Read Pashto (Nangahari) — د پښتو مقدس کتاب بادشاهانو دويم 13 Bible Online

بادشاهانو دويم 13 - Pashto (Nangahari) — د پښتو مقدس کتاب bible

بادشاهانو دويم 13

¹د يهوداه بادشاه اخزياه زوئ يوآس د بادشاهۍ په درويشتم کال، د ياهُو زوئ يهوآخز د بنى اِسرائيلو بادشاه شو او هغۀ په سامريه کښې اوولس کاله بادشاهى وکړه.

²هغۀ د يربعام بادشاه په شان د مالِک خُدائ خِلاف ګناه وکړه چا چې بنى اِسرائيليان د ګناه طرف ته بوتلى وُو، هغۀ هيڅ کله خپل بد عملونه نۀ پرېښودل.

³نو مالِک خُدائ بنى اِسرائيلو ته غصه شو او هغۀ د شام بادشاه حِزائيل او د هغۀ زوئ بِن‌حدد پرېښودل چې بنى اِسرائيلو له بار بار شکست ورکړى.

⁴نو يهوآخز مالِک خُدائ ته سوال وکړو او مالِک خُدائ ته پته وه چې د شام بادشاه د بنى اِسرائيلو سره څومره سخت ظلم کوى، نو مالِک خُدائ د هغۀ سوال واورېدو.

⁵نو مالِک خُدائ بنى اِسرائيلو له يو خلاصوُونکے راولېږلو، چې هغوئ يې د شاميانو نه آزاد کړل، نو بنى اِسرائيلو د مخکښې په شان په آمن کښې ژوند تېرولو.

⁶خو هغوئ بيا هم هغه ګناهُونه پرې نۀ ښودل چې يربعام بادشاه بنى اِسرائيليان هغې طرف ته بوتلى وُو او د اشيرې بُت ستنه په سامريه کښې پاتې شوه.

⁷د يهوآخز سره صرف پنځوس په اسونو سوارۀ کسان، لس جنګى ګاډۍ او لس زره پياده فوجيان پاتې وُو، ځکه چې د شام بادشاه هغوئ تباه کړى وُو او سم غوبل يې ورباندې کړې وو.

⁸يهوآخز چې نور هر څۀ هم کړى وُو سره د هغۀ د ټولو بهادرۍ کارونو، هر څۀ د بنى اِسرائيلو د بادشاهانو په تاريخ کښې ليکلے شوى دى.

⁹هغه مړ شو او په سامريه کښې ښخ شو او د هغۀ زوئ يوآس د هغۀ نه پس بادشاه شو.

¹⁰د يهوداه بادشاه يوآس د بادشاهۍ په اووۀ دېرشم کال، د يهوآخز زوئ يهوآس د بنى اِسرائيلو بادشاه شو او هغۀ په سامريه کښې شپاړس کاله حکومت وکړو.

¹¹هغۀ هم د مالِک خُدائ خِلاف ګناه وکړه او د يربعام د بدو لارو نه نۀ اوړېدو، چا چې بنى اِسرائيليان د ګناه طرف ته بوتلى وُو.

¹²نور هر څۀ چې يهوآس کړى وُو، سره د يهوداه بادشاه امصياه خِلاف په جنګ کښې د هغۀ بهادرى، هغه د بنى اِسرائيلو د بادشاهانو په تاريخ کښې ليکلے شوى دى.

¹³يهوآس مړ شو او د سامريه په شاهى اديره کښې ښخ شو او د هغۀ زوئ بادشاه شو چې د هغۀ نوم هم يربعام وو.

¹⁴اليشع پېغمبر په يوه سخته بيمارۍ بيمار شو او چې هغه مړ کېدو نو د بنى اِسرائيلو بادشاه يهوآس مِلاوېدو له ورَغلو او د هغۀ د حالت په ليدو باندې يې ژړل. هغۀ چغې وهلې، ”زما پلاره، زما پلاره! تۀ د بنى اِسرائيلو تکړه حِفاظت کوُونکے وې!“

¹⁵اليشع حُکم ورکړو، ”لينده او يو څو غشى واخله.“ نو يهوآس واخستل،

¹⁶او اليشع هغۀ ته ووئيل چې، ”د غشو ويشتلو دپاره تيار شه.“ نو بادشاه هم هغه شان وکړل او اليشع خپل لاسونه د بادشاه په لاسونو کېښودل.

¹⁷نو د پېغمبر په خبرو يې عمل وکړو، بادشاه هغه کړکئ کولاو کړه چې د شام طرف ته وه. اليشع ورته ووئيل، ”غشے په زمکه ووله!“ څنګه چې بادشاه غشے وويشتو، نو پېغمبر ووئيل، ”تۀ د مالِک خُدائ غشے يې، په کوم باندې چې به شام فتح کړى. تۀ به په افيق کښې د شاميانو سره تر هغې پورې جنګ کوې چې شکست ورکړې.“

¹⁸بيا اليشع بادشاه ته ووئيل چې، ”نور غشى واخله او د دې سره زمکه ووهه.“ نو بادشاه درې ځلې زمکه ووهله او بيا يې بس کړل.

¹⁹په دې باندې اليشع غصه شو او بادشاه ته يې ووئيل، ”تا له په کار وُو چې پينځۀ شپږ ځلې دې وهلے، نو تا به په شاميانو باندې پوره فتح موندلے وے، خو اوس به تۀ هغوئ له صِرف درې ځل شکست ورکړې.“

²⁰اليشع مړ شو او ښخ شو. هر کال به د سپرلى په موسم کښې د موآبيانو لښکر د بنى اِسرائيلو په مُلک حمله کوله.

²¹د يو سړى په جنازه کښې، يو لښکر وليدلے شو او خلقو د اليشع په قبر باندې مړے وروغورزولو. نو چې څنګه لاش د اليشع د قبر سره لګېدو، نو هغه کس راژوندې شو او ودرېدو.

²²د يهوآخز په ټوله بادشاهۍ کښې د شام بادشاه حِزائيل به په بنى اِسرائيلو زياتے کولو،

²³خو مالِک خُدائ په هغوئ مهربان او رحم کوُونکے وو. او هغوئ يې دې ته نۀ پرېښودل چې تباه شى، خو د هغه تړون په وجه يې د هغوئ مدد کولو، چې کوم يې د اِبراهيم، اِسحاق او يعقوب سره کړے وو. هغۀ هيڅ کله خپل خلق نۀ هېرول.

²⁴کله چې د شام بادشاه حِزائيل مړ شو نو د هغۀ زوئ بِن‌حدد بادشاه شو.

²⁵بيا د بنى اِسرائيلو بادشاه يهوآس بِن‌حدد له درې ځله شکست ورکړو او هغه ښارونه يې بيا قبضه کړل چې د يهوآخز د بادشاهۍ په دوران کښې بِن‌حدد نيولى وُو، يهوآخز د يهوآس پلار وو.