Read Pashto (Nangahari) — د پښتو مقدس کتاب پيدايښت 32 Bible Online

پيدايښت 32 - Pashto (Nangahari) — د پښتو مقدس کتاب bible

پيدايښت 32

¹حضرت يعقوب هم په خپله مخه لاړ او د خدای پاک فرښتې ورسره مخامخ شوې.

²کله چې حضرت يعقوب هغوى وليدلې ويې فرمايل: ”دا د خدای پاک کمپ دی.“ نو د هغه ځای نوم يې محنايم * کېښود.

³حضرت يعقوب د ځان څخه مخکې خپل ورور عيسو ته د ادوم خاورې ته استازي ولېږل.

⁴هغوى ته يې وفرمايل: ”زما بادار عيسو ته ووايئ چې ستا غلام يعقوب داسې وايي: زه د لابان سره اوسېدم او تر اوسه پورې هلته پاتې وم.

⁵زه د پادو، خرو، پسونو، وزو، غلامانو او وينځو خاوند شوی يم. اوس مې خپل بادار ته دغه پيغام ولېږه چې په ما باندې مهرباني وکړې.“

⁶کله چې استازي بېرته حضرت يعقوب ته راستانه شول، هغوى وويل: ”ستا ورور عيسو ته لاړو او هغه د څلورسوه نفرو سره ستا د ليدلو دپاره راروان دی.“

⁷نو حضرت يعقوب ډېر ووېرېد او پرېشانه شو. هغه خپل خلک او رمې، پادې او اوښان په دوه ډلو باندې ووېشل.

⁸هغه فکر وکړ: ”که چېرې عيسو په اولنۍ ډلې باندې حمله وکړي، نو بله ډله به وکولی شي چې وتښتي.“

⁹بيا حضرت يعقوب دعا وکړه: ”ای زما د پلار حضرت ابراهيم خدايه او زما د پلار حضرت اسحاق خدايه، ای څښتنه چې ماته دې وفرمايل: خپل وطن او خپلو خپلوانو ته بېرته لاړ شه، زه به تا خوشبخته کړم.

¹⁰زه د هغو ټولو مهربانيو او وفاداريو وړ نه يم چې د خپل غلام سره دې کړي دي. کله چې زه د اردن د سيند څخه تېرېدم، نو زما سره يوازې يوه امسا وه. او اوس زه د دوو لويو ډلو خاوند يم.

¹¹اوس تاته سوال کوم چې ما د خپل ورور عيسو له لاسه وژغوره، ځکه زه وېرېږم چې هغه به راشي او په مونږ به حمله وکړي او مونږ به له ښځو او ماشومانو سره له منځه يوسي.

¹²بلکه هغه وعده راياده کړه چې تا زما سره کړې وه چې ما سره به ښه کوې او زما اولاده به د درياب د شګو په شان داسې زياتوې چې ونه شمېرل شي.“

¹³هغه هلته شپه تېره کړه او هرڅه چې يې درلودل د هغو څخه يې د خپل ورور عيسو دپاره سوغات انتخاب کړ:

¹⁴دوه سوه وزې او شل وزان، دوه سوه مېږې او شل پسونه،

¹⁵دېرش اوښې د هغو د بچيو سره، څلوېښت غواګانې او لس غوايان، شل خرې او لس خره.

¹⁶هغوى يې په دوه ډلو ووېشل او خپلو غلامانو ته يې وسپارل او هغوى ته يې وفرمايل: ”زما څخه مخکې ځئ او د ډلو ترمنځ فاصله پرېږدئ.“

¹⁷حضرت يعقوب هغه غلام ته چې مخکې روان ؤ، حکم وکړ: ”څه وخت چې زما ورور عيسو ستا سره مخامخ شي او پوښتنه وکړي چې ستاسو بادار څوک دی؟ تاسو چېرې ځئ؟ او ستاسو په مخکې دا حيوانات د چا دي؟

¹⁸بايد ووايې: دا ستا د غلام يعقوب دي او هغه يې د سوغات په توګه خپل بادار عيسو دپاره لېږلي دي او په خپله يعقوب هم زمونږ پسې راروان دی.“

¹⁹همدارنګه هغه دوهم، دريم او ټولو پادوانانو ته امر وکړ: ”څه وخت چې د عيسو سره مخامخ شئ، نو همداسې به ورته وايئ.

²⁰خامخا ووايئ چې ستا غلام يعقوب زمونږ پسې راروان دی.“ ځکه هغه فکر کاوه چې د دې سوغاتونو په وسيله به چې مخکې مې لېږلي دي د هغه قهر سوړ کړم او چې کله د هغه سره مخامخ شم کېدای شي چې هغه ما وبخښي.

²¹نو د حضرت يعقوب سوغاتونه له هغه څخه مخکې لاړل خو هغه شپه په کمپ کې تېره کړه.

²²په هماغه شپه حضرت يعقوب پاڅېد او خپلې دوه ښځې، دوه وينځې او خپل يوولس زامن يې واخيستل او د يبوق د سيند په ګودر باندې پورې وتل.

²³وروسته له دې چې هغوى يې د سيند څخه پورې ويستل، هغه خپل مال او شتمني هم ولېږله.

²⁴نو حضرت يعقوب يوازې پاتې شو او يو نفر راغی او د هغه سره يې د سهار تر رڼايۍ پورې غېږه ونيوله.

²⁵نو کله چې هغه نفر وليدل چې په حضرت يعقوب باندې بری نشي موندلی، نو د حضرت يعقوب په ورون باندې يې ګوزار وکړ او د هغه ورون له بنده وخوت.

²⁶نو بيا هغه سړي وويل: ”ما پرېږده چې لاړ شم ځکه چې لمر په راختلو دی.“ ليکن حضرت يعقوب ځواب ورکړ: ”ترڅو چې ماته برکت رانه کړې تا نه پرېږدم چې لاړ شې.“

²⁷هغه نفر د هغه څخه پوښتنه وکړه: ”ستا نوم څه دی؟“ هغه ځواب ورکړ: ”يعقوب.“

²⁸هغه نفر وويل: ”له دې وروسته به نور ستا نوم يعقوب نه وي، بلکه اسرائيل * به وي، ځکه چې تا د خدای او انسان سره غېږه ونيوله او بريالی شوې.“

²⁹حضرت يعقوب وفرمايل: ”خپل نوم دې ماته ووايه.“ مګر هغه ځواب ورکړ: ”ولې زما د نوم پوښتنه کوې؟“ نو په هغه ځای کې يې حضرت يعقوب ته برکت ورکړ.

³⁰نو حضرت يعقوب وفرمايل: ”خدای پاک مې مخامخ وليد او لا تر اوسه هم ژوندی پاتې يم.“ نو حضرت يعقوب هغه ځای د فنيئيل * په نوم ياد کړ.

³¹د لمرخاته په وخت کې هغه د فنيئيل څخه تېر شو او د خپل ورانه په سبب يې ګوډ، ګوډ تګ کاوه.

³²په همدې خاطر اسرائيليان تر نن ورځې پورې هغه پله چې د ورون د بنده پورې نښتې ده نه خوري، ځکه چې د حضرت يعقوب د ورانه همدې برخې ګوزار خوړلی ؤ.