Read Pashto (Nangahari) — د پښتو مقدس کتاب اول پادشاهان 20 Bible Online

اول پادشاهان 20 - Pashto (Nangahari) — د پښتو مقدس کتاب bible

اول پادشاهان 20

¹د سوریې پادشاه بنهدد خپلې ټولې لښکرې سره راغونډې کړې او د نورو دوه دېرشو پادشاهانو له خوا چې اسونه او جنګي ګاډۍ ورسره وې د هغه ملاتړ کېده. سامره یې محاصره کړه او په هغې باندې یې برید وکړ.

²بنهدد ښار ته استازي ولېږل چې د اسراییلو پادشاه اخیاب ته ووایي:

³”خپل سره او سپین زر، خپلې ډېرې ښکلې ښځې او ماشومان دې ماته راوسپاره!“

⁴د اسراییلو پادشاه په ځواب کې وویل: ”ای پادشاه زما باداره، څنګه چې تاسو وایئ، زه خپل ځان او هرڅه چې لرم تاسو ته درسپارم.“

⁵وروسته بنهدد بیا استازي ورولېږل چې اخاب ته ووایي: ”ما مخکې تاته ویلي وو چې خپل سره او سپین زر، خپلې ښځې او اولادونه دې ماته راکړه.

⁶مګر سبا په همدې وخت به زه خپل درباریان ستا ښار ته درولېږم چې ستا ماڼۍ او ستا د درباریانو کورونه ولټوي. هرڅه چې د هغوی خوښ شي هغه به واخلي او له ځان سره به یې یوسي.“

⁷اخاب پادشاه د هېواد ټول سپین ږیري راوغوښتل او هغوی ته یې وویل: ”وګورئ چې بنهدد جنجال لټوي! هغه ماته پیغام رالېږلی دی چې خپلې ښځې او اولادونه، خپل سره او سپین زر هغه ته ورکړم او ما ومنله.“

⁸سپین ږیرو او ټولو خلکو ځواب ورکړ: ”د هغه خبرو ته غوږ مه نیسئ! او د هغه غوښتنې ونه منئ.“

⁹نو اخاب د بنهدد استازو ته ځواب ورکړ: ”زما بادار د سوریې پادشاه ته ووایئ چې د هغه اولنۍ غوښتنه منم، مګر دوهمه غوښتنه یې نه شم منلی.“ هغوی لاړل او بنهدد ته یې بېرته ځواب وروړ.

¹⁰بیا بنهدد اخاب ته یو بل پیغام ورولېږه: ”زه به سامره بېخي له منځه یوسم، چې هلته دومره خاوره پاتې نه شي چې زما نفرو ته یو موټی هم ورسیږي. که چېرې ما دا کار ونه کړ نو خدایان دې ما ووژني.“

¹¹اخاب پادشاه په ځواب کې وویل: ”بنهدد پادشاه ته ووایه چې رښتینی عسکر د جګړې څخه وروسته لافې وهي، له جګړې څخه مخکې نه.“

¹²بنهدد او نورو پادشاهانو په خپلو خېمو کې شراب څښل چې دا پیغام یې تر لاسه کړ. خپلو نفرو ته یې امر وکړ: ”په سامره باندې د حملې دپاره تیار شئ.“ بیا هغوی د جګړې دپاره خپل سنګرونه ونیول.

¹³په هماغه وخت کې یو نبي اخاب پادشاه ته راغی او ویې ویل: ”څښتن داسې وایي: ته دا لوی لښکر وینې؟ تا به نن په هغوی باندې بریالی کړم او بیا به پوه شې چې زه څښتن یم.“

¹⁴اخاب پوښتنه وکړه: ”دا کار به څوک وکړي؟“ نبي په ځواب کې وویل: ”څښتن داسې وایي: د سیمه ایزو حکمرانانو ځوانان عسکر به دا کار وکړي.“ هغه پوښتنه وکړه: ”څوک به جګړه پیل کړي؟“ نبي ځواب ورکړ: ”ته.“

¹⁵نو اخاب هغه ځوانان عسکر چې د سیمه ایزو حکمرانانو تر امر لاندې وو او د هغوی شمېر ټول دوه سوه دوه دېرش تنو ته رسېده سره راټول کړل. وروسته بیا هغه د اسراییلو لښکر چې ټول اووه زره تنه وو جګړې ته تیار کړل.

¹⁶د غرمې په وخت، په داسې حال کې چې بنهدد او د هغه سره دوه دېرش ملګرو پادشاهانو په خپلو خېمو کې شراب څښل او نېشه کېدل، د اخاب لښکر جنګ ته راووتل.

¹⁷لومړی د سیمه ایزو حکمرانانو ځوانان عسکر مخکې شول. هغه ترصدچیان چې بنهدد لېږلي وو، هغه ته یې خبر ورکړ چې د سامرې څخه یوه ډله عسکر راروان دي.

¹⁸بنهدد امر وکړ: ”هغوی ژوندي ونیسئ! دا مهمه نه ده چې هغوی د جنګ دپاره راغلي دي یا د سولې دپاره.“

¹⁹هغو د سیمه ایزو حکمرانانو د ځوانو عسکرو د جګړې مشري کوله او د اسراییلیانو لښکر ورپسې وو.

²⁰هر یو خپل مخالف نفر وواژه. پاتې سوریایي عسکر وتښتېدل او اسراییلیان ورپسې شول. بنهدد په اس باندې سپور شو او د خپلو ځینو سپرو عسکرو سره وتښتېد.

²¹مګر اخاب او د هغه عسکرو هغوی تعقیب کړل او د هغوی اسونه او جنګي ګاډۍ یې له منځه یوړې. اخاب او اسراییلي لښکرو سوریایانو ته دروند زیان ورورساوه.

²²وروسته، هغه نبي اخاب پادشاه ته ورغی او ویې ویل: ”بېرته لاړ شه، خپل ځواکونه قوي کړه او یو ښه پلان جوړ کړه، ځکه چې په راتلونکي پسرلي کې به بنهدد یو ځل بیا په تاسو باندې حمله وکړي.“

²³په دې ترڅ کې، د بنهدد درباریانو هغه ته مشوره ورکړه: ”د اسراییلو خدایان د غرونو خدایان دي، نو ځکه هغوی مونږ ته ماتې راکړه. مګر که چېرې مونږ د هغوی سره په هواره ځمکه باندې وجنګېږو، نو مونږ به په رښتیا سره هغوی ته ماتې ورکړو.

²⁴تاسو باید داسې کار وکړئ، هغه دوه دېرش پادشاهان لېرې کړئ او د هغوی په ځای د لښکرو قوماندانان وټاکئ.

²⁵نو هغومره عسکر، اسونه او جنګي ګاډۍ تیارې کړئ ترڅو ستاسو لښکرې د پخوا په شان قوي شي. مونږ به د اسراییلي لښکرو سره په هواره ځمکه باندې جګړه وکړو او هغوی ته به ماتې ورکړو.“ بنهدد ومنله او د هغوی په مشورې باندې یې عمل وکړ.

²⁶په راتلونکي پسرلي کې بنهدد خپلې لښکرې راغونډې کړې او د افیق ښار ته روان شو چې له اسراییلو سره جګړه وکړي.

²⁷اسراییلیان د جګړې دپاره راغونډ شول او د جګړې سامانونه یې واخیستل. هغوی روان شول او په دوو ډلو کې یې سوریایانو ته مخامخ خپلې خېمې ودرولې. ټوله سیمه د سوریایانو څخه ډکه وه، مګر اسراییلیان د هغوی په پرتله لکه د وزو د دوه کوچنیو رمو په شان ښکاره کېدل.

²⁸یو نبي د دې پیغام سره د اسراییلو پادشاه اخاب ته ورغی او ورته ویې ویل: ”څښتن داسې وایي: سوریایان فکر کوي چې زه د غرونو خدای یم او د هوارې خدای نه یم. نو زه به دا قوي لښکرې تاته تسلیم کړم، ترڅو ته او ستا خلک پوه شئ چې زه څښتن یم.“

²⁹دواړه لښکرې په خپلو کمپونو کې د اووه ورځو دپاره یو بل ته مخامخ پاتې شوې. په اوومه ورځ جګړه پیل شوه او په هماغه ورځ اسراییلیانو سل زره سوریایي پیاده عسکر ووژل.

³⁰د سوریایي لښکرو پاتې نفر بېرته افیق ته وتښتېدل، مګر په اووه ویشت زرو تنو باندې د ښار دېوال راولوېد. بنهدد هم د افیق ښار ته وتښتېد او د یو کور په دنننۍ کوټه کې پټ شو.

³¹د هغه درباریانو بنهدد ته وویل: ”مونږ اورېدلي دي چې د اسراییلو پادشاهان زړه سواندي خلک دي. مونږ ته اجازه راکړئ چې د ویر کالي د خپلو ملاګانو څخه راتاو کړو، رسۍ په خپلو غاړو کې واچوو او د اسراییلو پادشاه اخاب ته ورشو، کېدای شي چې هغه مو ژوندی پرېږدي.“

³²هغوی د ویر کالي واغوستل او رسۍ یې په خپلو غاړو کې واچولې، بیا اخاب ته ورغلل او ویې ویل: ”ستاسو نوکر بنهدد ستاسو څخه غواړي چې هغه ژوندی پرېږدئ.“ اخاب پوښتنه وکړه: ”آیا هغه تر اوسه پورې ژوندی پاتې دی؟ بنهدد ماته لکه د ورور په شان دی.“

³³د بنهدد درباریانو دا یو نېک فال وګاڼه او کله چې هغه وویل: ”ورور“ هغوی په چالاکۍ سره د هغه د خولې څخه خبره واخیستله: ”تاسو صحیح وایئ! تاسو او بنهدد لکه د ورونو په شان یئ.“ اخاب وویل: ”لاړ شئ او هغه ماته راولئ.“ کله چې بنهدد بیرون راووت، اخاب هغه په خپلې جنګي ګاډۍ کې سپور کړ.

³⁴بنهدد وویل: ”زه به هغه ښارونه چې زما پلار ستاسو د پلار څخه نیولي وو بېرته درکړم او تاسو کولی شئ چې په دمشق کې د خپل ځان دپاره د سوداګرۍ یو مرکز جوړ کړئ لکه څنګه چې زما پلار په سامره کې جوړ کړی ؤ.“ اخاب ځواب ورکړ: ”که چېرې دا شرطونه پوره کړې، نو زه به تا خوشې کړم.“ بیا اخاب د هغه سره د سولې تړون وکړ او اخاب بنهدد ته اجازه ورکړه چې لاړ شي.

³⁵په دې وخت کې د څښتن په حکم د نبیانو د ډلې څخه یو نبي خپل ملګري ته وویل: ”ما ووهه“، مګر هغه د وهلو څخه انکار وکړ.

³⁶نو نبي هغه ته وویل: ”تا د څښتن د حکم څخه سرغړونه وکړه، څنګه چې زما څخه روان شې، یو زمری به تا ووژني.“ څنګه چې هغه لاړ، یو زمری راغی او هغه یې وواژه.

³⁷هغه نبي یو بل سړی راپیدا کړ او ویې ویل: ”مهرباني وکړه، ما ووهه!“، نو هغه سړي هغه وواهه او ټپي یې کړ.

³⁸نبي لاړ او په خپل مخ باندې یې پټۍ کېښوده چې خپله څېره بدله کړي. بیا هغه لاړ، د سرک په غاړه ودرېد او انتظار یې کاوه چې کله به د اسراییلو پادشاه تېریږي.

³⁹کله چې پادشاه تېرېده، نبي چیغې ووهلې: ”اعلیحضرته! زه د جنګ په میدان کې وم چې یو چا ماته یو بندي راوست او راته ویې ویل چې هغه وساته. که چېرې هغه وتښتېده نو یا به ووژل شې او یا به درې زره د سپینو زرو سکې ورکوې.

⁴⁰مګر زه په نورو کارونو کې مشغول شوم او هغه بندي وتښتېد.“ اخاب ځواب ورکړ: ”لکه څنګه چې تا خپله سزا وټاکله، هماغسې به وشي.“

⁴¹هغه سړي په چالاکۍ سره د خپل مخ څخه پټۍ وشلوله او پادشاه هغه وپېژانده چې هغه د نبیانو له جملې څخه دی.

⁴²نبي پادشاه ته وویل: ”څښتن داسې وایي: هغه بنهدد چې ما په مرګ باندې محکوم کړی ؤ هغه دې ازاد کړ چې لاړ شي. په دې خاطر ته به د هغه په بدل کې او ستا لشکر به د هغه د لښکرو په بدل کې ووژل شي.“

⁴³اخاب په قهر او خفګان سره بېرته خپل کور سامرې ته ستون شو.