Read Pashto (Nangahari) — د پښتو مقدس کتاب دوهم سموئيل 1 Bible Online

دوهم سموئيل 1 - Pashto (Nangahari) — د پښتو مقدس کتاب bible

دوهم سموئيل 1

¹د شائول د مړینې څخه وروسته، داود عمالیقیانو ته د ماتې ورکولو څخه راستون شو او دوه ورځې په صقلغ کې پاتې شو.

²په دریمه ورځ د شائول د کمپ څخه یو ځوان سړی چې کالي یې شلېدلي او په سر باندې یې خاورې شیندلې راغی. کله چې هغه داود ته ورغی نو هغه ته د درناوي په خاطر په ځمکه باندې پړمخې پرېوت.

³داود د هغه څخه پوښتنه وکړه: ”له کومه ځایه راغلې؟“ هغه ځواب ورکړ: ”زه د اسراییلو د اردو څخه راتښتېدلی یم.“

⁴داود پوښتنه وکړه: ”ماته ووایه چې په جګړه کې څه پېښ شول؟“ هغه وویل: ”اسراییلیان له جګړې څخه تښتېدلي دي، د هغوی څخه یو زیات شمېر ووژل شول. شائول او د هغه زوی یوناتان هم ووژل شول.“

⁵نو داود د هغه څخه پوښتنه وکړه: ”ته څنګه پوه شوې چې شائول او یوناتان مړه دي؟“

⁶هغه ځوان ځواب ورکړ: ”د تصادف له مخې زه د جلبوع په غره کې وم او ما ولیدل چې شائول په خپلې نېزې باندې تکیه کړې وه او د دښمن جنګي ګاډۍ او سپاره عسکر هغه ته نژدې کېدل.

⁷په دې وخت کې هغه مخ راواړاوه، زه یې ولیدلم او ماته یې نارې کړې. ما ځواب ورکړ: امر وکړئ، ښاغلیه!

⁸هغه زما څخه پوښتنه وکړه: ته څوک یې؟ ما ځواب ورکړ: زه یو عمالیقی یم.

⁹هغه له ما څخه هیله وکړه او وویل: راشه ما ووژنه او د دې رنځ نه مې خلاص کړه، سره له دې چې ډېر سخت درد لرم لا هم ژوندی یم.

¹⁰نو زه ورغلم او هغه مې وواژه، ځکه زه پوهېدم چې هغه سخت ژوبل دی او په هر صورت هغه مړ کیږي. وروسته مې د هغه د سر څخه تاج او د مټ څخه کړۍ راواخیستل او تاسو ته مې ای باداره راوړل.“

¹¹نو داود او د هغه ټولو نفرو له غمه خپل کالي وشلول.

¹²هغوی د شائول، یوناتان او د څښتن د قوم یعنې د اسراییلو دپاره یې ویر وکړ، ویې ژړل او تر ماښامه پورې یې روژه ونیوله، ځکه چې په جګړه کې ډېر زیات نفر وژل شوي وو.

¹³داود د هغه ځوان څخه چې ده ته یې خبر راوړی ؤ پوښتنه وکړه: ”ته د کوم ځای یې؟“ هغه ځواب ورکړ: ”زما پلار عمالیقی دی خو مونږ ستاسو په هېواد کې اوسېږو.“

¹⁴داود د هغه څخه پوښتنه وکړه: ”تا څنګه دا جرأت کړی دی چې د څښتن غوره شوی پادشاه ووژنې؟“

¹⁵وروسته بیا داود د خپلو نفرو څخه یو تن راوغوښت او ورته ویې ویل: ”هغه ووژنه!“ نو هغه یې وواهه او مړ شو.

¹⁶داود هغه عمالیقي ته وویل: ”ستا وینه دې ستا په خپله غاړه وي. تا په خپله ژبه اقرار وکړ چې د څښتن غوره شوی پادشاه دې وواژه.“

¹⁷داود د شائول او د هغه د زوی یوناتان دپاره دغه د ویر سندره وویله

¹⁸او امر یې وکړ چې د یهودا خلکو ته دې دغه د ویر سندره ورزده کړای شي چې د لیندې د ویر په نوم یادیږي. (دا سندره د یاشر په کتاب کې لیکل شوې ده.) سندره داسې ده:

¹⁹”د اسراییلو په غونډیو باندې زمونږ مشران له منځه لاړل! هغه زړور څنګه راپرېوتل!

²⁰په جت کې دا اعلان مه کوئ د اشقلون په کوڅو کې دا مه خپروئ داسې نه چې د فلسطینیانو ښځې خوشاله شي داسې نه چې د کافرانو لورګانې خوشاله شي

²¹ای د جلبوع غرونو په تاسو دې پرخه یا باران ونه اوریږي ستاسو پټي دې غلې دانې ونه کړي ځکه چې هلته د زړور جنګیالي سپر ناولی شوی دی د شائول سپر به نور په تېلو غوړ نه شي

²²د یوناتان لینده وژونکې وه د شائول توره وه بې رحمه زورور یې مړه کول، دښمنان به یې وژل

²³شائول او یوناتان وو څومره ښکلي څومره ګران! ژوند او مرګ کې هم یوځای وو چابک له عقابانو قوي وو له زمریانو

²⁴ای د اسراییل ښځو شائول دپاره وژاړئ! هغه تاسو ته کالي ښکلي سره دراغوستل او هغه یې د سرو زرو په ګاڼو سینګارول

²⁵څنګه مړه دا جنګیالي شول هغوی د جنګ په ترڅ کې ووژل شول یوناتان مړ پروت په غونډیو کې دی

²⁶یوناتانه زما وروره، ستا دپاره زه غمجن یم ته په ما باندې ډېر ګران وې عجیبه ستا محبت ؤ زما دپاره ؤ محبت دې ډېر ژور تر محبت د ښځو

²⁷څنګه جنګیالي راپرېوتلي دي د هغوی وسلې له منځه تللي دي“