Read Pashto (Nangahari) — د پښتو مقدس کتاب پيدايښت 40 Bible Online

پيدايښت 40 - Pashto (Nangahari) — د پښتو مقدس کتاب bible

پيدايښت 40

¹څه موده وروسته د مصر د پادشاه يعنې فرعون د ساقيانو او نانوايانو د مشرانو څخه د پادشاه په مقابل کې غلطي وشوه.

²فرعون په دې دواړو درباريانو باندې په قهر شو

³او هغوى يې په هغه زندان کې واچول چې د دربار د ګارډ د قوماندان په کور کې ؤ يعنې په هماغه زندان کې چې حضرت يوسف په کې بندي ؤ.

⁴هغوى زيات وخت په زندان کې تېر کړ او د ګارډ قوماندان هغوى حضرت يوسف ته وسپارل او هغه د دوى خدمت کاوه.

⁵د ساقيانو او نانوايانو مشرانو چې په زندان کې ؤو په يوه شپه دواړو خوب وليد او هر يو خوب خپله معنیٰ درلودله.

⁶کله چې سهار حضرت يوسف هغوى ته ورغی، ويې ليدل چې هغوى خفه ؤو.

⁷نو هغه ورڅخه پوښتنه وکړه: ”تاسو نن ولې دومره خفه يئ؟“

⁸هغوى ځواب ورکړ: ”مونږ دواړو خوبونه ليدلي دي، مګر څوک نشته چې هغه تعبير کړي.“ حضرت يوسف هغوى ته وفرمايل: ”د خوبونو تعبيرول د خدای کار دی. خپل خوبونه ماته ووايئ.“

⁹نو د ساقيانو مشر خپل خوب حضرت يوسف ته بيان کړ. هغه ته يې وويل: ”په خوب کې مې خپلې مخې ته د انګورو تاک وليد.

¹⁰په تاک کې درې څانګې وې. څنګه چې غوټۍ يې وکړې نو هغه وغوړېدلې او د انګورو وږي پاخه شول.

¹¹د فرعون پياله مې په لاس کې وه. نو انګور مې واخيستل او په پياله کې مې وزبېښل او پياله مې د فرعون په لاس کې ورکړه.“

¹²حضرت يوسف وفرمايل: ”د هغه تعبير دا دی: درې څانګې درې ورځې دي.

¹³په دې درې ورځو کې به فرعون تا آزاد کړي او وبه دې بخښي او بېرته به دې په خپل کار باندې مقرر کړي. ته به د پخوا په شان لکه څنګه چې د هغه ساقي وې، د فرعون پياله به د هغه په لاس کې ورکوې.

¹⁴خو کله چې داسې وشي، ما در په ياد کړه او زما سره احسان وکړه. فرعون ته زما په باره کې يادونه وکړه او له دې زندان څخه مې وباسه.

¹⁵ځکه چې زه د عبرانيانو د وطن څخه په زور تښتول شوی يم او دلته مې هم هيڅ داسې کار نه دی کړی چې ما دې په زندان کې واچوي.“

¹⁶کله چې د نانوايانو مشر وليدل چې ښه تعبير دی، نو حضرت يوسف ته يې وويل: ”ما هم خوب وليده چې د ډوډيو درې ټوکرۍ مې په سر وې.

¹⁷په پاسنۍ ټوکرۍ کې د فرعون دپاره هر قسم ډوډۍ وې او مرغانو به هغه د دې ټوکرۍ څخه خوړلې.“

¹⁸حضرت يوسف په ځواب کې وفرمايل: ”د دې تعبير دا دی: درې ټوکرۍ درې ورځې دي.

¹⁹په دې درې ورځو کې به فرعون ستا سر پرې کړي او تا به په ونه کې ځوړند کړي او مرغان به ستا غوښه وخوري.“

²⁰په دريمه ورځ د فرعون د زېږېدلو کاليزه وه. هغه خپلو درباريانو ته مېلمستيا ورکړه او د ساقيانو او نانوايانو مشران يې آزاد کړل او د خپلو درباريانو په مخکې يې حاضر کړل.

²¹هغه د ساقيانو مشر په خپل پخواني کار باندې مقرر کړ او پياله يې يو ځل بيا د فرعون په لاس کې ورکړه.

²²مګر د نانوايانو مشر يې په دار وخېژاوه، لکه څنګه چې حضرت يوسف هغوى ته تعبير کړی ؤ.

²³د ساقيانو مشر حضرت يوسف راياد نه کړ او هغه يې بيخي هېر کړ.