Read Pashto (Nangahari) — د پښتو مقدس کتاب پيدايښت 29 Bible Online

پيدايښت 29 - Pashto (Nangahari) — د پښتو مقدس کتاب bible

پيدايښت 29

¹نو حضرت يعقوب خپل سفر ته دوام ورکړ او د مشرق د خلکو خاورې ته راغی.

²هغه په صحرا کې يو کوهی وليد چې د پسونو درې رمې يې په څنګ کې پنډې وې. له دې کوهي څخه به رمو اوبه څښلې او د کوهي خولې ته يوه لویه تيږه ايښې وه.

³څه وخت چې به ټولې رمې هلته راغونډې شوې نو شپانو به دغه تيږه د کوهي د خولې څخه لېرې کوله او رمو ته به يې اوبه ورکولې. بيا به يې تيږه بېرته د کوهي خولې ته ايښودله.

⁴حضرت يعقوب د شپانو څخه پوښتنه وکړه: ”ای زما ورونو، تاسو د کوم ځای يئ؟“ هغوى ځواب ورکړ: ”مونږ د حران يو.“

⁵هغه پوښتنه وکړه: ”تاسو د ناحور لمسی لابان پېژنئ؟“ هغوى ځواب ورکړ: ”هو، مونږ هغه پېژنو.“

⁶هغه پوښتنه وکړه: ”هغه ښه دی؟“ هغوى ځواب ورکړ: ”هغه ښه دی. وګوره، دا د هغه لور راحيل ده چې د خپلې رمې سره راروانه ده.“

⁷حضرت يعقوب وفرمايل: ”تر اوسه پورې لا لمر جګ ولاړ دی او د رمو د راغونډېدلو وخت نه دی. پسونو ته اوبه ورکړئ او هغه بېرته څړځای ته بوزئ.“

⁸هغوى وويل: ”دا کار مونږ نشو کولی. څه وخت چې ټولې رمې راغونډې شي او د کوهي د خولې څخه تيږه لېرې کړای شي، بيا به پسونو ته اوبه ورکړو.“

⁹حضرت يعقوب لا د هغوى سره خبرې کولې چې راحيل د رمې سره راغله ځکه چې هغه شپونکۍ وه.

¹⁰کله چې حضرت يعقوب راحيل وليدله چې د هغه د ماما لابان رمه ورسره وه، هغه کوهي ته ورغی او تيږه يې د کوهي د خولې څخه لېرې کړه او د لابان پسونو ته يې اوبه ورکړې.

¹¹بيا حضرت يعقوب راحيل ښکل کړه او په لوړ آواز سره يې وژړل.

¹²حضرت يعقوب راحيل ته وفرمايل: ”زه ستا د پلار د خپلوانو څخه يم او د ربکا زوی يم.“ هغه په منډه لاړه او خپل پلار يې خبر کړ.

¹³څنګه چې لابان د خپل خوريي حضرت يعقوب خبر واورېد نو په منډه د هغه ليدلو ته ورغی. هغه يې په غېږ کې ونيوه، ښکل يې کړ او خپل کور ته يې راوست. بيا هرڅه چې پېښ شوي ؤو حضرت يعقوب لابان ته بيان کړل.

¹⁴لابان هغه ته وويل: ”په رښتيا سره ته زما خپله وينه او خپل هډوکی يې.“ حضرت يعقوب پوره يوه مياشت د هغه سره پاتې شو.

¹⁵لابان حضرت يعقوب ته وويل: ”آيا په دې خاطر چې ته زما خپل يې نو ماته به وړيا خدمت کوې؟ ووايه چې ته څومره مزدوري غواړې؟“

¹⁶لابان دوه لورګانې درلودلې، د مشرې نوم ليه او د کشرې نوم راحيل ؤ.

¹⁷د ليه سترګې ښکلې وې مګر راحيل ښايسته وه او ښکلی اندام يې درلود.

¹⁸حضرت يعقوب په راحيل باندې مين شوی ؤ او ويې فرمايل: ”که چېرې خپله کشره لور ماته راکړې، نو زه به اوه کاله ستا خدمت وکړم.“

¹⁹لابان وويل: ”دا به ښه وي چې هغه تاته درکړم، نه کوم بل چاته. زما سره دلته پاتې شه.“

²⁰نو حضرت يعقوب د راحيل دپاره اوه کاله خدمت وکړ، مګر دا کلونه هغه ته لکه د ډېرو لږو ورځو په شان ښکاره شول ځکه چې هغه د راحيل سره ډېره مينه درلودله.

²¹نو حضرت يعقوب لابان ته وفرمايل: ”هغه موده پوره شوې ده، اجازه راکړه چې ستا د لور سره واده وکړم.“

²²نو لابان د هغه ځای ټول خلک راغونډ کړل او مېلمستيا يې ورکړه.

²³خو کله چې شپه شوه، هغه د راحيل په ځای ليه حضرت يعقوب ته وروستله او حضرت يعقوب د هغې سره يوځای شو.

²⁴لابان خپله وينځه زلفه خپلې لور ليه ته د نوکرې په توګه ورکړه.

²⁵کله چې سهار شو حضرت يعقوب ته معلومه شوه چې هغه ليه وه. هغه لابان ته ورغی او ويې فرمايل: ”زما سره دې ولې داسې وکړل؟ ما د دې دپاره کار کاوه چې راحيل ماته راکړې، زه دې ولې وغولولم؟“

²⁶لابان ځواب ورکړ: ”دلته زمونږ په ځای کې داسې رواج نه دی چې کشره لور د مشرې څخه مخکې واده کړي.

²⁷صبر وکړه چې د ليه د واده اوومه ورځ پوره شي بيا به راحيل هم درکړم، خو ته به اوه کاله نور هم زما خدمت کوې.“

²⁸حضرت يعقوب قبوله کړه او د ليه سره يې د واده اوومه ورځ پوره کړه او لابان خپله لور راحيل هغه ته ورکړه.

²⁹لابان خپله وينځه بلهه خپلې لور راحيل ته د نوکرې په توګه ورکړه.

³⁰حضرت يعقوب د راحيل سره هم يوځای شو. په هغه باندې د ليه څخه راحيل ډېره ګرانه وه. هغه لابان ته اوه کاله نور خدمت وکړ.

³¹کله چې څښتن وليدل چې حضرت يعقوب د ليه سره ډېره مينه نه کوي، خدای پاک هغې ته اولادونه ورکړل، مګر راحيل شنډه وه.

³²ليه اميدواره شوه او زوی يې وزېږاوه او په هغه باندې يې روبين * نوم کېښود، ځکه هغې وويل: ”څښتن زما سختي ليدلې ده. اوس به مې مېړه راسره مينه کوي.“

³³هغه بيا اميدواره شوه، زوی يې وزېږاوه او ويې ويل: ”دا ځکه چې څښتن پوهيږي چې حضرت يعقوب زما سره مينه نه کوي، نو دا يې هم راکړ.“ نو په هغه باندې يې شمعون * نوم کېښود.

³⁴هغه بيا اميدواره شوه او زوی يې وزېږاوه، ويې ويل: ”اوس به د خپل مېړه زړه ته ورنژدې شم، ځکه چې درې زامن مې ورته وزېږول.“ نو په دې خاطر يې په هغه باندې لاوي * نوم کېښود.

³⁵هغه بيا اميدواره شوه او کله چې د هغې زوی پيدا شو، هغې وويل: ”دا ځل به زه د څښتن ستاينه وکړم“، نو هغې په هغه باندې يهودا * نوم کېښود. وروسته له هغې څخه ليه د اولاد د زېږولو څخه ولويدله.