Read Pashto (Nangahari) — د پښتو مقدس کتاب اول پادشاهان 21 Bible Online

اول پادشاهان 21 - Pashto (Nangahari) — د پښتو مقدس کتاب bible

اول پادشاهان 21

¹یو سړی چې نابوت نومېده، په یزرعیل کې د اخاب پادشاه د ماڼۍ تر څنګ د انګورو باغ درلود.

²یوه ورځ اخاب وویل: ”ای نابوته، ستا باغ زما د ماڼۍ په څنګ کې دی، هغه ماته راکړه چې د هغه څخه د سابو باغ جوړ کړم. زه به تاته د انګورو ډېر ښه باغ درکړم او یا که ته غواړې د هغه بیه به درکړم.“

³نابوت ځواب ورکړ: ”دا باغ ماته د خپلو نیکونو څخه په میراث پاتې شوی دی. خدای دې نه کوي چې زه هغه تاته درکړم.“

⁴نو اخاب د هغه څه له کبله چې نابوت ورته وویل په قهر او خفګان سره خپل کور ته لاړ. په خپله بستره کې پرېوت، دېوال ته یې مخ واړاوه او هیڅ شی یې ونه خوړل.

⁵د هغه ښځه ایزابل ورغله او پوښتنه یې ورڅخه وکړه: ”څه درباندې شوي دي؟ ډوډۍ ولې نه خورې؟“

⁶اخاب په ځواب کې وویل: ”ما د نابوت یزرعیلي څخه وغوښتل چې خپل د انګورو باغ راباندې خرڅ کړي او یا د هغه په بدل کې بل باغ واخلي. مګر هغه ونه منله چې خپل د انګورو باغ ماته راکړي.“

⁷ایزابل پوښتنه وکړه: ”آیا ته د اسراییلو پادشاه نه یې؟ د بسترې څخه راپورته شه او یو څه وخوره! مه پریشانه کېږه، زه به د نابوت د انګورو باغ تاته واخلم.“

⁸بیا ایزابل یو څو لیکونه د اخاب له خوا ولیکل، د هغه مهر یې ورباندې ولګاوه او د هغه ښار سپین ږیرو او مشرانو ته یې واستول چېرته چې نابوت اوسېده.

⁹په لیکونو کې لیکلي شوي وو: ”اعلان وکړئ چې خلک دې روژه ونیسي او راغونډ دې شي. بیا نابوت د غونډې په سر کښېنوئ.

¹⁰دوه بدماشان هغه ته مخامخ کښېنوئ چې تور ورباندې ولګوي چې هغه د خدای او پادشاه سپکاوی کړی دی. بیا هغه د ښار نه بهر بوځئ او سنګسار یې کړئ چې مړ شي.“

¹¹کله چې هغوی د ایزابل لیکونه تر لاسه کړل، څه چې هغې غوښتي وو هغوی هماغسې وکړل.

¹²هغوی اعلان وکړ چې نن روژه ونیسئ. خلک راغونډ شول او نابوت یې د غونډې په سر کې کښېناوه.

¹³په دې وخت کې دوه بدماشان راننوتل او نابوت ته مخامخ کښېناستل. بیا هغوی په نابوت باندې تور ولګاوه چې هغه خدای او پادشاه ته سپکاوی کړی دی، نو خلکو نابوت بیرون وویست او هغه یې سنګسار کړ او مړ شو.

¹⁴د یزرعیل مشرانو بېرته ایزابل ته پیغام ولېږه ویې ویل چې ”نابوت سنګسار او ووژل شو.“

¹⁵څنګه چې ایزابل د هغوی پیغام تر لاسه کړ، هغې اخاب ته وویل: ”اوس کولی شې چې د انګورو هغه باغ واخلې چې نابوت د هغه د خرڅولو څخه انکار کړی ؤ. هغه مړ شوی دی.“

¹⁶هغه وخت چې اخاب واورېدل چې نابوت مړ شوی دی، سمدلاسه روان شو چې د هغه باغ لاس ته راوړي.

¹⁷څښتن ایلیا تشبي نبي ته وویل:

¹⁸”لاړ شه د اسراییلو د پادشاه اخاب سره وګوره څوک چې په سامره کې پادشاهي کوي. هغه د نابوت د انګورو باغ نیولی دی او همدا اوس په دې باغ کې دی.

¹⁹لاړ شه او هغه ته ووایه چې زه داسې وایم: ای اخابه، تا نابوت په قتل ورساوه او د هغه جایداد دې ونیوه. په هماغه ځای کې چې سپیو د نابوت وینه وڅټله، ستا وینه به هم وڅټي.“

²⁰کله چې اخاب، ایلیا ولید، هغه وویل: ”ای زما دښمنه، آخر دې پیدا کړم.“ ایلیا ځواب ورکړ: ”هو، پیدا مې کړې! ای اخابه، تا هغه بد کارونو ته ځان سپارلی دی چې څښتن ورڅخه کرکه کوي.

²¹نو څښتن تاته وایي: اوس به زه په تا باندې یوه بلا راولم. زه به تا او ستا د کورنۍ هر یو نارینه که هغه غلام وي یا ازاد، له منځه یوسم.

²²ستا کورنۍ به د نباط زوی یروبعام پادشاه او د اخیا د زوی بعشا پادشاه د کورنیو په شان شي. ته د اسراییلیانو د ګناهکارۍ سبب ګرځېدلی یې، نو ځکه دې زما قهر راپارولی دی.

²³همدارنګه د ایزابل په باره کې څښتن داسې وایي: د هغې بدن به په یزرعیل کې سپي وخوري.

²⁴ستا د هغو متعلقینو بدنونه چې په ښار کې مړه کیږي هغه به سپي وخوري او په صحرا کې چې مړه کیږي هغه به مرغان وخوري.“

²⁵(هیچا د څښتن د امر څخه په سرغړونه کې د اخاب په اندازه داسې ټینګه اراده نه درلوده - او ایزابل هغه تشویقاوه.

²⁶تر ټولو بده خبره دا وه چې هغه د بتانو عبادت کاوه، لکه څنګه چې مخکې به اموریانو کاوه. څښتن هغوی له هغه هېواد څخه شړلي وو او دا هېواد یې اسراییلو ته ورکړی ؤ.)

²⁷کله چې اخاب دا خبرې واورېدې، هغه خپل کالي وشلول او شپه او ورځ به یې د ویر کالي اغوستي وو. هغه خفه ؤ او روژه یې نیوله.

²⁸څه موده وروسته، څښتن ایلیا نبي ته وویل:

²⁹”ته وینې چې اخاب ماته خپل ځان څومره عاجز کړی دی؟ ترڅو پورې چې هغه ژوندی وي زه به په هغه باندې بلا نه راولم. مګر زه به د هغه د زوی د ژوند په دوران کې د اخاب کورنۍ په بلا اخته کړم.“