Read Pashto (Nangahari) — د پښتو مقدس کتاب پيدايښت 7 Bible Online

پيدايښت 7 - Pashto (Nangahari) — د پښتو مقدس کتاب bible

پيدايښت 7

¹څښتن حضرت نوح ته وفرمايل: ”د خپلې ټولې کورنۍ سره کشتۍ ته ننوزه، ځکه چې په ټوله دنيا کې مې يوازينی سړی ته وليدلې چې نېک کارونه کوې.

²د ټولو پاکو حيواناتو څخه اوه، اوه جوړې نر او ښځه او د ناپاکو حيواناتو څخه يوه، يوه جوړه نر او ښځه د ځان سره واخله.

³او همدارنګه د هر قسم مرغانو څخه اوه جوړې نر او ښځه واخله ترڅو د هغوى نسل د ځمکې په مخ باندې ژوندی پاتې شي.

⁴ځکه چې زه به پس له اوه ورځو څخه په ځمکه باندې څلوېښت شپې او څلوېښت ورځې باران واوروم او ټول ژوندي مخلوقات چې ما جوړ کړي دي هغه به له منځه يوسم.“

⁵حضرت نوح هغه ټول کارونه سرته ورسول چې خدای پاک ورته حکم کړی ؤ.

⁶حضرت نوح د شپږسوه کالو په عمر ؤ چې په ځمکه باندې سيلاب راغی.

⁷حضرت نوح او د هغه زامن او ښځه او د زامنو ښځې يې د سيلاب څخه د بچ کېدلو په خاطر کشتۍ ته ننوتل.

⁸۸‏-۹ لکه څنګه چې خدای پاک حضرت نوح ته حکم کړی ؤ، د پاکو او ناپاکو حيواناتو څخه او د مرغانو او خزندو څخه يوه، يوه جوړه نر او ښځه حضرت نوح ته راغلل او کشتۍ ته ورننوتل.

¹⁰نو پس له اوه ورځو سيلاب راغی.

¹¹حضرت نوح شپږسوه کلن ؤ او د دوهمې مياشتې په اوولسمه ورځ د ځمکې لاندې ژورو ځايونو څخه اوبه راووتلې او د آسمان دروازې خلاصې شوې.

¹²څلوېښت شپې او څلوېښت ورځې په ځمکه باندې باران واورېده.

¹³او په هماغه ورځ حضرت نوح او د هغه زامن، سام، حام او يافث او د حضرت نوح ښځه او د هغه د زامنو درې ښځې کشتۍ ته ورننوتل.

¹⁴د هغوى سره د هر قسم کورني او وحشي حيواناتو، خزندو او د هر قسم مرغانو

¹⁵يعنې د ژونديو مخلوقاتو څخه يوه يوه جوړه حضرت نوح ته راغله او کشتۍ ته ننوتل.

¹⁶لکه څنګه چې خدای پاک حکم کړی ؤ، هغوى د هر ژوندي مخلوق څخه نر او ښځه ننوتل. نو څښتن د هغوى پسې دروازه وتړله.

¹⁷باران څلوېښت ورځې واورېد او اوبه د ځمکې په مخ زياتې شوې او کشتۍ يې پورته کړه او د ځمکې څخه اوچته شوه.

¹⁸اوبه ډېرې پورته شوې او کشتۍ د اوبو په مخ باندې روانه شوه.

¹⁹اوبه تر دې اندازې زياتې شوې چې تر آسمان ﻻندې ټول لوړ غرونه يې پټ کړل.

²⁰اوبه د غرونو د څوکو څخه اوه متره اوچتې شوې.

²¹د ځمکې په مخ هر ژوندی موجود يعنې کورني او وحشي حيوانات، مرغان، خزندې او انسانان ټول مړه شول.

²²د ځمکې په مخ ټول ساه لرونکي مړه شول.

²³څښتن د ځمکې په مخ ټول ژوندي مخلوقات، انسانان او حيوانات، خزندې او مرغان له منځه يوړل او يوازې حضرت نوح او هغوى چې په کشتۍ کې د هغه سره ؤو، پاتې شول.

²⁴اوبه يوسلو پنځوس ورځې وروسته مخ په کمېدلو شوې.