Read Pashto (Nangahari) — د پښتو مقدس کتاب پيدايښت 6 Bible Online

پيدايښت 6 - Pashto (Nangahari) — د پښتو مقدس کتاب bible

پيدايښت 6

¹۱‏-۲ د انسانانو شمېر د ځمکې په مخ په زياتېدو شو او د هغوى لورګانې پيدا شوې. د هغوى څخه ځينې دومره ښکلې وې چې د فرښتو ډېرې خوښې شولې او د هرې يوې سره يې چې غوښتل وادونه يې وکړل.

³هغه وخت څښتن وفرمايل: ”زه به انسان پرېنږدم چې هغه د همېش دپاره ژوندی وي او عمر به يې د يوسلو شلو کالو څخه زيات نه وي، ځکه چې هغه فاني دی.“

⁴کله چې فرښتو د انسانانو د لورګانو سره وادونه وکړل د هغوى څخه ډېر لوی او قوي انسانان پيدا شول او د پخوانۍ زمانې او حتیٰ وروسته هم مشهور جنګياليان ؤو.

⁵څښتن وليدل چې په دنيا کې د انسان بدکاري زياته شوه او د دوى ټول خيالونه او ارادې خرابې دي.

⁶نو څښتن پښېمانه شو او هغه خفه شو چې انسان يې د ځمکې په مخ پيدا کړی دی.

⁷نو هغه وفرمايل: ”زه به د ځمکې له مخ څخه ټول ژوندي مخلوقات له منځه يوسم! زه به انسانان، حيوانات، مرغان او خزندې له منځه يوسم. زه پښېمان يم چې دوى مې جوړ کړل.“

⁸خو خدای پاک د حضرت نوح څخه راضي ؤ.

⁹دا د حضرت نوح قصه ده. حضرت نوح په خپله زمانه کې نېک او پرهېزګار سړی ؤ او خدای پاک ته ډېر نژدې ؤ.

¹⁰هغه درې زامن درلودل: سام، حام او يافث.

¹¹مګر د خدای پاک په نظر کې ځمکه د فساد څخه ډکه شوې وه او د ظلم زياتي لمن هرې خواته خپره شوې وه.

¹²خدای پاک وليدل چې دنيا فاسده شوې ده ځکه چې ټول انسانان بې لارې شوي او فاسد شوي دي.

¹³خدای پاک حضرت نوح ته وفرمايل: ”ما دا فيصله کړې ده چې ټول انساني نسل بيخي له منځه وړم، ځکه چې دنيا د دوى د زور زياتي د عملونو څخه ډکه شوې ده.

¹⁴د ځان دپاره د ډېرو ښو لرګيو څخه کشتۍ جوړه کړه، په هغې کې کوټې جوړې کړه او دننه او دباندې ورته د قير پوښ ورکړه.

¹⁵او هغه داسې جوړه کړه چې اوږدوالی يې يوسلو پنځه دېرش متره، سور يې دوه ويشت متره او لوړوالی يې ديارلس متره وي.

¹⁶په کشتۍ باندې يو بام جوړ کړه او د پنځه څلوېښت سانتي مترو په شاوخوا کې د بام او د کشتۍ د اړخ ترمنځ فاصله پرېږده. کشتۍ درې منزله جوړه کړه او په يوه اړخ کې ورته دروازه جوړه کړه.

¹⁷زه په ځمکه باندې سيلاب راولم چې ټول ژوندي موجودات له منځه يوسي او هر هغه څه چې په ځمکه کې دي مړه شي.

¹⁸مګر زه به ستا سره لوظ وکړم چې ته به د خپلو زامنو، خپلې ښځې او د خپلو زامنو د ښځو سره کشتۍ ته ورننوزې.

¹⁹د ټولو ژونديو مخلوقاتو څخه يوه يوه جوړه نر او ښځه د ځان سره کشتۍ ته راوله ترڅو هغه ژوندي وساتې.

²⁰د هر ډول مرغانو، حيواناتو او خزندو څخه به دوه دوه تاته راشي ترڅو ژوندي وساتل شي.

²¹د خپل ځان او هغوى دپاره هر ډول خواړه له ځانه سره واخله او ذخيره يې کړه.“

²²نو حضرت نوح ټول کارونه د خدای پاک د حکم سره سم سرته ورسول.