Read Pashto (Nangahari) — د پښتو مقدس کتاب بادشاهانو دويم 16 Bible Online

بادشاهانو دويم 16 - Pashto (Nangahari) — د پښتو مقدس کتاب bible

بادشاهانو دويم 16

¹د بنى اِسرائيلو بادشاه د رملياه زوئ فقح د بادشاهۍ په اوولسم کال، د يوتام زوئ احاز د يهوداه بادشاه شو

²چې عُمر يې شل کاله وو او هغۀ په يروشلم باندې شپاړس کاله بادشاهى وکړه. هغۀ هغه کار نۀ کولو چې د مالِک خُدائ د هغۀ د خُدائ پاک په نظر کښې ښۀ وو، اګر چې د هغۀ پلار نيکۀ داؤد ښۀ کارونه کړى وُو

³خو د بنى اِسرائيلو بادشاهانو په مِثالونو يې دومره عمل کولو، چې خپل زوئ يې هم په اور کښې قربانى کړو او د هغه خلقو پليت رِواج يې خپل کړے وو کوم چې مالِک خُدائ د هغه مُلک نه ويستلى وُو کله چې بنى اِسرائيليان مخ په وړاندې تلل،

⁴په غرونو باندې او د سورى د هرې ونې لاندې، د غېرو قومونو د عِبادت په ځايُونو کښې احاز قربانۍ پېش کولې او خوشبوئى يې سوزوله.

⁵د شام بادشاه رضين او د بنى اِسرائيلو بادشاه فقح په يروشلم باندې حمله وکړه او دا يې محاصره کړو، خو احاز له يې شکست ورنۀ کړو.

⁶هم په هغه وخت، د ادوم بادشاه د ايلات ښار بيا ونيولو او د يهوداه اوسېدونکى يې د هغې ځائ نه وشړل. ادوميان په ايلات کښې دېره شول او تر اوسه پورې هلته اوسېږى.

⁷احاز د اسور بادشاه تغلت فلاسر له د دې پېغام سره سړى ولېږل، ”زۀ ستاسو وقف شوے خِدمت کوُونکے يم. راشه او ما د شام او بنى اِسرائيلو د بادشاهانو د حملې نه بچ کړه.“

⁸احاز د مالِک خُدائ دکور او د محل د خزانې نه سرۀ زر او سپين زر هم واخستل او بادشاه له يې د محصُول په توګه ولېږل.

⁹د احاز د غوښتنې په جواب کښې تغلت فلاسر د دمشق خِلاف د خپل لښکر سره روان شو، دا يې قبضه کړو او رضين بادشاه يې ووژلو او خلق يې قير ته قېديان بوتلل.

¹⁰کله چې احاز بادشاه د تغلت فلاسر سره د مِلاوېدو دپاره دمشق ته لاړو، نو هلته يې قربان‌ګاه وليده او اورِياه اِمام له يې هم د دې په شان نمونه او ټول تفصيل ورولېږلو.

¹¹نو اورِياه هم د دې په شان يوه قربان‌ګاه جوړه کړه او د احاز د واپسۍ نه مخکښې يې دا تياره کړه.

¹²د دمشق نه په واپسۍ باندې، احاز وليدل چې قربان‌ګاه جوړه وه نو قربانى ورباندې پېش کړه.

¹³نو هغۀ په دې باندې د ځناورو سوزېدونکې قربانۍ او د غلې نذرانې پېش کړې او په دې باندې يې د شرابو نذرانه توئ کړه او د وينې د سلامتۍ نذرانه يې ورباندې واچوله.

¹⁴مالِک خُدائ ته وقف شوې د زېړو قربان‌ګاه د نوې قربان‌ګاه او د مالِک خُدائ د کور په مينځ کښې وه، نو احاز دا د خپلې نوې قربان‌ګاه شمالى طرف ته يوړه.

¹⁵بيا هغۀ اورِياه ته حُکم وکړو، ”دا لويه قربان‌ګاه زما دپاره د سحر سوزېدونکې نذرانې او د ماښام د غلې نذرانې دپاره اِستعمالوه او د بادشاه او د خلقو د سوزېدونکې نذرانې، د غلې نذرانې او د خلقو د څښلو نذرانې دپاره يې اِستعمالوه. په دې باندې د هغه ټولو ځناورو وينه تويوه چې کوم قربانى شوى وى. خو د زېړو قربان‌ګاه زما دپاره وساته چې د فال دپاره يې اِستعمالوم.“

¹⁶نو اورِياه هم هغه شان وکړل چې څنګه بادشاه حُکم کړے وو.

¹⁷احاز بادشاه د زېړو هغه تختې لرې کړې چې په قربان‌ګاه کښې اِستعمالېدلې او هغه ښانکُونه يې لرې کړل چې ورباندې پراتۀ وُو، هغۀ د زېړو د دولسو غوَيو د شا نه د زېړو ډيګۍ هم واخستله او دا يې د کاڼى په يو بُنياد باندې کېښودله.

¹⁸د اسور بادشاه د خوشحالولو دپاره، احاز د مالِک خُدائ د کور نه د سبت د ورځې د شاهى تخت نه پاس دالان هم لرې کړو او د مالِک خُدائ د کور د بادشاه د ننوتلو ذاتى دروازه يې بنده کړه.

¹⁹نور هر څۀ چې احاز بادشاه کړى دى هغه د يهوداه د بادشاهانو په تاريخ کښې ليکلے شوى دى.

²⁰احاز مړ شو او د داؤد ښار په شاهى اديره کښې ښخ شو او د هغۀ زوئ حزقياه د هغۀ نه پس بادشاه جوړ شو.