Read Pashto (Nangahari) — د پښتو مقدس کتاب پيدايښت 3 Bible Online

پيدايښت 3 - Pashto (Nangahari) — د پښتو مقدس کتاب bible

پيدايښت 3

¹د هغو ټولو وحشي حيواناتو د ډلې څخه چې څښتن خدای جوړ کړي ؤو، مار ډېر مکرجن ؤ. يوه ورځ هغه ښځې ته راغی او پوښتنه يې ورڅخه وکړه: ”آيا په رښتيا سره خدای پاک تاسو ته ويلي دي چې په باغ کې د هيڅ يوې ونې مېوه ونه خورئ؟“

²ښځې ځواب ورکړ: ”خدای پاک فرمايلي دي چې مونږ کولی شو د باغ د ټولو ونو د مېوو څخه وخورو،

³بې له هغې ونې څخه چې د باغ په منځ کې ده. هغه مونږ ته فرمايلي دي چې د هغې ونې مېوه مه خورئ حتیٰ هغې ته لاس هم مه وروړئ، که داسې مو وکړل نو تاسو به مړه شئ.“

⁴مار ښځې ته وويل: ”ډاډه اوسئ تاسو به مړه نشئ.

⁵خدای پاک پوهيږي چې که چېرې تاسو د دې ونې مېوه وخورئ نو ستاسو سترګې به خلاصې شي او تاسو به د خدای پاک په شان شئ او په ښو او بدو شيانو باندې به پوه شئ.“

⁶ښځې ونې ته په ځير وکتل او هغه ونه د هغې په نظر کې ښکلې او مېوه يې خوندوره ښکاره شوه، فکر يې وکړ چې دا ونه به د پوهې د حاصلولو دپاره څومره ښه وي. نو هغه مېوه يې راواخيستله او ويې وخوړله او خپل مېړه ته يې چې د هغې سره ؤ هم ورکړه او هغه هم وخوړله.

⁷په هماغه وخت کې د هغوى سترګې وغړېدلې او پوه شول چې لوڅ دي نو د انځر پاڼې يې يو تر بله سره وګنډلې او ځانونه يې ورباندې پټ کړل.

⁸مازديګر کله چې باد لګېده، حضرت آدم او د هغه ښځې د څښتن خدای د قدمونو آواز واورېد چې په باغ کې ګرځېده. هغوى ووېرېدل او ځانونه يې د ونو ترشا پټ کړل.

⁹څښتن خدای په حضرت آدم باندې غږ وکړ: ”ته چېرته يې؟“

¹⁰هغه ځواب ورکړ: ”په باغ کې مې ستا د قدمونو آواز واورېد، ووېرېدم او خپل ځان مې پټ کړ ځکه چې لوڅ وم.“

¹¹خدای پاک ورڅخه پوښتنه وکړه: ”تاته چا وويل چې لوڅ يې؟ آيا د هغې ونې مېوه دې خوړلې ده چې ما درته ويلي ؤو چې هغه مه خوره؟“

¹²حضرت آدم وفرمايل: ”هغې ښځې چې تا ماته راکړې ده، دا مېوه راکړه او ما وخوړله.“

¹³نو څښتن خدای د ښځې څخه پوښتنه وکړه: ”تا څه وکړل؟“ ښځې ځواب ورکړ: ”مار زه وغولولم او ما هغه مېوه وخوړله.“

¹⁴نو څښتن خدای مار ته وويل: ”په دې سبب چې تا دا کار کړی دی ته به د نورو ټولو کورني او وحشي حيواناتو څخه زيات لعنتي يې! ټول عمر به په سينه باندې ښوئېږې او خاورې به خورې.

¹⁵زه به داسې وکړم چې ته او دا ښځه به د يو بل څخه کرکه کوئ. ستا د نسل او د ښځې د نسل ترمنځ به همېشه دښمني وي. هغه به ستا سر ټکوي او ته به د هغه پونده چيچې.“

¹⁶څښتن خدای ښځې ته وفرمايل: ”د اوﻻد د زېږولو په وخت کې به ستا دردونه زيات کړم، خو ته به د مېړه شوق کوې او هغه به په تا باندې حکم چلوي.“

¹⁷څښتن حضرت آدم ته وفرمايل: ”دا چې تا د خپلې ښځې خبره اورېدلې ده او د هغې ونې مېوه دې وخوړله چې ما درته ويلي ؤو چې هغه ونه خورې، نو دا ځمکه ستا په سبب لعنتي شوه او ته به ټول عمر د هغې څخه په ډېر زحمت سره خوراک ﻻس ته راوړې.

¹⁸ځمکه به هرزه بوټي او اغزي راشنه کوي او ته به ځنګلي بوټي خورې.

¹⁹د خپل تندي په خولو باندې به خواړه خورې، تر هغه وخته پورې چې بېرته هغې خاورې ته وروګرځې د کومې څخه چې جوړ شوی يې، ځکه چې ته خاوره يې او بېرته به خاورې ته ورګرځې.“

²⁰حضرت آدم په خپلې ښځې باندې حوا * نوم کېښود ځکه چې هغه به د ټولو انسانانو مور وي.

²¹څښتن خدای د حضرت آدم او د هغه د ښځې دپاره د حيوان د پوستکي څخه کالي جوړ کړل او هغوى ته يې ورواغوستل.

²²څښتن خدای وفرمايل: ”اوس چې آدم زمونږ په شان شو چې ښه او بد پېژني بايد دا اجازه ورنه کړای شي چې د ژوندانه د ونې څخه مېوه وخوري او تر آبده پورې ژوندی پاتې شي.“

²³نو څښتن خدای دوى د عدن د باغ څخه وشړل چې ﻻړ شي او په هغې ځمکې باندې کار وکړي چې د هغې د خاورې څخه حضرت آدم جوړ شوی ؤ.

²⁴حضرت آدم يې وشاړه او د عدن د باغ لمرخاته خواته د ننوتلو په دروازه کې يې کيروبيان * او هغه اور لرونکې توره چې هرې خواته به تاوېدله، ودرول ترڅو څوک ونشي کولى چې د ژوندانه ونې ته ورنژدې شي.