Read Pashto (Nangahari) — د پښتو مقدس کتاب پيدايښت 36 Bible Online

پيدايښت 36 - Pashto (Nangahari) — د پښتو مقدس کتاب bible

پيدايښت 36

¹دا د عيسو اولاده ده (عيسو د ادوم په نوم هم يادېده.)

²عيسو د کنعاني ښځو سره وادونه وکړل: عاده د حيتي ايلون لور، اهوليبامه چې د عنا لور او د حوي صبعون لمسۍ وه

³او بسمه چې د حضرت اسماعيل لور او د نبايوت خور وه.

⁴عاده اليفاز او بسمې رعوئيل وزېږاوه.

⁵اهوليبامه يعوش، يعلام او قورح وزېږول. دا د عيسو زامن ؤو چې په کنعان کې زېږېدلي ؤو.

⁶عيسو خپلې ښځې، زامن، لورګانې او د خپلې کورنۍ ټول خلک او همدارنګه خپلې ټولې رمې او پادې او خپله ټوله شتمني چې په کنعان کې يې لاس ته راوړي ؤو واخيستل او د خپل ورور حضرت يعقوب څخه لږ څه لېرې يې بلې سيمې ته کډه وکړه.

⁷هغه لاړ ځکه هغه ځمکه چې حضرت يعقوب او هغه په کې اوسېدل دومره پراخه نه وه چې دواړه سره يوځای واوسيږي، په دې خاطر چې هغوى زياتې رمې او پادې درلودلې.

⁸نو عيسو د ادوم په غرنۍ سيمه کې اوسېده.

⁹دا د ادوم په غرنۍ سيمه کې د ادوميانو د نيکه عيسو اولاده ده.

¹⁰د عيسو د زامنو نومونه دا دي: اليفاز د عيسو د ښځې عاده زوی او رعوئيل د عيسو د ښځې بسمې زوی.

¹¹د اليفاز زامن: تيمان، اومار، صفو، جعتام او قناز.

¹²تمناع د عيسو د زوی اليفاز وينځه وه او د هغې څخه د هغه زوی عماليق پيدا شو. دا د عيسو د ښځې عادې لمسيان ؤو.

¹³د رعوئيل زامن: نحت، زارح، شمه او مزه. دا د عيسو د ښځې بسمې لمسيان ؤو.

¹⁴اهوليبامه د عنا لور او د صبعون لمسۍ وه چې د هغې څخه د عيسو زامن يعوش، يعلام او قورح پيدا شول.

¹⁵د عيسو په اولادې کې دغه قبيلوي مشران ؤو: د عيسو د مشر زوی اليفاز زامن: تيمان، اومار، صفو، قناز،

¹⁶قورح، جعتام او عماليق. دا په ادوم کې هغه قبيلوي مشران ؤو چې د اليفاز د اولادې څخه دي او دوى د عادې لمسيان ؤو.

¹⁷د عيسو د زوی رعوئيل زامن: نحت، زارح، شمه او مزه. دا په ادوم کې هغه قبيلوي مشران ؤو چې د رعوئيل د اولادې څخه دي. دا د عيسو د ښځې بسمې لمسيان ؤو.

¹⁸د عيسو د ښځې اهوليبامه زامن: يعوش، يعلام او قورح. دا هغه قبيلوي مشران ؤو چې د عنا د لور يعنې د عيسو د ښځې اهوليبامه د اولادې څخه دي.

¹⁹دا ټولې قبيلې د عيسو د اولادې څخه وې.

²⁰دا د سعير حوري زامن ؤو چې په هغې سيمه کې اوسېدل: لوطان، شوبال، صبعون، عنا،

²¹ديشون، ايصر او ديشان. دا په ادوم کې د سعير زامن او د حوريانو مشران ؤو.

²²د لوطان زامن: حوري او هومام. (تمناع د لوطان خور وه.)

²³د شوبال زامن: علوان، مناحت، عيبال، شفو او اونام.

²⁴د صبعون زامن: ايه او عنا. (دا هماغه عنا دی، کله چې هغه د خپل پلار صبعون خره څرول، نو په دښته کې يې د تودو اوبو چينې وموندلې.)

²⁵د عنا اولادونه: ديشون او اهوليبامه د عنا لور.

²⁶د ديشون زامن: حمدان، اشبان، يتران او کران.

²⁷د ايصر زامن: بلهان، زعوان او عقان.

²⁸د ديشان زامن: عوص او اران.

²⁹دا د حوريانو مشران ؤو: لوطان، شوبال، صبعون، عنا،

³⁰ديشون، ايصر او ديشان. دا د حوريانو قبيلې وې چې د ادوم په خاوره کې اوسېدلې.

³¹۳۱‏-۳۹ له دې څخه مخکې چا په اسرائيلو باندې پادشاهي نه وه کړې چې دغو پادشاهانو د ادوم په هېواد باندې پادشاهي وکړه: بالع د بعور زوی چې د دينهابه څخه ؤ. يوباب د زارح زوی چې د بصرې څخه ؤ. حوشام چې د تيمان د هېواد څخه ؤ. حداد د بداد زوی چې د عويت څخه ؤ (هغه مديانيانو ته د موآب په خاوره کې په جګړه کې ماتې ورکړه.) سمله چې د مسريقه څخه ؤ. شائول چې د رحوبوت د ښار څخه ؤ او دا ښار د سيند په غاړه پروت دی. بعل حانان چې د عکبور زوی ؤ. حداد چې د فاعو څخه ؤ. (د هغه د ښځې نوم مهيطبئيل ؤ چې د مطرد لور وه او د ميذهب لمسۍ وه.)

⁴⁰۴۰‏-۴۳ دا د هغو قبيلوي مشرانو نومونه دي چې د عيسو د اولادې څخه دي: تمناع، علوه، يتيت، اهوليبامه، ايله، فينون، قناز، تيمان، مبصار، مجديئيل او عيرام. هغه سيمه چې دا هره قبيله په کې اوسېدله، د هماغې قبيلې په نوم يادېدله.