مې هغه ټول کارونه نه وي کړي چې تا سره مې وعده کړې وه.“

¹⁶کله چې حضرت يعقوب له خوبه راويښ شو ويې فرمايل: ”څښتن په دې ځای کې دی خو زه په دې پوه نه وم.“

¹⁷هغه ووېرېده او ويې فرمايل: ”دا څومره وېروونکى ځای دی. په رښتيا سره دا د خدای پاک کور دی او دا د آسمان دروازه ده.“

¹⁸سهار وختي حضرت يعقوب هغه تيږه چې هغه د خپل سر لاندې ايښې وه راواخيستله او د يادګار په توګه يې ودروله او د هغې په سر يې د زيتون تېل واچول.

¹⁹هغه دا ځای د بيت ئيل * په نوم ياد کړ. مګر پخوا د هغه ښار نوم لوز ؤ.

²⁰بيا حضرت يعقوب نذر کېښود ويې فرمايل: ”که چېرې خدای پاک زما سره مل وي او په دې سفر کې چې زه روان يم ما وساتي او ډوډۍ او کالي راته راکړي

²¹ترڅو په خير سره بېرته د خپل پلار کور ته ورستون شم، نو بيا به ته زما خدای يې.

²²او دغه تيږه چې ما د يادګار په توګه ودرولې ده هغه به د خدای پاک کور شي او هرڅه چې ماته يې راکوې د هغو لسمه برخه به تاته درکوم.“