Read Pashto (Nangahari) — د پښتو مقدس کتاب پيدايښت 4 Bible Online

پيدايښت 4 - Pashto (Nangahari) — د پښتو مقدس کتاب bible

پيدايښت 4

¹حضرت آدم د بي بي حوا سره يوځای شو او بي بي حوا اميدواره شوه او زوی يې پيدا شو. بي بي حوا وفرمايل: ”زه به په هغه باندې قائن * نوم ږدم ځکه چې هغه مې د څښتن په مرسته راوړ.“

²وروسته بيا هغې بل زوی هابيل وزېږاوه. هابيل شپون شو، خو قائن زميندار شو.

³لږه موده وروسته قائن د خپلې ځمکې د حاصلاتو يوه برخه د څښتن حضور ته نذرانه وړاندې کړه.

⁴او هابيل هم خپل اولنی پيدا شوی وری قرباني کړ او ډېره ښه حصه يې د څښتن حضور ته نذرانه وړاندې کړه. څښتن هابيل او د هغه نذرانه قبوله کړه.

⁵خو قائن او د هغه نذرانه يې قبوله نه کړه، نو قائن ډېر په قهر شو او خپل سر يې ښکته واچاوه.

⁶څښتن قائن ته وفرمايل: ”ته ولې په قهر شوې؟ او ولې دې خپل سر ښکته اچولی دی؟

⁷که ښه کار دې کړی وای، آيا قبول شوی به نه وای؟ مګر ښه دې نه دي کړي. اوس ګناه د دې موقعې په لټه کې ده چې په تا باندې حمله وکړي، هغه غواړي چې حکم درباندې وچلوي مګر ته بايد په هغې باندې غالب شې.“

⁸قائن خپل ورور هابيل ته وويل: ”راځه چې پټي ته لاړ شو.“ هغه وخت چې دوى په پټي کې ؤو قائن په خپل ورور هابيل باندې حمله وکړه او ويې واژه.

⁹بيا څښتن د قائن څخه پوښتنه وکړه: ”ستا ورور هابيل چېرته دی؟“ هغه ځواب ورکړ: ”زه څه خبر يم؟ آيا زه د خپل ورور ساتونکی يم؟“

¹⁰بيا څښتن وفرمايل: ”تا څه وکړل؟ خپل ورور دې وواژه او د هغه وينه په ځمکه باندې تويه شوه. اوس ستا د ورور وينه ماته فرياد کوي چې تاته سزا درکړم.

¹¹زه به په تا باندې لعنت ووايم، ځکه چې تا هابيل وواژه او د هغه وينه دې په ځمکه باندې توی کړه. ته به هيڅکله په دې ځمکه باندې کښت ونه کړې.

¹²که ته په دې ځمکه باندې خواري وکړې، هغه به ستا دپاره هيڅ حاصل درنکړي. ته به بې کوره يې او خپل پاتې عمر به يو ځای او بل ځای په پرېشانۍ او سرګردانۍ کې تېروې.“

¹³قائن وويل: ”ته ماته داسې سخته سزا راکوې چې زه يې د زغملو توان نه لرم.

¹⁴ما نن د دې خاورې څخه شړې، چې خپل کور پرېږدم او ستا د حضور څخه لېرې لاړ شم. زه به بې کوره پرېشانه او سرګردانه ګرځم او هرڅوک چې ما پيدا کړي نو وبه مې وژني.“

¹⁵څښتن ځواب ورکړ: ”نه! که څوک تا ووژني زه به هغه ته اوه وارې سزا ورکړم.“ نو څښتن په قائن باندې يوه نښه کېښودله چې دا به د هغه چا دپاره خبرداری وي څوک چې وغواړي قائن ووژني.

¹⁶قائن د خدای پاک د حضور څخه ﻻړ. هغه په نود (يعنې سرګردانۍ) نومي ځای کې چې د عدن لمرخاته خواته پروت ؤ ژوند اختيار کړ.

¹⁷قائن د خپلې ښځې سره يوځای شو او زوی يې پيدا شو او په هغه باندې يې خنوخ نوم کېښود. هغه يو ښار جوړ کړ او د خپل زوی خنوخ نوم يې ورباندې کېښود.

¹⁸د خنوخ څخه عيراد پيدا شو او د عيراد څخه محويائيل پيدا شو، د محويائيل څخه متوشائيل پيدا شو او د متوشائيل څخه لمک پيدا شو.

¹⁹لمک دوه ښځې وکړې، د يوې نوم عاده ؤ او د بلې نوم ظله ؤ.

²⁰د عادې څخه يابال پيدا شو او هغه اولنی نفر ؤ چې کورني حيوانات يې روزل او په خېمو کې اوسېده.

²¹د هغه د ورور نوم يوبال ؤ او هغه اولنی نفر ؤ چې رباب او شپېلۍ به يې وهله.

²²د ظلې څخه هم توبل قائن پيدا شو او هغه آهنګر ؤ او د برنجو او اوسپنې څخه به يې د کار هر ډول وسايل جوړول. نعمه د توبل قائن خور وه.

²³يوه ورځ لمک خپلو ښځو ته وويل: ”ای عادې او ظلې زما خبرې واورئ ما يو ځوان سړی وژلی ځکه زه يې وم وهلی

²⁴که بدل د قائن اخيستل کيږي په اوه وارې نو د لمک به اخيستی شي اوه اويا وارې“

²⁵حضرت آدم بيا د خپلې ښځې سره يوځای شو او زوی يې پيدا شو او د هغه نوم يې شيث * کېښود. هغې وفرمايل: ”دا ځکه چې خدای پاک ماته د هابيل په ځای چې د خپل ورور قائن له ﻻسه ووژل شو بل زوی راکړ.“

²⁶د شيث زوی پيدا شو او د هغه نوم يې انوش کېښود. په همدې وخت کې خلکو د څښتن عبادت کول شروع کړل.