Read Pashto (Nangahari) — د پښتو مقدس کتاب بادشاهانو دويم 21 Bible Online

بادشاهانو دويم 21 - Pashto (Nangahari) — د پښتو مقدس کتاب bible

بادشاهانو دويم 21

¹منسى د دولسو کالو وو چې هغه د يهوداه بادشاه جوړ شو او هغۀ په يروشلم پينځۀ پنځوس کاله بادشاهى وکړه. د هغۀ مور حفصيباه وه.

²منسى د هغه قومونو پليت رِواجونه کول چې مالِک خُدائ د بنى اِسرائيلو نه وړاندې شړلى وُو، منسى د مالِک خُدائ خِلاف ګناه وکړه.

³هغۀ د غېرو قومونو د عِبادت ځايُونه بيا جوړ کړل کوم چې د هغۀ پلار حزقياه تباه کړى وُو، هغۀ د بعل د عِبادت دپاره قربان‌ګاه جوړې کړې او د بنى اِسرائيلو بادشاه اخى‌اب په شان د اشيرې بُت نښه يې جوړه کړه. منسى د ستورو عِبادت هم کولو.

⁴هغۀ د مالِک خُدائ په کورکښې د غېرو قومونو قربان‌ګاه جوړې کړې، په هغه ځائ کښې چې مالِک خُدائ وئيلى وُو، ”زما نوم به په يروشلم کښې همېشه باقى پاتې وى.“

⁵د مالِک خُدائ د کور په دوو دربارونو کښې هغۀ د ستورو د عِبادت دپاره قربان‌ګاه جوړې کړې.

⁶هغۀ خپل زوئ د سوزېدونکې نذرانې په توګه پېش کړو. هغۀ د کوډو او جادو نه کار واخستو او قسمت ښودونکو او فالګرو سره يې مشورې کولې. هغۀ د مالِک خُدائ خِلاف لويه ګناه وکړه او د هغۀ غصه يې راوپاروله.

⁷هغۀ د اشيرې بُت نښه د مالِک خُدائ په کور کښې کېښوده، چې د دې په باره کښې مالِک خُدائ داؤد او د هغۀ زوئ سليمان ته وئيلى وُو، ”په يروشلم کښې، په دې کور کښې هغه ځائ دے چې ما د بنى اِسرائيلو د ټولو دولسو قبيلو نه خوښ کړے دے چې چرته به زما د نوم درناوے کېږى.

⁸او که بنى اِسرائيليان زما ټول حُکمونه منى او هغه ټول قانون ومنى چې زما خِدمت کوُونکى موسىٰ هغوئ له ورکړے دے، نو هغوئ به د هغه مُلک نه نۀ شى شړلے چې ما د هغوئ پلار نيکۀ له ورکړے وو.“

⁹خو د يهوداه خلقو د مالِک خُدائ تابعدارى نۀ کوله او منسى هغوئ د هغې نه هم لويو ګناهونو کولو طرف ته بوتلل چې کوم هغه قومونو کړى وُو چې مالِک خُدائ هغوئ د هغه مُلک نه شړلى وُو چې په کوم وخت کښې د هغۀ خلق مخ په وړاندې تلل.

¹⁰د خپلو خِدمت کوُونکو پېغمبرانو په ذريعه مالِک خُدائ وئيلى وُو،

¹¹”منسى بادشاه پليت کارونه کړى دى، د هغه کارونو نه هم ډېر بد چې کوم کنعانيانو کړى وُو، او هغۀ د خپلو بُتانو سره يې د يهوداه خلق د ګناه طرف ته بوتلى وُو.

¹²نو زۀ مالِک خُدائ د بنى اِسرائيلو خُدائ پاک په يروشلم او په يهوداه يو داسې آفت راولم چې هر څوک د دې نه خبر شى نو په هغوئ به وېښتۀ زيګ‌زيګ ودرېږى.

¹³زۀ به يروشلم له داسې سزا ورکړم لکه چې سامريه، د بنى اِسرائيلو بادشاه اخى‌اب او د هغۀ اولاد له مې ورکړې وه. زۀ به يروشلم د دې د خلقو نه داسې خالى کړم، لکه چې څوک لوښے صفا کړى او په بل مخ يې واړوى.

¹⁴چې کوم خلق پاتې وى نو زۀ به يې پرېږدم او خپلو دشمنانو ته به يې حواله کړم، چې فتح يې کړى او د هغوئ مُلک لوټ کړى.

¹⁵زۀ د خپلو خلقو سره داسې ځکه کوم چې هغوئ زما خِلاف ګناه کړې ده. او د هغه وخت نه چې د هغوئ پلار نيکۀ د مِصر نه راوتلى دى تر نن ورځې پورې يې زما غصه راپارولې ده.“

¹⁶منسى دومره ډېر بې ګناه خلق قتل کړل چې د يروشلم د يو سر نه تر بل سر پورې وينې بهېدلې، د دې نه علاوه هغۀ د يهوداه خلق د بُت پرستۍ طرف ته بوتلل او په هغوئ يې دې ته جوړ کړل چې مالِک خُدائ خِلاف ګناه وکړى.

¹⁷نور هر څۀ چې منسى کړى وُو، سره د هغه ګناهونو چې هغۀ کړى وُو، نو هغه د يهوداه د بادشاهانو په تاريخ کښې ليکلے شوى دى.

¹⁸منسى مړ شو او د محل په باغ يعنې د عُزا په باغ کښې ښخ شو، د هغۀ زوئ امون د هغۀ نه پس بادشاه جوړ شو.

¹⁹امون د دوويشتو کالو وو چې هغه د يهوداه بادشاه جوړ شو او دوه کاله يې په يروشلم بادشاهى وکړه. د هغۀ مور مسلمت وه چې د يُطبه د ښار د حروص لور وه.

²⁰د خپل پلار منسى په شان، هغۀ هم د مالِک خُدائ خِلاف ګناه وکړه،

²¹هغۀ د خپل پلار په نقش قدم باندې روان وو او چې د هغۀ پلار د کومو بُتانو خِدمت کړے وو نو هغۀ هم ورته سجدې لګولې.

²²هغۀ مالِک خُدائ، د خپل پلار نيکۀ خُدائ پاک رد کړو او د مالِک خُدائ د حُکمونو نافرمانى يې وکړه.

²³د امون آفسرانو د هغۀ خِلاف منصُوبه جوړه کړه او په محل کښې يې ووژلو.

²⁴د يهوداه خلقو د امون قاتِلان ووژل او د هغۀ زوئ يوسياه يې د هغۀ په ځائ بادشاه جوړ کړو.

²⁵امون چې نور هر څۀ کړى وُو هغه د يهوداه د بادشاهانو په تاريخ کښې ليکلے شوى دى.

²⁶امون د عُزا د باغ په اديره کښې ښخ شو او د هغۀ زوئ يوسياه د هغۀ نه پس بادشاه جوړ شو.