Read Pashto (Nangahari) — د پښتو مقدس کتاب اول پادشاهان 10 Bible Online

اول پادشاهان 10 - Pashto (Nangahari) — د پښتو مقدس کتاب bible

اول پادشاهان 10

¹کله چې د سبا ملکې د سلیمان د شهرت په باره کې واورېدل (هغه شهرت چې څښتن سلیمان ته ورکړی ؤ)، نو هغه راغله چې په سختو پوښتنو سره هغه وازمایي.

²هغه د یو لوی کاروان او اوښانو سره چې عطر، ډېر سره زر او قیمتي تیږې ورباندې بار وو اورشلیم ته راورسېدله. هغه سلیمان ته راغله او د هغو ټولو شیانو په هکله چې د هغې په ذهن کې وو، د هغه سره یې خبرې وکړې.

³سلیمان د هغې ټولو پوښتنو ته ځواب ورکړ، داسې یوه پوښتنه نه وه چې هغه یې ځواب کړې نه وي.

⁴کله چې د سبا ملکې د سلیمان حکمت او هغه ماڼۍ چې هغه جوړه کړې وه،

⁵هغه خواړه چې په مېز باندې وو، د هغه د درباریانو د کښېناستو ترتیب، د خدمتګارانو ښه تنظیم او د هغوی کالي، د هغه ساقیان او هغه سوزېدونکې نذرانې چې هغه د خدای په کور کې وړاندې کولې ولیدلې، ډېره حیرانه شوه.

⁶هغې پادشاه ته وویل: ”هغه څه چې ما په خپل هېواد کې ستاسو او ستاسو د کارونو او حکمت په باره کې اورېدلي وو هغه رښتیا دي!

⁷مګر ما تر هغې پورې په دې باندې باور نه کاوه ترڅو چې راغلمه او دا هرڅه مې په خپلو سترګو ولیدل. خو حتیٰ ما د دې په نیمایي هم نه وو اورېدلي، ستا حکمت او شتمني د هغې څخه هم ډېره زیاته ده، څه چې ما اورېدلي وو.

⁸ستاسو سړي به څومره خوشاله وي! او ستاسو درباریان به څومره خوښ وي چې تل ستاسو په حضور کې ولاړ وي او ستاسو حکمت ویني!

⁹ستاسو د څښتن خدای ثناه دې وي چې له تاسو څخه زیات خوشاله دی او تاسو یې د اسراییلو په تخت باندې کښېنولي یاست. د اسراییلو سره د څښتن د تلپاتې مینې په خاطر یې تاسو پادشاه کړي یاست چې عدالت او نېکي ټینګه کړئ.“

¹⁰هغې پادشاه ته د څلورو ټنو څخه زیات سره زر، زیاته اندازه عطر او قیمتي تیږې ورکړې. څومره زیات عطر چې د سبا ملکې سلیمان پادشاه ته ورکړل دومره به بیا هیڅکله رانه وړل شي.

¹¹(د حیرام کشتیو د اوفیر څخه پرته له سرو زرو ډېر زیات د صندل لرګي او قیمتي تیږې هم راوړلې.

¹²پادشاه د دې لرګیو څخه د څښتن د کور او شاهي ماڼۍ دپاره زینې او د ساز غږوونکو دپاره ربابونه جوړ کړل. د هغې ورځې څخه تر اوسه پورې دومره زیات د صندل لرګي هیڅکله نه وو راوړل شوي او نه هم لیدل شوي وو.)

¹³سلیمان پادشاه د سبا ملکې ته برسېره په هغو شیانو چې هغې غوښتي وو، د خپل شاهانه سخاوت له مخې نور سوغاتونه هم ورکړل. وروسته بیا ملکه د خپلو خدمتګارانو سره خپل هېواد یعنې سبا ته ستنه شوه.

¹⁴سلیمان پادشاه هر کال نژدې درویشت ټنه سره زر لاس ته راوړل.

¹⁵په دې کې هغه مالیات چې د سوداګرو له خوا ورکول کېدل، د تجارت ګټې او هغه باج چې د عربو د پادشاهانو او هغه مالیات چې د اسراییلو د حکمرانانو له خوا ورکول کېده شامل نه وو.

¹⁶سلیمان پادشاه د ټکول شویو سرو زرو څخه دوه سوه دانې لوی سپرونه جوړ کړل، په هر سپر کې نژدې اووه کیلوګرامه سره زر استعمال شوي وو.

¹⁷همدارنګه هغه د ټکول شویو سرو زرو څخه درې سوه دانې کوچني سپرونه جوړ کړل، چې په هر سپر کې نژدې دوه کیلوګرامه سره زر وو. پادشاه هغه په هغه سالون کې کېښودل چې د لبنان د ځنګل په نوم یادېده.

¹⁸پادشاه د فیل د غاښونو څخه یو لوی تخت هم جوړ کړ او هغه ته یې د سوچه سرو زرو پوښ ورکړ.

¹⁹تخت ته د ورختلو دپاره شپږ زینې وې او د تخت سر د شا له خوا ګرد ؤ. د تخت دواړو خواو ته بازوګان وو او د هر یو په خوا کې د زمري مجسمه وه.

²⁰په شپږو زینو باندې د دولسو زمریانو مجسمې وې، د هرې زینې په اړخونو باندې یوه، یوه مجسمه وه. په بلې هیڅ پادشاهۍ کې داسې تخت نه ؤ جوړ شوی.

²¹د سلیمان هغه جامونه چې د څښلو دپاره وو ټول د سرو زرو څخه جوړ شوي وو. د سلیمان د ماڼۍ هغه سالون چې د لبنان د ځنګل په نامه یادېده، ټول سامان یې د سوچه سرو زرو څخه وو. سپین زر هیڅ استعمال شوي نه وو، ځکه چې د سلیمان په وخت کې سپین زر بې ارزښته ګڼل کېدل.

²²هغه بحري کشتۍ ګانې درلودلې چې د حیرام د کشتۍ ګانو سره یې سفر کاوه. د هغه کشتۍ ګانې به په هرو دریو کالو کې یوځل راستنېدلې او سره زر، سپین زر، د فیل غاښونه، بیزوګانې او د طاووس مرغان به یې راوړل.

²³سلیمان پادشاه د نړۍ د نورو ټولو پادشاهانو څخه ډېر شتمن او د حکمت خاوند ؤ

²⁴او ټولې نړۍ غوښتل چې راشي او هغه حکمت وګوري چې خدای سلیمان ته ورکړی ؤ.

²⁵کال په کال به چې هرڅوک راتلل، نو د ځان سره به یې دا سوغاتونه، یعنې د سپینو او سرو زرو سامانونه، چپنې، وسلې، عطر، اسونه او قچرې راوړلې.

²⁶سلیمان خپلې جنګي قواوې چې د څوارلس سوه جنګي ګاډیو او دولس زره اسونو نه تشکیل شوې وې راغونډې کړې. یوه برخه یې په اورشلیم او نورې یې په نورو ښارونو کې ساتلې.

²⁷د هغه د پادشاهۍ په وخت کې سپین زر په اورشلیم کې د تیږو په شان یو معمولي شی ؤ او د صبر د ونو لرګي لکه د یهودا د غرونو په لوېدیځو لمنو کې د اینځرو د ونو په شان پرېمانه وو.

²⁸د سلیمان اسونه یې د مصر او ترکیې څخه واردول، شاهي سوداګرانو به هغه د ترکیې څخه اخیستل.

²⁹هغوی به د مصر څخه یوه جنګي ګاډۍ په شپږ سوه مثقاله سپینو زرو او یو اس به یې په یوسلو پنځوس مثقاله سپینو زرو باندې اخیستل. همدارنګه ځینې به یې د حیتیانو او ارامیانو پر پادشاهانو هم خرڅول.