Read Pashto (Nangahari) — د پښتو مقدس کتاب پيدايښت 45 Bible Online

پيدايښت 45 - Pashto (Nangahari) — د پښتو مقدس کتاب bible

پيدايښت 45

¹حضرت يوسف نور د خپلو نوکرانو په مخ کې ځان ټينګ نه کړای شو. هغه چيغې کړې: ”ټول د کوټې څخه ووزئ!“ نو کله چې حضرت يوسف خپل ځان خپلو ورونو ته وروپېژانده هلته بل څوک نه ؤ.

²هغه په داسې لوړ آواز سره وژړل چې مصريانو دا ژړا واورېدله او د فرعون درباريانو هم دا خبره واورېدله.

³حضرت يوسف خپلو ورونو ته وفرمايل: ”زه يوسف يم! آيا زما پلار لا تر اوسه پورې ژوندی دی؟“ مګر کله چې د هغه ورونو دا خبره واورېدله ډېر سخت ووېرېدل. ورونو يې نشو کولی چې هغه ته ځواب ورکړي.

⁴بيا حضرت يوسف خپلو ورونو ته وفرمايل: ”ماته رانژدې شئ.“ کله چې هغوى ورنژدې شول، هغه وفرمايل: ”زه ستاسو ورور يوسف يم، هغه يوسف چې تاسو د نورو په لاس په مصر کې خرڅ کړی ؤ.

⁵اوس مه پرېشانه کېږئ او خپل ځانونه په دې باندې مه ملامتوئ چې زه تاسو دلته خرڅ کړم، ځکه چې خدای پاک زه ستاسو څخه مخکې د خلکو د ژوند د ژغورلو دپاره دلته رالېږلى يم.

⁶ځکه چې دوه کاله کيږي چې په دې هېواد کې قحطي ده او د راتلونکو پنځو کالو دپاره به دلته کرل او رېبل نه وي.

⁷مګر خدای پاک زه ستاسو څخه مخکې راولېږلم چې تاسو په يوه عجيبه طريقه وژغوري چې تاسې او ستاسو اولاده ژوندۍ پاتې شي.

⁸نو په رښتيا سره تاسو زه دلته نه يم رالېږلى بلکه خدای پاک رالېږلى يم. هغه زه د فرعون ډېر لوړ رتبه درباري وټاکلم او زه د ټول هېواد دوهم مشر يم.

⁹اوس ژر شئ، زما پلار ته بېرته ورشئ او هغه ته ووايئ چې ستا زوی يوسف داسې وايي چې خدای پاک زه د مصر دوهم مشر کړی يم. بې له کومه ځنډه ماته راشئ.

¹⁰تاسو به د جوشن په سيمه کې اوسېږئ ترڅو تاسو، ستاسو اولادونه، ستاسو لمسيان، ستاسو رمې او پادې او خپلو ټولو شيانو سره چې درسره دي زما سره نژدې اوسئ.

¹¹زه به هلته په تاسو پام کوم، ځکه چې د قحطۍ پنځه کاله لا پاتې دي. که تاسو رانشئ نو تاسو، ستاسو کورنۍ او ستاسو حيوانات به له لوږې څخه مړه شي.

¹²تاسو په خپله او همدارنګه زما ورور بنيامين ويني چې په رښتيا سره دا زه يم چې ستاسو سره خبرې کوم.

¹³نو زما پلار په مصر کې زما د عزت او هغه څه څخه چې تاسو وليدل خبر کړئ او ژر هغه دلته راولئ.“

¹⁴بيا هغه خپل لاسونه د خپل ورور بنيامين څخه راتاو کړل او ويې ژړل او بنيامين هغه په غېږ کې ونيوه او ويې ژړل.

¹⁵هغه خپل ټول ورونه ښکل کړل او ورته ويې ژړل. له هغې څخه وروسته ورونو يې ورسره خبرې وکړې.

¹⁶کله چې د فرعون ماڼۍ ته د حضرت يوسف د ورونو د راتلو خبر ورسېده نو فرعون او د هغه ټول درباريان خوشاله شول.

¹⁷فرعون حضرت يوسف ته وويل: ”خپلو ورونو ته ووايه چې داسې وکړئ، خپل حيوانات بار کړئ او د کنعان خاورې ته ستانه شئ.

¹⁸خپل پلار او خپلې کورنۍ ماته راولئ. هغوی ته به د مصر ترټولو ښه ځمکه ورکړم او هغوی به د خپل ژوندانه د اړتيا څخه زيات ولري.

¹⁹تاته زما امر دی چې هغوى ته ووايه: داسې وکړئ چې د مصر څخه د خپلو اولادونو او خپلو ښځو دپاره ګاډۍ ګانې بوزئ او خپل پلار د ځان سره راواخلئ او راشئ.

²⁰د هغو شيانو په باره کې چې تاسو يې د ځان سره نشئ راوړلی هيڅ اندېښنه مه کوئ ځکه چې د مصر ترټولو ښه ځمکه به ستاسو وي.“

²¹نو د حضرت يعقوب زامنو همداسې وکړل او لکه څنګه چې فرعون امر کړی ؤ حضرت يوسف هغوى ته ګاډۍ ګانې ورکړې او هغوى ته يې د سفر خواړه هم ورکړل.

²²هغوی هر يو ته يې يوه يوه جوړه کالي ورکړل، مګر بنيامين ته يې درې سوه مثقاله سپين زر او پنځه جوړه کالي ورکړل.

²³او خپل پلار ته يې د مصر ترټولو ښو شيانو څخه د خرو لس باره او په ډوډۍ، غلو دانو او نورو خواړو باندې بار لس خرې د هغه د سفر دپاره ولېږلې.

²⁴بيا هغه خپل ورونه رخصت کړل او څنګه چې روان شول نو هغوى ته يې وفرمايل: ”په لاره کې شخړه مه کوئ.“

²⁵نو دوى د مصر څخه ووتل او په کنعان کې خپل پلار حضرت يعقوب ته راغلل.

²⁶هغه يې خبر کړ: ”يوسف تر اوسه پورې ژوندی دی او د مصر دوهم مشر دی.“ حضرت يعقوب هک حيران شو او د هغوى په خبره يې باور ونه کړ.

²⁷مګر کله چې هغوى د حضرت يوسف ټولې خبرې حضرت يعقوب ته بيان کړې او هغه ګاډۍ ګانې يې چې حضرت يوسف د هغه د راوستلو دپاره رالېږلې وې وليدلې، نو د هغوى په پلار حضرت يعقوب کې بېرته ساه راپيدا شوه.

²⁸حضرت يعقوب وفرمايل: ”زه باور لرم چې زما زوی يوسف تر اوسه پورې ژوندی دی. زه به لاړ شم او د خپل مرګ څخه مخکې به هغه ووينم.“