Read Pashto (Nangahari) — د پښتو مقدس کتاب پيدايښت 30 Bible Online

پيدايښت 30 - Pashto (Nangahari) — د پښتو مقدس کتاب bible

پيدايښت 30

¹کله چې راحيل وليدل چې د دې څخه د حضرت يعقوب هيڅ اولاد پيدا نشو، نو په خپلې خور باندې يې بخيلي وکړه او حضرت يعقوب ته يې وويل: ”ماته اولاد راکړه او که نه، نو زه به مړه شم.“

²حضرت يعقوب په راحيل باندې په قهر شو او ويې فرمايل: ”زه خو خدای نه يم چې ته يې د اولاد راوړلو څخه بې برخې کړې يې.“

³نو هغې وويل: ”دا زما وينځه بلهه ده. د هغې سره يوځای شه ترڅو هغه زما دپاره اولاد وزېږوي. په دې ډول به زه هم وکولی شم چې د هغې په وسيله مور شم.“

⁴نو خپله وينځه بلهه يې ورکړه چې د هغه ښځه شي او حضرت يعقوب د هغې سره يوځای شو.

⁵بلهه اميدواره شوه او حضرت يعقوب ته يې زوی وزېږاوه.

⁶نو راحيل وويل: ”خدای پاک زما په حق کې انصاف وکړ، هغه زما دعا قبوله کړه او ماته يې زوی راکړ.“ په دې خاطر يې په هغه باندې دان * نوم کېښود.

⁷بلهه د راحيل وينځه بيا اميدواره شوه او د هغې څخه د حضرت يعقوب دوهم زوی پيدا شو.

⁸راحيل وويل: ”د خپلې خور سره مې شخړه وکړه او زه بريالۍ شوم“، نو ځکه يې په هغه باندې نفتالي * نوم کېښود.

⁹کله چې ليه پوه شوه چې د اولاد راوړلو څخه ولويدله، خپله وينځه زلفه يې حضرت يعقوب ته ورکړه چې د هغه ښځه شي.

¹⁰د ليه د وينځې زلفې څخه د حضرت يعقوب زوی پيدا شو.

¹¹ليه وويل: ”زه بختوره يم“، نو ځکه يې په هغه باندې جاد * نوم کېښود.

¹²د ليه د وينځې زلفې څخه د حضرت يعقوب بل زوی پيدا شو.

¹³ليه وويل: ”زه څومره خوشاله يم! ټولې ښځې به وايي چې زه څومره خوشاله يم.“ په هغه باندې يې اشير * نوم کېښود.

¹⁴د غنمو د لو کولو په وخت کې روبين پټيو ته لاړ او مڼه غونې يې وموندلې. هغه يې خپلې مور ليه ته راوړلې. راحيل ليه ته وويل: ”د خپل زوی د مڼه غونو څخه يو څه ماته راکړه.“

¹⁵مګر ليه هغې ته ځواب ورکړ: ”آيا دا دې بس نه دی چې مېړه دې راڅخه واخيست؟ اوس غواړې چې زما د زوی مڼه غونې هم راڅخه واخلې؟“ راحيل وويل: ”ډېر ښه. هغه به نن شپه ستا د زوی د مڼه غونو په بدل کې ستا سره څملي.“

¹⁶نو کله چې ماښام حضرت يعقوب د پټيو څخه راغی، ليه د هغه مخې ته ورووتله. هغه ته يې وويل: ”ته بايد نن شپه زما سره څملې، ځکه چې د خپل زوی د مڼه غونو په بدل کې مې اخيستی يې.“ نو حضرت يعقوب په هغه شپه له ليه سره څملاست.

¹⁷خدای پاک د ليه دعا قبوله کړه او هغه اميدواره شوه او د هغې څخه د حضرت يعقوب پنځم زوی پيدا شو.

¹⁸ليه وويل: ”په دې خاطر چې ما خپله وينځه خپل مېړه ته ورکړه، خدای پاک ماته اجر راکړ.“ نو په هغه باندې يې يساکار * نوم کېښود.

¹⁹ليه بيا اميدواره شوه او حضرت يعقوب ته يې شپږم زوی وزېږاوه.

²⁰هغې وويل: ”خدای پاک ماته ښه قيمتي سوغات راکړ. اوس به مې مېړه عزت کوي، ځکه چې شپږ زامن مې ورته زېږولي دي.“ نو په هغه باندې يې زبولون * نوم کېښود.

²¹وروسته له هغه يې لور پيدا شوه او په هغې يې دينه نوم کېښود.

²²بيا خدای پاک راحيل راياده کړه، د هغې دعا يې قبوله کړه او هغې ته يې اولاد ورکړ.

²³هغه اميدواره شوه او زوی يې وزېږاوه. هغې وويل: ”خدای پاک زما رسوايي لېرې کړه.“

²⁴نو په هغه باندې يې يوسف * نوم کېښود او ويې ويل: ”څښتن دې بل زوی راته راکړي.“

²⁵وروسته له هغې چې راحيل حضرت يوسف وزېږاوه، حضرت يعقوب لابان ته وفرمايل: ”ما رخصت کړه چې بېرته خپل وطن ته لاړ شم.

²⁶زما ښځې او زما اولادونه چې د هغوى دپاره مې ستا خدمت کړی دی ماته راکړه چې لاړ شم، ځکه ته پوهېږې چې څومره کار مې درته کړی دی.“

²⁷مګر لابان هغه ته وويل: ”که ته زما څخه خوشاله يې، مهرباني وکړه پاتې شه. زه د فال په وسيله پوه شوم چې څښتن ستا په خاطر ماته برکت راکړی دی.

²⁸خپله مزدوري دې ووايه، زه به يې درکړم.“

²⁹حضرت يعقوب هغه ته وفرمايل: ”ته پوهېږې چې څنګه مې درته کار کړی دی او څنګه مې ستا رمې او پادې ساتلې دي.

³⁰زما د راتلو څخه مخکې تا لږ څه درلودل، خو کوم کارونه چې ما ستا دپاره کړي دي څښتن په هغو کې برکت اچولی دی او ستا شتمني ډېره زياته شوې ده. اوس د دې وخت رارسېدلی چې د خپلې کورنۍ دپاره يو څه وکړم.“

³¹لابان پوښتنه وکړه: ”تاته څه درکړم؟“ حضرت يعقوب ځواب ورکړ: ”ماته هيڅ شی مه راکوه. که دا کار زما دپاره وکړې زه به ستا د رمو ساتلو او روزلو ته دوام ورکړم.

³²اجازه راکړه چې نن ستا د ټولو رمو په منځ کې وګرځم او د مېږو څخه هره يوه خالداره مېږه او هر توربخن وری او د وزو څخه هره خالداره وزه جدا کړم، نو دا به زما مزدوري وي.

³³کله چې راشې او هغه مزدوري چې ماته يې راکوې وګورې نو په آسانۍ سره به درته معلومه شي چې زه صادق يم. که چېرې زما سره کومه وزه چې خالداره نه وي يا يو وری چې توربخن نه وي، نو ته به پوه شې چې هغه غلا شوی دی.“

³⁴لابان وويل: ”زما خوښه ده، لکه څنګه چې تا وويل همداسې دې وي.“

³⁵په هماغه ورځ لابان ټول خطداره او خالداره وزان او ټولې برګې او خالداره وزې يا هغه وزې چې سپين رنګ يې درلود او ټول توربخن وري بېل کړل او هغه يې خپلو زامنو ته وسپارل.

³⁶بيا لابان د خپلې رمې سره د حضرت يعقوب څخه د درې ورځو په فاصله لېرې لاړ او حضرت يعقوب د لابان پاتې رمې ساتلې.

³⁷حضرت يعقوب د چنار، بادام او سپېدار شنې څانګې راواخيستلې او د هغوى څخه يې پوستکي لېرې کړل او سپينې سپينې ليکې په کې راښکاره شوې.

³⁸نو هغه دا سپينې شوې څانګې د رمو په مخامخ د هغوى د اوبو په اخورونو کې کېښودلې، ځکه چې کله به رمې د اوبو څښلو دپاره راتللې نو يو د بل سره به جوړه کېدلې.

³⁹او د څانګو په مخ کې به يو د بله سره يوځای کېدلې او خطداره يا برګ او خالداره بچي به يې زېږول.

⁴⁰حضرت يعقوب پسونه او مېږې د وزو څخه جدا کړل او د هغو مخونه يې د لابان د رمو خطدارو او توربخنو حيواناتو خواته کړل. نو په دې ډول هغه د خپلو رمو خاوند شو او هغه يې د لابان د رمو څخه جدا کړلې.

⁴¹نو کله به چې قوي ښځينه حيوانات د نرو حيواناتو سره يوځای کېدل نو حضرت يعقوب به د اوبو په اخورونو کې د حيواناتو مخې ته هغه څانګې ايښودلې چې د څانګو په منځ کې يو د بله سره يوځای شي.

⁴²خو که حيوانات به کمزوري ؤو نو څانګې به يې هلته نه ايښودلې. نو کمزورې به د لابان او قوي به د حضرت يعقوب شول.

⁴³په دې ډول حضرت يعقوب ډېر شتمن شو او د ډېرو رمو، وينځو، غلامانو، اوښانو او خرو خاوند شو.