Read Pashto (Nangahari) — د پښتو مقدس کتاب پيدايښت 9 Bible Online

پيدايښت 9 - Pashto (Nangahari) — د پښتو مقدس کتاب bible

پيدايښت 9

¹خدای پاک حضرت نوح او د هغه زامنو ته برکت ورکړ او ويې فرمايل: ”ستاسو اولادونه دې زيات شي ترڅو ټوله دنيا ستاسو په اولادې باندې ډکه شي.

²ټول حيوانات، مرغان، خزندې او ماهيان به له تاسو څخه وېريږي او دا ټول به ستاسو په اختيار کې وي.

³هر شی چې ژوندی دی او حرکت کوي، هغه به ستاسو د خوراک دپاره وي. لکه څنګه چې ما تاسو ته شنه بوټي درکړل، اوس هرڅه تاسو ته درکوم.

⁴يو شی چې تاسو يې بايد ونه خورئ هغه داسې غوښه ده چې وينه په کې وي. دا مې منع کړي دي ځکه چې په وينه کې ژوندون دی.

⁵که څوک د يو انسان څخه ژوند واخلي هغه به سزا ومومي. که چېرې کوم حيوان يو انسان ووژني زه به هغه ته د مرګ سزا ورکوم.

⁶انسان د خدای پاک په شکل جوړ شوی دی، نو چا چې هغه وواژه، هغه به هم د بل چا په وسيله وژل کيږي.

⁷تاسو بايد زيات ماشومان وزېږوئ، ترڅو ستاسو اولاده په ټوله دنيا کې زياته شي.“

⁸خدای پاک حضرت نوح او د هغه زامنو ته وفرمايل:

⁹”زه ستاسو او ستاسو د راتلونکي نسل سره

¹⁰او ټولو ژونديو مخلوقاتو سره چې ستاسو سره ؤو، يعنې مرغانو، کورني او وحشي حيواناتو، هغوى ټول چې ستاسو سره د کشتۍ څخه راووتل او همدارنګه د ځمکې په مخ ټولو ژونديو مخلوقاتو سره

¹¹لوظ کوم چې بيا به هيڅکله ټول ژوندي مخلوقات د سيلاب په وسيله له منځه نه ځي. هيڅکله به بيا سيلاب ځمکه نه خرابوي.“

¹²خدای پاک وفرمايل: ”دا د هغه لوظ نښه ده چې زما او ستاسو او د هغو ټولو ژونديو مخلوقاتو ترمنځ به وي چې ستاسو سره دي او دا لوظ به د ټول راتلونکي نسل دپاره وي.

¹³زه د ورېځو په منځ کې شنه او سره ږدم او دا به زما او د دنيا په منځ کې د لوظ نښه وي.

¹⁴کله چې زه په ځمکه باندې ورېځې راخپرې کړم او په هغې کې شنه او سره راښکاره شي،

¹⁵زه به خپل هغه لوظ چې ستاسو او ټولو ژونديو مخلوقاتو سره مې کړی ؤ رايادوم او نور به هيڅکله ټول ژوندي موجودات د سيلاب په وسيله له منځه نه ځي.

¹⁶کله چې په ورېځو کې شنه او سره راښکاره شي، زه به هغې ته ګورم او خپل هغه آبدي لوظ به رايادوم چې زما او د ځمکې په مخ د ټولو ژونديو مخلوقاتو ترمنځ شوی ؤ.“

¹⁷نو خدای پاک حضرت نوح ته وفرمايل: ”دا د هغه لوظ نښه ده چې ما د ځان او د ځمکې په مخ د ټولو ژونديو موجوداتو سره کړی ؤ.“

¹⁸د حضرت نوح زامن چې د کشتۍ څخه راووتل هغه سام، حام او يافث ؤو. وروسته بيا د حام زوی پيدا شو او نوم يې کنعان ؤ.

¹⁹دا د حضرت نوح درې زامن ؤو چې د هغوى څخه د دنيا ټول خلک راپيدا شول.

²⁰حضرت نوح دهقان ؤ او هغه اولنی سړی ؤ چې د انګورو باغ يې جوړ کړ.

²¹يوه ورځ هغه شراب وڅښل او نېشه شو، خپل کالي يې وويستل او په خپله خېمه کې لوڅ پروت ؤ.

²²حام خېمې ته ننوت او ويې ليدل چې هغه لوڅ دی، نو هغه دباندې راووت او خپلو ورونو ته يې هم وويل.

²³بيا سام او يافث چپنه واخيستله او په خپلو اوږو باندې يې واچوله. هغوى په شا باندې خېمې ته ورغلل، خپل پلار يې ورباندې پټ کړ او خپل مخونه يې بلې خواته واړول ترڅو د خپل پلار لوڅوالی ونه ويني.

²⁴کله چې حضرت نوح د نيشې څخه په حال شو، په دې پوه شو چې د هغه کشر زوی د هغه سره څه کړي دي.

²⁵هغه وفرمايل: ”لعنت دې وي په کنعان باندې هغه به د خپلو ورونو غلام وي

²⁶د سام څښتن خدای ته ثناه ووايئ! کنعان به د سام غلام وي

²⁷زه دعا کوم چې څښتن دې يافث ته ډېره زياته ځمکه ورکړي او پرېږده چې هغه د سام سيمه ونيسي کنعان دې د هغه غلام وي“

²⁸د سيلاب څخه وروسته حضرت نوح درې سوه پنځوس کاله ژوند وکړ

²⁹او د نهه سوه پنځوس کالو په عمر وفات شو.