Read Pashto (Nangahari) — د پښتو مقدس کتاب پيدايښت 49 Bible Online

پيدايښت 49 - Pashto (Nangahari) — د پښتو مقدس کتاب bible

پيدايښت 49

¹حضرت يعقوب خپل زامن راوغوښتل او ورته ويې فرمايل: ”راغونډ شئ ترڅو تاسو له هغه څه څخه خبر کړم چې په راتلونکي کې به په تاسو باندې پېښ شي.

²د يعقوب زامنو سره راټول شئ واورئ غوږ مو ونيسئ خپل پلار اسرائيل ته

³ای روبينه! زما مشر زويه زما قوت يې ته زما د نارينتوب اولنۍ نښه يې يې په عزت کې بهتر او په قدرت کې بهتر

⁴يې بې کنتروله د سيلاب په شان نور به د ټولو نه بهتر نه يې په دې خاطر چې زما وينځې سره څملاستلې او د خپل پلار کټ دې ناپاکه کړ

⁵دي شمعون او لاوي دواړه سره ورونه خپلو وسلو نه هغوى کار اخلي چې ظلم وکړي

⁶د دوى په پټو پلانونو کې شريک به نشم نه به د دوى په مجلسونو کې زه برخه واخلم په دې خاطر چې په خپل قهر کې يې خلک ووژل او په ملنډو يې غوايان ګوډ کړل

⁷لعنت دې وي د دوى په قهر باندې ځکه چې ډېر سخت ؤ او په غضب د هغوى چې ډېر بې رحمه ؤ د دوى نسل به په ټولو اسرائيلو کې زه خپور کړم او د خپل قوم په منځ کې به يې تيت کړم

⁸د ستا ستاينه به کوي ستا ورونه ای يهودا خپل دښمنان به له اورمېږه نيسې ستا ورونه کاندي به هم تاته سجده

⁹ای يهودا! ته د زمري بچی يې چې خپل ښکار ووژني راستون شي هغه خپل غار ته د زمري په شان ټيټيږي او څملي هيڅوک نشي کړای جرأت هغه ناآرام کړي

¹⁰يهودا سره به وي شاهانه امسا * اولاده به يې همېش کړي حکومت ټول قومونه به هغه ته راوړي باج د ده په مخکې ټيټوي به هغوى د اطاعت سرونه

¹¹د انګور تاک پورې به خپل خر تړي په ډېر ښه شاخ پورې به کوټی تړي هغه کالي خپل په شرابو مينځي هغو شرابو کې چپنه وينځي چې دي د وينو په شان

¹²له شرابو څخه سترګې د ده سرې دي له شيدو څخه دي سپين د ده غاښونه

¹³زبولون به د درياب په غاړه اوسي وي بندر به د کشتيو تر صيدونه به يې سيمه ورسيږي

¹⁴يساکار دی په مثال د قوي خر چې پرېوزي دی د دوه خورجينو منځ کې

¹⁵دی چې وګوري چې ځای د اوسېدو يې ښه دی او هغه خاوره خوشالوونکې ده دی به بار ته خپله ملا کاندي راټيټه د غلام په شان به کار ته شي مجبوره

¹⁶دان به کاندي په خپل قوم حکومت وي به هغوى لکه د نورو قبيلو د اسرائيلو په شان

¹⁷دان د سرک د غاړې مار به وي دی به په لار کې منګری مار وي هغه به پوندې د آسونو چيچي ترڅو سپور نفر يې له شا ولويږي

¹⁸ستا د خلاصون په انتظار يمه زه ای څښتنه

¹⁹په جاد به وشي يرغل د يرغلګرو له خوا دی به له شا نه په هغوى باندې يرغل وکړي

²⁰د اشير ځمکه به وي ښه حاصلخېزه ښه خوندور شاهي خواړه به يې تيار کړي له حاصله څخه

²¹نفتالي هغه هوسۍ ده چې وهي آزادې منډې زېږوي ښکلي بچي

²²دی يوسف يو حاصلخېزه تاک يوه مېوه داره ونه چې وي چينې په غاړه چې يې څانګې وي ختلې په دېوال باندې

²³کوي ده باندې سخته حمله خپل دښمنان د خپلو غشو او ليندو سره په ده پسې شول

²⁴خو لينده د هغه پاتې شوه ثابته او د هغه مټې قوي شوې د يعقوب د قوي خدای په قدرت هغه شپونکي په وسيله چې ساتندوی د اسرائيلو دی

²⁵دا دی خدای د ستا د پلار چې کړي کومک درسره مطلق قادر خدای دی چې تاته برکت درکوي برکتونه د باران درکوي پاس له آسمانه څخه او د چينو له اوبو چې دي د ځمکې لاندې برکتونه به د ډېرو اولادونو او پادو درکړي

²⁶ستا پلار چې کوم برکتونه دي موندلي خپلو نيکونو څخه هغه ډېر لوی دي له هغو لوی دي کوم چې راځي له آبدي غرونو برکتونه دې دا ټول وي د يوسف په سر د هغه چا په تندي چې شهزاده دی د خپلو ورونو منځ کې

²⁷بنيامين دی په مثال د داړونکي لېوه په سهار کې دی خوري ښکار خپل په ماښام کې هغه وېشي غنيمت خپل“

²⁸دا ټولې د اسرائيلو دولس قبيلې دي او دا هغه څه ؤو چې د هغوى پلار دوى ته د برکت ورکولو په وخت کې وويل او هر يو ته يې هغه برکت ورکړ چې ورسره مناسب ؤ.

²⁹وروسته بيا حضرت يعقوب هغوى ته دغه وصيت وکړ: ”زه به ژر مړ شم او د خپلو نيکونو سره به يوځای شم. ما د خپلو نيکونو سره په هغې سمڅې کې ښخ کړئ چې د حيتي عفرون په پټي کې ده.

³⁰دا هغه سمڅه ده چې د مکفيلې په پټي کې ممري ته مخامخ د کنعان په خاوره کې پرته ده او حضرت ابراهيم هغه د پټي سره د عفرون څخه د هديرې دپاره اخيستې وه.

³¹دا هغه ځای دی چې حضرت ابراهيم او د هغه ښځه ساره او حضرت اسحاق او د هغه ښځه ربکا په کې ښخ شوي ؤو او هلته مې ليه هم ښخه کړه.

³²هغه پټی او سمڅه د حيتيانو څخه اخيستل شوي ؤو.“

³³کله چې حضرت يعقوب خپلو زامنو ته دا وصيت وکړ، هغه بېرته څملاست او وفات شو.