Read Pashto (Nangahari) — د پښتو مقدس کتاب دوهم سموئيل 3 Bible Online

دوهم سموئيل 3 - Pashto (Nangahari) — د پښتو مقدس کتاب bible

دوهم سموئيل 3

¹د شائول د کورنۍ د پلویانو او د داود د پلویانو ترمنځ د اوږدې مودې دپاره جنګ روان ؤ. څنګه چې داود قوي کېده، هغومره د شائول پلویان کمزوري کېدل.

²د داود هغه زامن چې په حبرون کې زېږېدلي وو: مشر یې، امنون، د یزرعیلي اخینوعم زوی،

³دوهم یې، کیلاب، د کرملي نابال د کونډې ابیجایل زوی او دریم یې، ابشالوم، د معکې زوی چې د جشور د پادشاه تلمای لور وه،

⁴څلورم یې، ادونیا د حجیت زوی، پنځم یې، شفطیا د ابیطال زوی

⁵او شپږم یې، یترعام، د عجلې زوی ؤ. هغه هم د داود ښځه وه.

⁶د داود او د شائول د کورنیو ترمنځ د جګړې په دوران کې، ابنیر د شائول د پیروانو په منځ کې خپل دریځ قوي کاوه.

⁷یوه ورځ د شائول زوی ایشبوشت په ابنیر باندې تور ولګاوه چې د شائول د وینځو څخه د یوې وینځې سره چې رزفه نومېدله او د ایه لور وه یوځای شوی دی.

⁸ابنیر په دې خبرې باندې ډېر په قهر شو او ویې ویل: ”ستا خیال دا دی چې زه به د شائول سره خیانت وکړم؟ د پیل څخه زه ستا د پلار شائول کورنۍ ته، د هغه ورونو او د هغه ملګرو ته وفادار وم. ته مې د داود لاس ته ونه سپارلې، خو سره له دې په ما باندې د دې ښځې سره د بد کار کولو تور لګوې!

⁹۹‏-۱۰‏ څښتن د داود سره لوظ کړی ؤ چې هغه به د شائول د کورنۍ څخه پادشاهي واخلي او داود به د اسراییلو او د یهودا پادشاه کړي، هغه به د دان څخه تر بئرشبع پورې پادشاهي وکړي. نو څښتن دې ما ووژني که ما دا خبره رښتیا نه کړه!“

¹¹ایشبوشت جرأت ونه کړ چې ابنیر ته بله خبره وکړي، ځکه چې د هغه څخه وېرېده.

¹²نو ابنیر له خپلې خوا څخه استازي ولېږل چې داود ته داسې ووایي: ”پوهېږې چې د دې هېواد خاوند څوک دی؟ زما سره تړون وکړه او زه به ستا سره مرسته وکړم چې ټول اسراییل ستا خواته راواړوم.“

¹³داود ومنله او ویې ویل: ”ډېر ښه، زه ستا سره تړون کوم، ولې په یو شرط، ترڅو لومړی د شائول لور میکال د ځان سره ماته رانه ولې زه ستا سره نه مخامخ کېږم.“

¹⁴همدارنګه داود ایشبوشت ته هم استازي ولېږل چې ورته ووایي: ”زما ښځه میکال بېرته ماته راکړه. ځکه چې ما د هغې سره د واده کولو په خاطر د سلو فلسطینیانو د سنتۍ پوستکي ورکړي دي.“

¹⁵نو ایشبوشت څو نفره ولېږل چې میکال د هغې د میړه فلتئیل څخه چې د لایش زوی ؤ واخلي.

¹⁶فلتئیل د بحوریم تر ښاره پورې په ټوله لاره کې ژړل او په هغې پسې روان ؤ. مګر کله چې ابنیر وویل: ”بېرته کور ته لاړ شه!“ نو هغه بېرته خپل کور ته ستون شو.

¹⁷ابنیر د اسراییلو د مشرانو سره مشوره وکړه او ویې ویل: ”تاسو د ډېرې مودې راهیسې غوښتل چې داود ستاسو پادشاه شي.

¹⁸اوس دا موقع رارسېدلې ده، دا په یاد ساتئ چې څښتن د داود سره وعده کړې وه: زه به ستا په وسیله خپل قوم اسراییل د فلسطینیانو او د هغوی د نورو ټولو دښمنانو څخه وژغورم.“

¹⁹ابنیر د بنیامین د قبیلې د خلکو سره هم خبرې وکړې. وروسته بیا هغه حبرون ته لاړ چې د بنیامین د خلکو او نورو اسراییلیانو تصمیم داود ته ووایي.

²⁰کله چې ابنیر د خپلو شلو نفرو سره داود ته چې په حبرون کې ؤ ورغی، داود هغوی ته میلمستیا تیاره کړه.

²¹په هغه وخت کې ابنیر داود ته وویل: ”اعلیحضرته! اجازه راکړئ چې لاړ شم او ټول اسراییلیان ستاسو حضور ته راټول کړم. هغوی به ستاسو سره یو تړون وکړي او تاسو به په ټول هېواد باندې پادشاهي وکړئ څنګه چې تاسو یې غواړئ.“ نو داود ابنیر رخصت کړ او هغه په سلامتۍ سره لاړ.

²²په همدې وخت کې یوآب او د داود عسکر د یرغل کولو څخه راستانه شول او هغوی ډېر لوی غنیمت له ځان سره راوړ. مګر ابنیر نور د داود سره په حبرون کې نه ؤ، ځکه چې داود هغه په سلامتۍ سره استولی ؤ.

²³کله چې یوآب د خپلو عسکرو سره راورسېد، هغه خبر شو چې ابنیر داود پادشاه ته راغلی ؤ او پادشاه هغه په سلامتۍ سره استولی دی.

²⁴نو یوآب پادشاه ته ورغی او ورته یې وویل: ”څه دې وکړل؟ ګوره، ابنیر تاته راغی تا ولې هغه پرېښود چې لاړ شي؟ اوس هغه تللی دی!

²⁵ته ابنیر ښه پېژنې. هغه د دې دپاره راغلی ؤ چې تا وغولوي او ستا د ټولو حرکاتو او کارونو نه ځان خبر کړي.“

²⁶بیا یوآب د داود څخه لاړ، په ابنیر پسې یې استازي ولېږل او هغه یې د سیره له کوهي څخه بېرته راوست. مګر داود خبر نه ؤ.

²⁷نو کله چې ابنیر حبرون ته راستون شو، یوآب هغه د ښار په دروازه کې یوې خواته یووړ په دې بهانه چې د هغه سره پټې خبرې کوي. هلته یوآب د خپل ورور عساهیل د وینې د بدل اخیستلو په خاطر د هغه ګېډه څیري کړه او هغه یې په قتل ورساوه.

²⁸کله چې داود دا خبر واورېد ویې ویل: ”څښتن پوهیږي چې زه او زما رعیت په بشپړه توګه د ابنیر د قتل څخه بې ګناه یو.

²⁹د دې سزا دې په یوآب او د هغه په ټولې کورنۍ باندې راشي. زه ښېرا کوم چې د یوآب د اولادې څخه ځینې دې تل د سوزاک او یا د پوستکي په نورو مرضونو باندې اخته شي او یا هغوی دې یزک شي او یا دې په جنګ کې ووژل شي او یا دې په لوږه اخته شي.“

³⁰په دې ډول یوآب او د هغه ورور ابیشای، ابنیر قتل کړ ځکه چې هغه د جبعون په جګړه کې د هغوی ورور عساهیل وژلی ؤ.

³¹نو داود یوآب او د هغه ټولو نفرو ته امر وکړ: ”خپل کالي وشلوئ، د ویر کالي واغوندئ او د ابنیر دپاره ویر وکړئ.“ داود پادشاه په خپله د جنازې پسې روان ؤ.

³²هغوی ابنیر په حبرون کې ښخ کړ. پادشاه په لوړ اواز سره د ابنیر په قبر باندې وژړل او نورو ټولو خلکو هم وژړل.

³³داود پادشاه د ابنیر دپاره دغه د ویر سندره وویله: ”ولې دې مړ شي ابنیر د یو احمق په شانتې؟

³⁴نه ستا لاسونه تړل شوي وو او نه دې پښې په ځنځیرونو تړل شوې وې ووژل شوې ته د یو مجرم په څېر“ ټولو خلکو یو ځل بیا د ابنیر دپاره وژړل.

³⁵ټوله ورځ خلکو هڅه وکړه چې په داود باندې یو څه وخوري، مګر هغه قسم وخوړ: ”که زه د لمرپرېواته پورې څه شی وڅکم نو خدای دې ما ووژني!“

³⁶خلک دې خبرې ته متوجه شول او خوشاله شول، په رښتیا سره څه چې پادشاه کول ټول خلک په هغو باندې خوشالېدل.

³⁷نو په هغه ورځ د داود ټول نفر او د اسراییلو ټول قوم پوه شول چې پادشاه د ابنیر په قتل کې لاس نه درلود.

³⁸پادشاه خپلو نفرو ته وویل: ”آیا تاسو نه پوهېږئ چې نن په اسراییلو کې یو لوی مشر مړ شوی دی؟

³⁹که څه هم زه د خدای غوره کړای شوی پادشاه یم، خو نن کمزوری یم. دا د زرویه زامن زما څخه ډېر زوراور دي، څښتن دې دوی ته داسې سزا ورکړي لکه څنګه چې د هغې وړ دي!“