Read Pashto (Nangahari) — د پښتو مقدس کتاب اول پادشاهان 11 Bible Online

اول پادشاهان 11 - Pashto (Nangahari) — د پښتو مقدس کتاب bible

اول پادشاهان 11

¹سلیمان د ډېرو بهرنیو ښځو سره مینه لرله. د فرعون د لور څخه پرته هغه د حیتي، موآب، عمون، ادوم او صیدون د ښځو سره هم ودونه وکړل.

²څښتن امر کړی ؤ چې اسراییلیان دې د دې قومونو سره ودونه نه کوي، ځکه چې هغوی به د اسراییلیانو زړونه د خپلو خدایانو په لور راواړوي. خو بیاهم سلیمان د هغوی په مینه کې ډوب شو او د هغوی سره یې ودونه وکړل.

³سلیمان د اووه سوه شاهزادګیو سره ودونه وکړل او همدارنګه هغه درې سوه وینځې لرلې. هغه خپلو ښځو بې لارې کړ.

⁴کله چې سلیمان زوړ شو د هغه ښځو هغه د پردیو خدایانو عبادت ته واړاوه. هغه خپل څښتن خدای ته وفادار نه ؤ لکه څنګه چې د هغه پلار داود وفادار ؤ.

⁵هغه د صیدون د بت عشتاروت او د عمون د کرکې وړ بت مولک عبادت وکړ.

⁶نو سلیمان د څښتن په مقابل کې ګناه وکړه. هغه د څښتن څخه په بشپړه توګه پیروي ونه کړه لکه څنګه چې د هغه پلار داود کړې وه.

⁷سلیمان په هغه غره باندې چې د اورشلیم په ختیځ کې ؤ، د موآب د کرکې وړ بت کموش دپاره او د عمونیانو د کرکې وړ بت مولک دپاره د عبادت ځای جوړ کړ.

⁸همدارنګه سلیمان هغه عبادت ځایونه هم جوړ کړل چې هلته به د هغه ټولو بهرنیو ښځو خوشبویي سوزولې او خپلو خدایانو ته به یې قربانۍ وړاندې کولې.

⁹۹‏-۱۰ که څه هم څښتن د اسراییلو خدای دوه ځلې سلیمان ته ورښکاره شوی ؤ او هغه ته یې حکم کړی ؤ چې د پردیو خدایانو عبادت دې نه کوي، خو بیاهم سلیمان د څښتن اطاعت ونه کړ او د هغه څخه یې پیروي ونه کړه. نو څښتن سلیمان ته په قهر شو

¹⁰

¹¹او ورته یې وویل: ”څرنګه چې تا قصداً هغه لوظ چې دې زما سره کړی ؤ مات کړ او زما قوانین او حکمونه دې عملي نه کړل، په دې خاطر په رښتیا سره ستا څخه پادشاهي اخلم او ستا یو نوکر ته به یې ورکړم.

¹²خو بیا به هم زه دا کار ستا د پلار داود په خاطر ستا په ژوندانه کې ونه کړم، بلکه ستا د زوی د پادشاهۍ په وخت کې به یې وکړم.

¹³خو زه به ټوله پادشاهي د هغه څخه وانخلم، بلکه هغه ته به یوه قبیله زما د خدمتګار داود په خاطر او د اورشلیم په خاطر چې هغه مې غوره کړی دی ورکړم.“

¹⁴نو څښتن د سلیمان په ضد یو دښمن راپورته کړ، یعنې ادومي حداد چې د ادوم د شاهي کورنۍ څخه ؤ.

¹⁵۱۵‏-۱۶ ډېر پخوا، کله چې داود د ادوم سره جګړه کوله، د هغه د لښکرو قوماندان یوآب د مړو د ښخولو دپاره هغه ځای ته لاړ. هغه د خپلو نفرو سره شپږ میاشتې په ادوم کې پاتې شو او په هغه وخت کې هغوی د ادوم ټول نارینه ووژل،

¹⁶

¹⁷پرته له حداد او د هغه د پلار د ځینو ادومي خدمتګارانو څخه، چې مصر ته وتښتېدل. (په هغه وخت کې حداد هلک ؤ.)

¹⁸هغوی د مدیان څخه روان شول او فاران ته لاړل. د فاران څخه یې د ځان سره نفر واخیستل او په مصر کې فرعون پادشاه ته ورغلل. هغه حداد ته کور او ځمکه ورکړه او خواړه یې ورته تیارول.

¹⁹فرعون د حداد څخه دومره خوشاله ؤ چې هغه ورته د خپلې ښځې خور یعنې د ملکې تحفنیس خور ورکړه.

²⁰هغې حداد ته زوی وزېږاوه چې ګنوبت نومېده او تحفنیس په شاهي ماڼۍ کې د هغه روزنه کوله. ګنوبت هلته د فرعون د زامنو سره اوسېده.

²¹کله چې په مصر کې حداد ته خبر ورسېد چې داود او د هغه د لښکرو قوماندان یوآب مړه شوي دي، نو حداد فرعون ته وویل: ”اجازه راکړئ چې بېرته خپل وطن ته لاړ شم.“

²²فرعون پوښتنه وکړه: ”څه شی دې کم دي چې ته غواړې بېرته خپل وطن ته لاړ شې؟“ حداد ځواب ورکړ: ”هیڅ. مګر ماته اجازه راکړئ چې لاړ شم!“

²³خدای د سلیمان په مقابل کې یو بل دښمن هم، یعنې رزون د الیداع زوی راپورته کړ چې هغه د خپل بادار، هدد عزر څخه چې د صوبې پادشاه ؤ، تښتېدلی ؤ.

²⁴هغه خپل شاوخوا ته یو څو نفره راټول کړل او د یاغیانو د ډلې مشر شو. دا په هغه وخت کې وشو چې داود د صوبې ځواکونه له منځه یوړل. یاغیان دمشق ته لاړل، هلته هغوی ځای په ځای شول او د هغه ځای کنترول یې په لاس کې ونیوه.

²⁵برسېره پر هغې نارامۍ چې د حداد له خوا راپیدا کېدله، رزون هم د سلیمان د ژوند تر پایه د اسراییلو دښمن ؤ. رزون په سوریې باندې پادشاهي کوله او د اسراییلو څخه یې کرکه کوله.

²⁶همدارنګه د نباط زوی یروبعام هم د پادشاه په مقابل کې یاغي شو. هغه د افرایم د صریده او د سلیمان د مامورینو څخه ؤ. د هغه مور صروعه نومېدله او کونډه وه.

²⁷دا هغه قصه ده چې څنګه هغه د پادشاه په مقابل کې یاغي شو. سلیمان د خپل پلار داود د ښار د دېوال سوری جوړاوه او د ختیځې خوا ځمکه یې ډکوله.

²⁸یروبعام یو تکړه ځوان ؤ او کله چې سلیمان متوجه شو چې هغه څومره سخت کار کوي، نو هغه یې د منسي او افرایم د قبیلو د ټولو مزدورانو مسئول وټاکه.

²⁹یوه ورځ چې یروبعام د اورشلیم څخه بیرون روان ؤ، اخیا نبي چې د شیلوه څخه ؤ او نوې چپنه یې اغوستې وه په لاره کې د هغه سره مخامخ شو. هغوی دواړه په سارا کې یوازې وو.

³⁰اخیا خپله نوې چپنه وویستله، هغه یې وشکوله او دولس ټوټې یې کړه.

³¹بیا یې یروبعام ته وویل: ”لس ټوټې خپل ځان ته واخله، ځکه چې د اسراییلو څښتن خدای درته وایي: ګوره، په دې نژدې وخت کې به زه د سلیمان څخه پادشاهي واخلم او لس قبیلې به تاته درکړم.

³²مګر د خپل خدمتګار داود او د اورشلیم په خاطر چې هغه مې د اسراییلو د ټولو قبیلو څخه غوره کړی دی، سلیمان ته به یوه قبیله پرېږدم.

³³زه ځکه دا کار کوم چې سلیمان او د اسراییلو خلکو زه پرېښودم او د پردیو خدایانو، یعنې د صیدونیانو د بت عشتاروت، د موآبیانو د بت کموش او د عمونیانو د بت مولک عبادت کوي. هغوی زما د امر سرغړونه کړې ده، هغوی ګناه کړې ده او زما د قوانینو او حکمونو څخه یې پیروي نه ده کړې لکه څنګه چې د سلیمان پلار داود کوله.

³⁴مګر زه به د سلیمان څخه ټوله پادشاهي وانخلم. د خپل خدمتګار داود په خاطر چې ما غوره کړی ؤ او زما حکمونه او قوانین یې عملي کړي وو هغه به پرېږدم چې د خپل مرګ تر وخته پورې پادشاه وي.

³⁵د سلیمان د زوی څخه به پادشاهي واخلم او تاته به لس قبیلې درکړم.

³⁶خو زه به یوه قبیله د هغه زوی ته پرېږدم، ترڅو زما د خدمتګار داود څراغ په اورشلیم کې، په هغه ښار کې چې ما د خپل عبادت دپاره غوره کړی دی تل روښانه پاتې شي.

³⁷ای یروبعامه! زه به تا د اسراییلو پادشاه کړم او په هغې ټولې سیمې باندې به پادشاهي وکړې چې ته یې غواړې.

³⁸که چېرې په کامل ډول زما اطاعت وکړې، زما د قوانینو په مطابق ژوند وکړې، زما حکم سرته ورسوې او هغه کار وکړې چې زما په نظر ښه دی لکه څنګه چې زما خدمتګار داود کول، نو زه به تل ستا سره یم. زه به تا د اسراییلو پادشاه کړم او په یقین سره به داسې وکړم لکه څنګه چې ما د داود دپاره وکړل، چې ستا اولاده به ستا څخه وروسته پادشاهي کوي.

³⁹زه به د سلیمان د ګناه له کبله د داود اولادې ته سزا ورکړم، مګر تر ابده پورې نه.“

⁴⁰په دې خاطر سلیمان هڅه وکړه چې یروبعام ووژني، مګر یروبعام د مصر پادشاه شیشق ته وتښتېد او د سلیمان تر مړینې پورې هلته پاتې شو.

⁴¹د سلیمان د پادشاهۍ نورې ټولې پېښې، دا چې هغه څه کړي دي او هغه حکمت چې هغه ښودلی ؤ، د سلیمان د تاریخ په کتاب کې لیکل شوي دي.

⁴²سلیمان څلوېښت کاله په اورشلیم کې په ټولو اسراییلو باندې پادشاهي وکړه.

⁴³نو وروسته هغه مړ شو او د خپل پلار داود په ښار کې ښخ شو. د سلیمان په ځای د هغه زوی رحبعام پادشاه شو.