Read Pashto (Nangahari) — د پښتو مقدس کتاب دوهم سموئيل 6 Bible Online

دوهم سموئيل 6 - Pashto (Nangahari) — د پښتو مقدس کتاب bible

دوهم سموئيل 6

¹داود یو ځل بیا د اسراییلو غوره شوي عسکر راغونډ کړل، چې شمېر یې دېرش زره تنه وو.

²هغوی ته یې لارښوونه وکړه چې د یهودا بعلې ته لاړ شي د دې دپاره چې له هغه ځای څخه د خدای د لوظ صندوق راوړي. په صندوق باندې د مطلق قادر څښتن نوم دی او په هغه باندې د کروبیانو مجسمې دي چې د څښتن تخت د دې مجسمو دپاسه دی.

³هغوی د خدای د لوظ صندوق د غوایانو په یوې نوې ګاډۍ کې کېښود او هغه یې د ابیناداب د کور څخه چې په غونډۍ باندې ؤ راوړ. د ابیناداب زامنو عزه او اخیو د ګاډۍ د لارښوونې دپاره د هغې سره تلل

⁴او اخیو د ګاډۍ په مخکې روان ؤ.

⁵داود او نورو ټولو اسراییلیانو په خپل ټول توان سره څښتن ته د درناوي په خاطر نڅا ګانې کولې او سندرې یې ویلې. هغوی رباب، چمبه، چنګ او تال غږاوه.

⁶څنګه چې دوی د ناکون درمند ځای ته ورسېدل، غوایان وښوئېدل او عزه خپل لاس وراوږد کړ او د لوظ صندوق یې ونیوه.

⁷څښتن په عزه باندې د هغه د بې پروایۍ په خاطر ډېر په قهر شو. د دې ګناه له امله څښتن هغه وواژه او هغه د خدای د لوظ د صندوق په څنګ کې مړ شو.

⁸نو داود په غصه شو ځکه چې څښتن په قهر سره عزه ته سزا ورکړه او تر نن ورځې پورې هغه ځای د فارز عزه په نوم یادیږي.

⁹په هغه ورځ داود د څښتن څخه ډېر ووېرېده او ویې ویل: ”اوس به څنګه وکولای شم چې د څښتن د لوظ صندوق د ځان سره یوسم؟“

¹⁰نو هغه ونه غوښتل چې صندوق د ځان سره د داود ښار ته یوسي. نو هغه خپله اصلي لاره پرېښوده او د هغه په ځای یې صندوق د عوبید ادوم کور ته چې د جت څخه ؤ یووړ.

¹¹د څښتن صندوق درې میاشتې هلته پاتې شو او څښتن عوبید ادوم او د هغه ټولې کورنۍ ته برکت ورکړ.

¹²داود پادشاه خبر شو چې څښتن عوبید ادوم، د هغه کورنۍ او شتمنۍ ته چې هغه درلودله د لوظ د صندوق په خاطر برکت ورکړ. نو هغه د لوظ صندوق د عوبید ادوم له کور څخه واخیست چې د یو لوی جشن په نیولو سره یې اورشلیم ته یوسي.

¹³کله چې هغو نفرو چې د څښتن د لوظ صندوق یې انتقالاوه، شپږ قدمونه واخیستل، داود یو غویی او یو چاغ خوسی قرباني کړل.

¹⁴داود د کتان پېشبند اغوستی ؤ او په خپل ټول توان سره یې څښتن ته د درناوي په خاطر نڅا کوله.

¹⁵نو داود او ټولو اسراییلیانو د خوشالۍ په چیغو او د سرنیو په اواز سره د څښتن د لوظ صندوق اورشلیم ته راوړ.

¹⁶کله چې صندوق د داود ښار ته راوړل شو، د شائول لور میکال له کړکۍ څخه وکتل او وې لیدل چې داود پادشاه د څښتن په مخ کې ټوپونه وهي او نڅا کوي، نو هغه یې په خپل زړه کې سپک وګاڼه.

¹⁷هغوی د لوظ صندوق راوړ او هغه یې په هغې خېمه کې کېښود چې داود د هغه دپاره ودرولې وه. وروسته بیا داود څښتن ته سوزېدونکې او د سلامتۍ نذرانې وړاندې کړې.

¹⁸کله چې داود د نذرانو له وړاندې کولو څخه وزګار شو، هغه د خلکو دپاره د مطلق قادر څښتن په نوم برکت وغوښت.

¹⁹هغه د اسراییلو ټول ولس، هم سړیو او هم ښځو، هر یو ته، یوه ډوډۍ، یوه ټوټه غوښه او د ممیزو یوه کلچه ووېشله. بیا ټول خلک خپلو کورونو ته لاړل.

²⁰کله چې داود خپل کور ته راستون شو چې د خپلې کورنۍ دپاره برکت وغواړي، د هغه ښځه میکال، د شائول لور د هغه مخې ته ورووتله او ورته ویې ویل: ”د اسراییلو پادشاه نن خپل نوم لوړ کړ او د خپلو خدمتګارانو د وینځو په نظر کې یې خپل ځان لکه د یو احمق په شان لوڅ کړ.“

²¹داود ځواب ورکړ: ”ما څښتن ته د درناوي په خاطر نڅا کوله، چې زه یې ستا د پلار او د هغه د ټولې کورنۍ په ځای غوره کړی یم او زه یې د خپل قوم اسراییلو مشر جوړ کړی یم. او زه به په راتلونکې کې هم د څښتن په مخکې خوشالي کوم.

²²زه به خپل ځان له دې څخه نور هم رسوا کړم. ښایي ستا باور به دا وي چې زه هیڅ هم نه یم، خو د دې وینځو په خیال کې زه به د قدر وړ اوسم!“

²³نو د مرګ تر ورځې پورې د شائول د لور میکال اولاد پیدا نه شو.