Read Pashto (Nangahari) — د پښتو مقدس کتاب پيدايښت 41 Bible Online

پيدايښت 41 - Pashto (Nangahari) — د پښتو مقدس کتاب bible

پيدايښت 41

¹پوره دوه کاله تېر شوي ؤو چې فرعون خوب وليده چې د نيل د سيند په غاړه ولاړ ؤ.

²ناڅاپه اوه ښې او چاغې غواګانې د سيند څخه راووتلې او په لوخو کې څرېدلې.

³د هغو څخه وروسته نورې اوه غواګانې چې بدرنګې او ډنګرې وې، راووتلې او د سيند په غاړه د هغو تر څنګه ودرېدلې.

⁴بدرنګه او ډنګرو غواګانو هغه ښې او چاغې غواګانې وخوړلې. بيا فرعون راويښ شو.

⁵هغه بيا ويده شو او بل خوب يې وليده چې د غلو دانو اوه ډک او پاخه وږي په يوه ډنډر کې راشنه شول.

⁶له هغو څخه وروسته د غلو دانو نور اوه نري او د دښتې باد سوزولي وږي راشنه شول.

⁷د غلو دانو اوو نريو وږو هغه ډک او پاخه وږي روغ تېر کړل. بيا فرعون راويښ شو او پوه شو چې هغه خوب وليده.

⁸په سهار د هغه فکر پرېشانه ؤ. هغه د مصر ټول جادوګران او حکيمان راوغوښتل. هغه خپل خوبونه هغوى ته بيان کړل، مګر هيڅ يو ونشو کولی چې هغه فرعون ته تعبير کړي.

⁹په دې وخت کې د ساقيانو مشر فرعون ته وويل: ”نن راته راياد شول چې زما څخه خطا شوې ده.

¹⁰يو ځلې فرعون په خپلو نوکرانو باندې په قهر شوی ؤ او زه او د نانوايانو مشر يې د دربار د ګارډ د قوماندان په کور کې په زندان کې واچولو.

¹¹مونږ دواړو په يوه شپه خوب وليده او هر يو خوب ځانته خپله معنیٰ درلودله.

¹²په هغه ځای کې يو عبرانی ځوان چې د دربار د ګارډ د قوماندان غلام ؤ زمونږ سره ؤ. مونږ خپل خوبونه هغه ته بيان کړل او هغه زمونږ خوبونه زمونږ دپاره تعبير کړل.

¹³لکه څنګه چې هغه تعبير کړی ؤ، کټ مټ هماغسې وشول. زه بېرته په خپل ځای مقرر شوم او هغه بل سړی په دار وخېژولی شو.“

¹⁴نو فرعون حضرت يوسف راوغوښت او هغه يې ډېر ژر د زندان څخه راوويست. حضرت يوسف خپله ږيره او سر وخرايل، خپل کالي يې بدل کړل او د فرعون حضور ته راغی.

¹⁵فرعون حضرت يوسف ته وويل: ”ما خوب ليدلی او څوک نشته چې هغه تعبير کړي. مګر ما ستا په هکله اورېدلي دي چې کله خوب واورې، نو تعبير يې کولی شې.“

¹⁶حضرت يوسف فرعون ته په ځواب کې وفرمايل: ”اعليحضرته، زه دا نشم کولی، مګر خدای پاک به ښه تعبير درکړي.“

¹⁷فرعون حضرت يوسف ته وويل: ”ما خوب وليده چې زه د نيل د سيند په غاړه ولاړ وم،

¹⁸په دې وخت کې اوه چاغې او ښې غواګانې د سيند څخه راووتلې او په لوخو کې څرېدلې.

¹⁹د هغوى څخه وروسته نورې اوه غواګانې راووتلې چې داسې ډنګرې او بدشکله وې چې ما د مصر په ټول هېواد کې هيڅکله نه وې ليدلې.

²⁰ډنګرو او بدشکله غواګانو هغه اولنۍ چاغې غواګانې وخوړلې.

²¹مګر د خوړلو څخه وروسته هم څوک نه پوهېدل چې دوى به څه خوړلي وي ځکه چې هغوى د پخوا په شان ډنګرې ښکارېدلې. نو په دې وخت کې زه راويښ شوم.

²²همدارنګه ما په خوب کې وليدل چې د غلو دانو اوه ډک او پاخه وږي په يوه ډنډر کې راشنه شول.

²³د هغو څخه وروسته نور اوه نري او د دښتې باد سوزولي وږي راشنه شول.

²⁴اوه نريو وږو هغه ډک وږي روغ تېر کړل. نو ما خپل خوب جادوګرانو ته وويل، مګر هيچا ونشو کولی چې هغه ماته تعبير کړي.“

²⁵نو حضرت يوسف فرعون ته وفرمايل: ”د دواړو خوبونو معنیٰ يوه ده. څه چې خدای پاک غواړي ويې کړي هغه يې تاسو ته څرګند کړل.

²⁶اوه ښې غواګانې اوه کاله دي او د غلو دانو اوه ډک وږي هم اوه کاله دي، هغوى يوشان معنیٰ لري.

²⁷اوه ډنګرې او بد رنګه غواګانې چې د هغو څخه وروسته راووتلې او د غلو دانو اوه نري او د دښتې باد سوزولي وږي د قحطۍ اوه کاله دي.

²⁸دا هماغه څه دي چې تاسو ته مې وويل. څه چې خدای پاک غواړي ويې کړي تاسو ته يې څرګند کړي دي.

²⁹اوه کاله به د مصر په ټول هېواد کې ډېره پرېماني راشي.

³⁰مګر له هغې وروسته به د اوو کالو دپاره داسې قحطي راشي چې د مصر په ملک کې به هغه ټوله پرېماني هېره شي. ځکه چې قحطي به هېواد تباه کړي

³¹او پرېماني به په هېواد کې بيخي هېره شي، دا ځکه چې هغه قحطي چې په هغې پسې راځي هغه به ډېره سخته وي.

³²دا چې تاسو دوه خوبونه ليدلي دي د هغو معنیٰ دا ده چې دا د خدای پاک فيصله ده چې دا کار وکړي او هغه به ژر داسې وکړي.

³³اوس بايد تاسو يو پوه او د حکمت لرونکی سړی پيدا کړئ او هغه دې د مصر د هېواد دوهم مشر وټاکئ.

³⁴تاسو بايد په ټول هېواد کې ماموران وټاکئ چې د اوه کالو پرېمانۍ په موده کې د مصر د حاصلاتو څخه پنځمه برخه راټوله کړي.

³⁵هغوى ته امر وکړئ چې د پرېمانۍ په کلونو کې غله راټوله کړي او هغوی ته اختيار ورکړئ چې هغه په ښارونو کې ذخيره کړي او ساتنه يې وکړي.

³⁶هغه بايد د هېواد دپاره ذخيره شي چې د اوه کالونو د قحطۍ په موده کې چې په مصر باندې راتلونکې ده ورڅخه کار واخيستل شي ترڅو هېواد د قحطۍ په اثر وران نشي.“

³⁷دغه وړانديز د فرعون او د هغه د ټولو درباريانو په نظر کې ښه ښکاره شو.

³⁸نو فرعون د هغوى څخه پوښتنه وکړه: ”آيا کولی شو چې د يوسف په شان يو څوک راپيدا کړو چې د خدای پاک روح په کې دی؟“

³⁹نو فرعون حضرت يوسف ته وويل: ”څرنګه چې خدای پاک دا هرڅه تاته ښودلي دي نو ستا په شان د حکمت خاوند او پوه سړی نشته.

⁴⁰زه به تا د خپل هېواد دوهم مشر کړم او زما ټول قوم به ستا حکمونه مني او د واک په لحاظ به ته زما څخه پس دوهم نفر يې.“

⁴¹نو فرعون حضرت يوسف ته وويل: ”په دې ډول مې ته د مصر د ټول هېواد دوهم مشر وټاکلې.“

⁴²فرعون د خپلې ګوتې څخه هغه ګوته راوويستله چې په هغې کې د پادشاهۍ مهر لګېدلى ؤ او هغه يې حضرت يوسف ته ور په ګوته کړه. هغه حضرت يوسف ته د کتان ډېره ښه چپنه ورواغوستله او د سرو زرو زنځير يې د هغه په غاړه کې واچاوه.

⁴³فرعون هغه ته خپله دوهمه شاهي ګاډۍ ورکړه چې په کې سپور شي او خلکو د هغه په مخکې نارې وهلې: ”لاره پرېږدئ! لاره پرېږدئ!“ په دې ډول يې حضرت يوسف د مصر د ټول هېواد دوهم مشر وټاکه.

⁴⁴فرعون حضرت يوسف ته وويل: ”زه فرعون يم، مګر هيڅوک به ستا له اجازې څخه پرته په ټول مصر کې هيڅ نشي کولی.“

⁴⁵فرعون په حضرت يوسف باندې صفنات فعنيح نوم کېښود او د اون د کاهن فوطي فارع لور اسنات يې هغه ته په نکاح ورکړه. نو په دې ډول حضرت يوسف د مصر په ټول هېواد باندې واک ترلاسه کړ.

⁴⁶حضرت يوسف دېرش کلن ؤ چې د مصر د پادشاه يعنې فرعون په خدمت کولو يې پيل وکړ. حضرت يوسف د فرعون د حضور څخه لاړ او په ټول مصر کې وګرځېد.

⁴⁷د اوه کالو پرېمانۍ په موده کې ځمکې ډېر زيات حاصلات ورکړل.

⁴⁸په دې موده کې حضرت يوسف په مصر کې ټول خوراکي مواد راټول کړل او هغه يې په ښارونو کې ذخيره کړل او د هر ښار د شاوخوا ځمکو خوراکي مواد يې په هماغه ښار کې ذخيره کړل.

⁴⁹حضرت يوسف لکه د درياب د شګو په شان ډېره زياته غله ذخيره کړه او هغه دومره زياته وه چې د حساب څخه وتلې وه.

⁵⁰د قحطۍ د کالونو د راتلو څخه مخکې د اون د کاهن فوطي فارع لور اسنات حضرت يوسف ته دوه زامن وزېږول.

⁵¹حضرت يوسف د خپل مشر زوی نوم منسي * کېښود، نو ځکه يې وفرمايل: ”خدای پاک زما ټولې سختۍ او زما د پلار ټوله کورنۍ زما څخه هېره کړه.“

⁵²او بيا د دوهم زوی نوم يې افرايم * کېښود او ويې فرمايل: ”دا ځکه چې خدای پاک ماته په هغه وطن کې اولادونه راکړل چې زه په کې په تکليف وم.“

⁵³نو هغه پرېماني چې د اوه کالو دپاره په مصر کې وه پای ته ورسېدله.

⁵⁴لکه څنګه چې حضرت يوسف فرمايلي ؤو، د قحطۍ اوه کاله شروع شول. په نورو ټولو هېوادونو کې قحطي وه مګر په ټول مصر کې غله وه.

⁵⁵کله چې مصريان وږي شول، نو د ډوډۍ دپاره يې فرعون ته فرياد وکړ. نو فرعون ټولو مصريانو ته وويل: ”يوسف ته ورشئ او هرڅه چې تاسو ته وايي هغه وکړئ.“

⁵⁶قحطي ډېره سخته شوه او په ټول هېواد کې خپره شوه، نو حضرت يوسف ګودامونه پرانيستل او په مصريانو باندې يې غله خرڅوله.

⁵⁷د ټولو هېوادونو خلک مصر ته راتلل چې د حضرت يوسف څخه غله واخلي، ځکه چې په ټوله دنيا کې سخته قحطي وه.