Read Pashto (Nangahari) — د پښتو مقدس کتاب بادشاهانو دويم 1 Bible Online

بادشاهانو دويم 1 - Pashto (Nangahari) — د پښتو مقدس کتاب bible

بادشاهانو دويم 1

¹د بنى اِسرائيلو بادشاه اخى‌اب د مرګ نه پس، د موآب مُلک د بنى اِسرائيلو خِلاف بغاوت وکړو.

²په سامريه کښې د بنى اِسرائيلو بادشاه اخزياه د خپل محل د بره کوټې د کړکئ د جالۍ نه راپرېوتو او سخت زخمى شو. نو هغۀ پېغام وړُونکى ولېږل چې د عقرون په ښار کښې د فلستيانو د خُدائ بعل زبوب نه پوښتنه وکړى چې دے به روغ شى او که نه.

³خو د مالِک خُدائ يوې فرِښتې الياس ته حُکم وکړو، چې هغه د تِشبى پېغمبر وو، چې دے لاړ شى او د اخزياه بادشاه پېغام وړُونکو سره مِلاو شى او تپوس ترې نه وکړى چې، ”تاسو د عقرون خُدائ بعل زبوب سره مشورې له ولې روان يئ؟ ځکه چې ستا خيال دا دے چې په بنى اِسرائيل کښې خُدائ نشته؟

⁴بادشاه ته ووايئ چې، مالِک خُدائ وائى چې تۀ به د کټ نه پا نۀ څې، او خامخا به مړ شې!“ الياس د مالِک خُدائ په حُکم عمل وکړو،

⁵او پېغام وړُونکى بادشاه ته راواپس شول. هغۀ ترې نه تپوس وکړو، ”تاسو ولې واپس راغلئ؟“

⁶هغوئ ورته ووئيل، ”مونږ د يو سړى سره مِلاو شوُو چې هغۀ مونږ ته ووئيل چې واپس لاړ شئ او بادشاه نه تپوس وکړئ چې تا د عقرون خُدائ بعل زبوب سره د مشورې دپاره پېغام وړُونکى ولې لېږلى دى؟ ځکه چې ستا خيال دا دے چې په بنى اِسرائيلو کښې خُدائ نشته؟ تۀ به د کټ نه پا نۀ څې، او مړ به شې!“

⁷بادشاه ترې نه تپوس وکړو، ”هغه سړے څنګه ښکارېدو؟“

⁸هغوئ ورته ووئيل، ”د هغه سړى په وجود ډير وښتۀ چې د څرمنې په پټۍ باندې يې ملا تړلې وه.“ بادشاه ووئيل، ”هغه د تِشبى الياس دے!“

⁹بيا هغۀ د پنځوسو سړو سره يو آفسر ولېږلو چې الياس راولى. آفسر الياس پېدا کړو چې په يو غر باندې ناست وو او ورته يې ووئيل، ”د خُدائ پاک خِدمتګاره! بادشاه تا له حُکم درکوى چې لاندې راشه.“

¹⁰الياس ورته ووئيل، ”که زۀ د خُدائ پاک خِدمتګار يم، نو د آسمان نه دې اور راشى او تا او ستا سړى دې ووژنى!“ نو سمدستى اور راکُوز شو او آفسر او د هغۀ سړى يې ووژل.

¹¹بادشاه د پنځوسو سړو سره يو بل آفسر ورولېږلو چې هغه وروختلو او الياس ته يې ووئيل، ”د خُدائ پاک خِدمتګاره، بادشاه تا له حُکم درکوى چې فوراً لاندې راکُوز شه!“

¹²الياس ورته ووئيل، ”که زۀ د خُدائ پاک خِدمتګار يم، نو د آسمان نه دې اور راکُوز شى او تا او ستا سړى دې ووژنى!“ نو سمدستى اور راکُوز شو او آفسر او د هغۀ سړى يې ووژل.

¹³بادشاه يو ځل بيا د پنځوسو سړو سره يو آفسر ورولېږلو. هغه غرۀ ته وختلو، هغه د الياس په مخکښې ټيټ شو او سوال زارى يې ورته وکړه چې، ”د خُدائ پاک خِدمتګاره، په ما او زما په سړو باندې رحم وکړه. زمونږ ژوند بچ کړه!

¹⁴هغه نور دوه آفسران او د هغوئ سړى په آسمانى اور باندې وژلى شوى دى، خو په ما باندې رحم وکړه!“

¹⁵د مالِک خُدائ فرِښتې الياس ته ووئيل، ”د هغۀ سره لاړ شه او يرېږه مه.“ نو الياس د هغه آفسر سره بادشاه له لاړو

¹⁶او بادشاه ته يې ووئيل، ”مالِک خُدائ داسې وائى چې تا ولې د عقرون خُدائ بعل زبوب نه تپوس دپاره پېغام وړُونکى لېږلى وُو؟ ستا څۀ خيال وو چې په بنى اِسرائيلو کښې خُدائ نشته؟ نو په دې وجه تۀ به روغ نۀ شې، او خامخا به مړ شې!“

¹⁷لکه څنګه چې مالِک خُدائ د الياس په ذريعه وئيلى وُو، اخزياه مړ شو. د اخزياه زامن نۀ وُو، نو د يهوداه بادشاه د يهوسفط زوئ يهورام د بادشاهۍ په دويم کال د اخزياه ورور يورام د هغۀ نه پس بادشاه جوړ شو.

¹⁸اخزياه بادشاه چې نور هر څۀ هم کړى وُو هغه د بنى اِسرائيلو د بادشاهانو په تاريخ کښې ليکلے شوى دى.