Read Pashto (Nangahari) — د پښتو مقدس کتاب دوهم سموئيل 9 Bible Online

دوهم سموئيل 9 - Pashto (Nangahari) — د پښتو مقدس کتاب bible

دوهم سموئيل 9

¹یوه ورځ داود پوښتنه وکړه: ”آیا د شائول د کورنۍ څخه څوک پاتې دی؟ که چېرې وي نو زه به د یوناتان په خاطر ورسره مهرباني وکړم.“

²نو د شائول د کورنۍ یو خدمتګار ؤ چې صیبا نومېده. هغه یې د داود حضور ته راوغوښت او پادشاه هغه ته وویل: ”آیا ته صیبا یې؟“ هغه ځواب ورکړ: ”هو، اعلیحضرته، زه یم.“

³پادشاه د هغه څخه پوښتنه وکړه: ”آیا د شائول د کورنۍ څخه څوک پاتې دی چې هغه ته د خدای احسان ښکاره کړم لکه څنګه چې ما د خدای سره وعده کړې ده چې زه به داسې کوم؟“ صیبا ځواب ورکړ: ”د یوناتان د زامنو څخه یو پاتې دی، چې هغه په دواړو پښو شل دی.“

⁴پادشاه پوښتنه وکړه: ”هغه چېرته دی؟“ صیبا ځواب ورکړ: ”په لودبار کې د عمیئیل د زوی ماخیر په کور کې دی.“

⁵نو داود پادشاه هغه راوغوښت.

⁶کله چې د یوناتان زوی او د شائول لمسی مفیبوشت داود ته راغی، هغه ته د درناوي په خاطر پړمخې پرېوت. داود وویل: ”ای مفیبوشته!“ هغه ځواب ورکړ: ”ستاسو غلام یم“.

⁷داود هغه ته وویل: ”مه وېرېږه، ځکه چې زه به ستا د پلار یوناتان په خاطر په تا باندې مهرباني وکړم. ستا د نیکه شائول ټوله ځمکه به بېرته درکړم او ته به تل زما په دسترخوان باندې ډوډۍ خورې.“

⁸مفیبوشت یو ځل بیا پړمخې پرېوت او ویې ویل: ”اعلیحضرته! زما نه خو یو مړ سپی هم ښه دی، تاسو ولې زما سره دومره ښه کوئ؟“

⁹وروسته بیا پادشاه د شائول خدمتګار صیبا راوغوښت او ورته ویې ویل: ”ما ټول هغه شیان چې د شائول او د هغه د کورنۍ وو، ستا بادار یعنې د شائول لمسي مفیبوشت ته ورکړل.

¹⁰ته، ستا زامن او ستا خدمتګاران دې ستا د بادار شائول د کورنۍ دپاره ځمکه وکرئ او حاصل یې راوړئ چې د هغوی دپاره خواړه تیار شي. مګر خپله مفیبوشت به تل زما په دسترخوان باندې ډوډۍ خوري.“ (صیبا پنځلس زامن او شل نوکران درلودل.)

¹¹صیبا ځواب ورکړ: ”اعلیحضرته! څه چې تاسو حکم کوئ زه به هماغسې وکړم.“ نو مفیبوشت به لکه د پادشاه د یو زوی په شان د داود په دسترخوان باندې ډوډۍ خوړله.

¹²د مفیبوشت یو وړوکی زوی ؤ چې میکا نومېده. د صیبا د کور ټول اوسېدونکي د مفیبوشت خدمتګاران شول.

¹³نو مفیبوشت چې شل ؤ په اورشلیم کې اوسېده او د پادشاه په دسترخوان باندې یې تل ډوډۍ خوړله.