Read Pashto (Nangahari) — د پښتو مقدس کتاب اول پادشاهان 15 Bible Online

اول پادشاهان 15 - Pashto (Nangahari) — د پښتو مقدس کتاب bible

اول پادشاهان 15

¹د نباط د زوی یروبعام د پادشاهۍ په اتلسم کال، ابیاه د یهودا پادشاه شو

²او هغه درې کاله په اورشلیم کې پادشاهي وکړه. د هغه د مور نوم معکه وه چې د ابشالوم لور وه.

³ابیاه د خپل پلار په شان هماغسې ګناهونه وکړل او هغه د خپل غور نیکه داود معکوس خپل څښتن خدای ته په بشپړه توګه وفادار نه ؤ.

⁴مګر د داود په خاطر د هغه څښتن خدای ابیاه ته زوی ورکړ چې د هغه څخه وروسته په اورشلیم کې پادشاهي وکړي او اورشلیم خوندي وساتي - د داسې څراغ په شان چې نه مړ کیږي، د هغه شاهي کورنۍ به پای ته ونه رسیږي.

⁵څښتن ځکه داسې وکړل چې داود به هغه څه کول چې څښتن ورباندې خوشالېده او هیڅکله یې د هغه د حکمونو څخه سرغړونه نه وه کړې، پرته د اوریا حیتي له پېښې څخه.

⁶هغه جګړه چې د رحبعام او یروبعام ترمنځ پیل شوې وه د ابیاه د ژوند تر پایه پورې یې دوام وکړ.

⁷د ابیاه د پادشاهۍ نورې پېښې او دا چې هغه څه کړي دي، هغه د یهودا د پادشاهانو د تاریخ په کتاب کې لیکل شوي دي. د ابیاه او یروبعام ترمنځ تل جګړه وه.

⁸ابیاه مړ شو او د داود په ښار کې ښخ شو او د هغه زوی آسا د هغه په ځای پادشاه شو.

⁹د اسراییلو د پادشاه یروبعام د پادشاهۍ په شلم کال، آسا د یهودا پادشاه شو.

¹⁰هغه یوڅلوېښت کاله په اورشلیم کې پادشاهي وکړه. د هغه د نیا نوم معکه وه چې د ابشالوم لور وه.

¹¹آسا به د خپل غور نیکه داود په شان هغه څه کول چې څښتن ورباندې خوشالېده.

¹²هغه د خپل هېواد څخه هغه ټول لواطت کاران او فاحشې چې د عبادت په ځایونو کې یې خدمت کاوه وشړلې او هغه ټول بتان چې د هغه نیکونو جوړ کړي وو لېرې کړل.

¹³هغه خپله نیا معکه د ملکې د مور په توګه د خپل مقام څخه لېرې کړه، ځکه چې هغې یو کرغېړن د اشیره بت جوړ کړی ؤ. آسا هغه بت رانسکور کړ او د قدرون په خوړ کې یې وسوزاوه.

¹⁴که څه هم آسا ټولې بتخانې له منځه یو نه وړلې، مګر هغه ټول عمر څښتن ته وفادار پاتې شو.

¹⁵آسا سره زر، سپین زر او هغه ټول شیان چې د هغه پلار او هغه په خپله خدای ته وقف کړي وو، د خدای په کور کې کېښودل.

¹⁶د یهودا پادشاه آسا او د اسراییلو پادشاه بعشا به تل د خپلو پادشاهیو په دوران کې یو د بل سره په جګړې اخته وو.

¹⁷بعشا په یهودا باندې یرغل وکړ او د رامې د ښار په قوي کولو یې پیل وکړ په دې خاطر چې د یهودا د ټولو خلکو تګ او راتګ مخه ونیسي.

¹⁸نو آسا پادشاه هغه ټول سپین زر او سره زر چې د څښتن د کور او د خپلې ماڼۍ په خزانو کې پاتې شوي وو واخیستل. هغه یې خپلو درباریانو ته وسپارل او هغه یې دمشق ته د سوریې پادشاه بنهدد د طبرمون زوی ته، چې د حزیون لمسی ؤ، د دې پیغام سره ولېږل:

¹⁹”زما او ستاسو ترمنځ دې داسې یو تړون وي لکه څنګه چې زما د پلار او ستاسو د پلار ترمنځ ؤ. ګورئ، زه تاسو ته د سپینو زرو او سرو زرو سوغات درلېږم. نو خپل تړون اوس د اسراییلو د پادشاه بعشا سره مات کړئ، ترڅو هغه خپلې لښکرې زما د سیمې څخه وباسي.“

²⁰بنهدد پادشاه د آسا وړاندیز قبول کړ او خپل قوماندانان او لښکرې یې ولېږلې چې د اسراییلو په ښارونو باندې حمله وکړي. هغوی عیون، دان، آبل بیت معکه، د جلیل جهیل او د نفتالي ټوله سیمه ونیوله.

²¹کله چې بعشا پادشاه واورېدل چې څه وشول، هغه د رامه د قوي کولو کار ودراوه او د ترزې ښار ته لاړ.

²²وروسته بیا آسا پادشاه ټول یهودا ته حکم جاري کړ چې ټول خلک پرته له استثنا څخه هغه ټولې تیږې او لرګي چې بعشا غوښتل د رامې ښار پرې قوي کړي، راوړي. آسا په دې موادو باندې مصفه او د بنیامین په سیمه کې د جبع ښار قوي کړ.

²³نور ټول هغه کارونه چې آسا پادشاه د خپلې پادشاهۍ په دوران کې کړي دي، یعنې د هغه د زورورتوب کارونه او هغه ښارونه چې هغه جوړ کړي دي هغه د یهودا د پادشاهانو د تاریخ په کتاب کې لیکل شوي دي. مګر په زوړوالي کې هغه د پښو په ناروغۍ باندې اخته شو.

²⁴وروسته آسا مړ شو او د خپل پلار داود د ښار په شاهي هدیره کې ښخ شو. بیا د هغه زوی یهوشافاط د هغه په ځای پادشاه شو.

²⁵د یهودا د پادشاه آسا د پادشاهۍ په دوهم کال، د یروبعام پادشاه زوی ناداب د اسراییلو پادشاه شو او دوه کاله یې پادشاهي وکړه.

²⁶لکه څنګه چې د هغه پلار د څښتن په مقابل کې ګناه کړې وه، نو هغه هم ګناه وکړه او اسراییلیان یې د ګناه خواته بوتلل.

²⁷بعشا د اخیا زوی چې د یساکار د قبیلې څخه ؤ، د ناداب په ضد یې دسیسه جوړه کړه او کله چې ناداب او ټولو اسراییلي لښکرو د جبتون ښار چې په فلسطین کې ؤ محاصره کاوه، بعشا ناداب وواژه.

²⁸دا پېښه د یهودا د پادشاه آسا د پادشاهۍ په دریم کال وشوه. نو بعشا د ناداب په ځای د اسراییلو پادشاه شو.

²⁹څنګه چې هغه پادشاه شو، د یروبعام د کورنۍ ټول غړي یې ووژل. څرنګه چې څښتن د خپل خدمتګار اخیا نبي په وسیله چې د شیلوه څخه ؤ ویلي وو، د یروبعام د کورنۍ ټول غړي ووژل شول او یو هم ژوندی پاتې نه شو.

³⁰دا پېښه ځکه وشوه چې یروبعام ګناه وکړه، د اسراییلو د ګناهکار کېدلو سبب وګرځېده او په دې ډول یې د اسراییلو د څښتن خدای قهر راوپاراوه.

³¹د ناداب د پادشاهۍ نورې پېښې او دا چې هغه څه کړي دي، د اسراییلو د پادشاهانو د تاریخ په کتاب کې لیکل شوي دي.

³²د یهودا پادشاه آسا او د اسراییلو پادشاه بعشا به تل د خپلو پادشاهیو په دوران کې یو د بل سره په جګړې اخته وو.

³³د یهودا د پادشاه آسا د پادشاهۍ په دریم کال، د اخیا زوی بعشا د ټولو اسراییلو پادشاه شو او هغه څلورویشت کاله په ترزې کې پادشاهي وکړه.

³⁴لکه څنګه چې یروبعام د څښتن په مقابل کې ګناه کړې وه، نو هغه هم ګناه وکړه او اسراییلیان یې د ګناه خواته بوتلل.