Read Pashto (Nangahari) — د پښتو مقدس کتاب پيدايښت 39 Bible Online

پيدايښت 39 - Pashto (Nangahari) — د پښتو مقدس کتاب bible

پيدايښت 39

¹اسماعيليانو حضرت يوسف مصر ته يووړ او په فوطيفار باندې يې خرڅ کړ چې نوموړی د فرعون د درباريانو څخه ؤ او د دربار د ګارډ قوماندان ؤ.

²څښتن د حضرت يوسف سره مل ؤ او هغه يې بريالی کړ. هغه د خپل مصري بادار په کور کې اوسېده.

³بادار يې وليدل چې څښتن د حضرت يوسف سره مل دی او په هر کار کې هغه ته بری ورکوي.

⁴فوطيفار د هغه څخه خوشاله ؤ او هغه يې خپل شخصي نوکر ونيوه او هرڅه چې يې خپل کور کې درلودل، ټول يې هغه ته وسپارل.

⁵د هماغه وخت څخه څښتن د حضرت يوسف له سببه د دې مصري خاندان ته برکت ورکړ او د هغه په ټولو شيانو باندې که د هغه په کور کې ؤو او که د هغه ځمکه وه، د څښتن برکت ؤ.

⁶فوطيفار چې هرڅه درلودل هغه يې حضرت يوسف ته وسپارل چې څارنه يې وکړي. هغه له خوراک څخه پرته نور د هيڅ شي سره کار نه درلود. حضرت يوسف ډېر ښايسته ؤ او ښکلی اندام يې درلود.

⁷څه موده وروسته د حضرت يوسف سره د فوطيفار د ښځې مينه پيدا شوه او ورته ويې ويل: ”راشه، زما سره څمله.“

⁸مګر هغه انکار وکړ او هغې ته يې وفرمايل: ”ګوره، هرڅه چې زما د بادار په کور کې دي د هغو په باره کې هغه اندېښنه نه لري، ځکه چې زه دلته يم. هرڅه چې هغه يې لري ماته يې راسپارلي دي.

⁹زه په دې کور کې داسې اختيار لرم لکه څنګه چې هغه يې لري او زما بادار پرته له ستا چې د هغه ښځه يې، نور هيڅ شی زما څخه نه دی سپمولی. نو بيا زه څنګه کولی شم چې داسې بد کار وکړم او د خدای پاک په مقابل کې ګناه وکړم؟“

¹⁰که څه هم هغې به هره ورځ حضرت يوسف ته خبرې کولې، خو هغه له دې څخه انکار کاوه چې د هغې سره څملي او يا دې ورنژدې شي.

¹¹مګر يوه ورځ کله چې حضرت يوسف کور ته ننوت چې خپل کار وکړي، د کور د نوکرانو له جملې څخه هلته هيڅ څوک نه ؤ.

¹²هغې حضرت يوسف له چپنې څخه ونيوه او ورته ويې ويل: ”زما سره څمله.“ مګر هغه خپله چپنه د هغې په لاس کې پرېښودله او د کور څخه دباندې وتښتېد.

¹³کله چې هغې وليدل چې هغه خپله چپنه د هغې په لاس کې پرېښودله او د کور څخه وتښتېد،

¹⁴نو د خپل کور نوکرانو ته يې غږ وکړ او ويې ويل: ”ګورئ! دغه عبرانی سړی زما مېړه کور ته راوستی دی چې زمونږ بې عزتي وکړي. هغه زما کوټې ته راننوت چې ما بې عزته کړي، مګر ما په لوړ آواز سره چيغې ووهلې.

¹⁵کله چې هغه زما چيغې واورېدلې، هغه وتښتېد او خپله چپنه يې زما سره پرېښودله.“

¹⁶هغې د حضرت يوسف چپنه د ځان سره وساتله تر هغې پورې چې مېړه يې کور ته راغی.

¹⁷بيا هغې فوطيفار ته دا قصه بيان کړه: ”هغه عبرانی غلام چې مونږ ته دې راوستی دی، زما کوټې ته راننوت چې ما بې عزته کړي.

¹⁸مګر څنګه چې ما د مرستې دپاره چيغې ووهلې، خپله چپنه يې زما سره پرېښودله او د کور څخه وتښتېد.“

¹⁹کله چې د حضرت يوسف بادار دغه قصه واورېدله چې د هغه ښځې ورته بيان کړه، هغه د قهره سور شو.

²⁰د حضرت يوسف بادار هغه ونيوه او په هغه زندان کې يې واچاوه چې د پادشاه بنديان به په کې ساتل کېدل او هغه هلته پاتې شو.

²¹مګر څښتن د حضرت يوسف سره مل ؤ. هغه ته يې برکت ورکړ، نو د زندان رئيس د هغه څخه خوشاله ؤ.

²²هغه حضرت يوسف د نورو ټولو بنديانو مشر کړ او هغه ته يې د هغو ټولو کارونو مسئوليت ور په غاړه کړ چې په زندان کې به کېدل.

²³د زندان رئيس د هغه څه په هکله چې حضرت يوسف ته سپارل شوي ؤو اندېښنه نه درلودله، ځکه چې څښتن د حضرت يوسف سره مل ؤ او کوم کارونه چې هغه کول څښتن ورته په هغو ټولو کې بری ورکاوه.