Read Pashto (Nangahari) — د پښتو مقدس کتاب دوهم سموئيل 20 Bible Online

دوهم سموئيل 20 - Pashto (Nangahari) — د پښتو مقدس کتاب bible

دوهم سموئيل 20

¹داسې وشول چې په جلجال کې یو لوچک سړی ؤ چې شبع نومېده او د بنیامیني بکري زوی ؤ. هغه سرنی وغږاوه او چیغې یې ووهلې: ”مونږه په داود کې برخه نه لرو نه لرو میراث زوی د یسي کې مونږ ای اسراییلیانو لاړ شئ خپل کور ته“

²نو ټولو اسراییلیانو داود پرېښود او د شبع پسې لاړل، مګر د یهودا خلک د داود سره پاتې شول او د اردن د سیند څخه تر اورشلیم پورې د هغه پسې روان وو.

³کله چې داود پادشاه خپلې ماڼۍ یعنې اورشلیم ته ورسېد، هغه لس وینځې چې د ماڼۍ د ساتنې دپاره یې پریښې وې، هغوی یې په یو کور کې تر څارنې لاندې وساتلې. د هغوی اړتیاوې به یې پوره کولې، مګر د هغوی سره یوځای نه شو. هغوی د مرګ تر ورځې پورې بندیانې وې او لکه د کونډو په شان اوسېدلې.

⁴پادشاه عماسا ته حکم وکړ: ”د یهودا سړي راوغواړه چې په دریو ورځو کې ماته راشي او ته خپله هم د هغوی سره حاضر شه.“

⁵نو عماسا لاړ چې د یهودا سړي راټول کړي، مګر عماسا په هغه وخت چې پادشاه ورته ټاکلی ؤ حاضر نه شو.

⁶نو پادشاه ابیشای ته وویل: ”شبع به مونږ ته د ابشالوم څخه زیات زیان ورسوي. زما نفر واخله او ورپسې لاړ شه، داسې نه شي چې هغه ځینې د قوي دېوالونو ښارونه ونیسي او زمونږ څخه وتښتي.“

⁷نو د یوآب سړي، کریتیان او فلیتیان چې د پادشاه ساتونکی ګارډ ؤ او ټول زړور جنګیالي د ابیشای تر امر لاندې ووتل. هغوی د اورشلیم څخه د شبع د تعقیبولو دپاره روان شول.

⁸کله چې هغوی په جبعون کې لوی ګټ ته ورسېدل، عماسا د دوی سره مخامخ شو. یوآب خپل پوځي کالي اغوستي وو او د کالیو دپاسه یې د هغې تورې تسمه چې په غلاف کې وه تر ملا تړلې وه. څنګه چې هغه مخکې ورغی توره د غلاف څخه ووتله او ولوېدله.

⁹یوآب عماسا ته وویل: ”ای وروره، ته څنګه یې؟“ بیا یوآب په ښي لاس د عماسا ږیره ونیوله چې ښکل یې کړي.

¹⁰خو عماسا هغې تورې ته پام ونه کړ چې یوآب په بل لاس کې نیولې وه. یوآب توره د ده په ګېډه ومنډله او د هغه کلمې په ځمکه باندې توی شوې او عماسا د دې لومړي ګوزار سره ژوند له لاسه ورکړ. بیا یوآب او د هغه ورور ابیشای د شبع پسې روان شول.

¹¹د یوآب د نفرو څخه یو تن د عماسا په څنګ کې ودرېد او غږ یې وکړ: ”هرڅوک چې د یوآب او داود پلویان دي هغوی دې د یوآب پسې روان شي!“

¹²عماسا په وینو کې رغړېده او د لارې په منځ کې پروت ؤ. د یوآب یو نفر ولیدل چې هرڅوک چې به عماسا ته رسېده نو هلته به ودرېد. نو هغه یې د لارې څخه پټي ته راوړ او پرده یې ورباندې واچوله.

¹³وروسته له دې چې عماسا د لارې څخه لېرې کړای شو ټول نفر د یوآب سره روان شول چې شبع تعقیب کړي.

¹⁴شبع د اسراییلو د ټولو قبیلو د سیمو څخه تېر شو او د آبل بیت معکې ښار ته راغی. د بکریانو د خېل ټول غړي سره راټول شول او د هغه سره ښار ته ننوتل.

¹⁵یوآب د خپلو ټولو لښکرو سره راغی او شبع یې په آبل بیت معکه کې کلابند کړ. هغوی د بهرني دېوال په مقابل کې د خاورو موړې جوړې کړې او همدارنګه د دې دپاره چې هغوی دېوال راوغورزوي د دېوال لاندینۍ برخه یې وکیندله.

¹⁶په هغه ښار کې یوه هوښیاره ښځه وه چې د دېوال څخه یې غږ وکړ: ”واورئ! واورئ! یوآب ته ووایئ چې دلته راشي، زه غواړم چې هغه ته یوه خبره وکړم.“

¹⁷یوآب ورغی او هغې ورڅخه پوښتنه وکړه: ”آیا یوآب تاسو یئ؟“ هغه ځواب ورکړ: ”هو، زه یم.“ هغې وویل: ”باداره! زما خبره واورئ.“ هغه ځواب ورکړ: ”زه یې اورم.“

¹⁸هغې وویل: ”په پخوا زمانه کې به یې داسې ویل: لاړ شه او خپل ځواب د آبل په ښار کې تر لاسه کړه او موضوع به حل کېده.

¹⁹زمونږ ښار په اسراییلو کې یو ډېر سوله ایز ښار دی او خلک یې وفادار دي. تاسو ولې د دې کوښښ کوئ چې داسې ښار له منځه یوسئ چې په اسراییلو کې د مور په شان دی؟ آیا تاسو غواړئ هغه څه چې د څښتن دي هغه وران کړئ؟“

²⁰یوآب ځواب ورکړ: ”هیڅکله نه! زه به هیڅکله ستاسو ښار وران نه کړم او نه به یې له منځه یوسم!

²¹دا زمونږ پلان نه دی. یو سړی چې شبع نومیږي او د بکري زوی دی او د افرایم د غرنۍ سیمې څخه دی د داود پادشاه په مقابل کې یاغي شوی دی. یوازې همدا یو سړی راوسپارئ، نو زه به ښار پرېږدم.“ هغې وویل: ”ډېر ښه، مونږ به د هغه سر د دېوال څخه تاسو ته درګوزار کړو.“

²²بیا هغه ښځه د خپلې حکیمانه مشورې سره د ښار خلکو ته ورغله او هغوی د شبع سر پرې کړ او هغه یې یوآب ته وروغورزاوه. نو یوآب سرنی وغږاوه چې د هغه نفر ښار پرېږدي. هر یو خپل کور ته ستون شو، یوآب هم بېرته اورشلیم ته ستون شو او پادشاه ته ورغی.

²³یوآب د اسراییلو د ټولو لښکرو قوماندان ؤ او د یهویاداع زوی بنایاه د داود د ساتونکو ګارډ، یعنې د کریتیانو او فلیتیانو قوماندان ؤ.

²⁴ادورام د بېګارۍ کارونو مشر ؤ او یهوشافاط د اخیلود زوی د اطلاعاتو منشي ؤ.

²⁵شیوا د دربار منشي ؤ، صادوق او ابیاتار کاهنان وو

²⁶او یائیري عیرا هم د داود کاهن ؤ.