Read Pashto (Nangahari) — د پښتو مقدس کتاب بادشاهانو دويم 22 Bible Online

بادشاهانو دويم 22 - Pashto (Nangahari) — د پښتو مقدس کتاب bible

بادشاهانو دويم 22

¹يوسياه د اتو کالو وو چې هغه د يهوداه بادشاه شو او هغۀ په يروشلم باندې يو دېرش کاله بادشاهى وکړه. د هغۀ مور جديده وه، چې د بُصقت ښار د عداياه لور وه.

²يوسياه هغه کار کولو چې مالِک خُدائ ورباندې رضا کېدو، هغۀ د خپل پلار نيکۀ داؤد په مِثالونو عمل کولو او د دې نه يو خوا بل خوا نۀ اوړېدو.

³د خپلې بادشاهۍ په اتلسم کال، يوسياه بادشاه د دربار منشى سافن چې د اصلياه زوئ اؤ مسُلام نمسے وو، د دې حُکم سره د مالِک خُدائ کور ته ولېږلو،

⁴”مشر اِمام خلقياه له لاړ شه او د هغه پېسو معلومات وکړه چې د مالِک خُدائ کور د ننوتلو په دروازه کښې اِمامانو د خلقو نه راغونډې کړې دى.

⁵۵‏-۶ او هغۀ ته ووايه چې پېسې هغه سړو له ورکړى کوم چې د مالِک خُدائ د کور د مرمت مشران دى. هغوئ به ترکاڼانو، ټهېکدارانو او ګِلکارانو له مزدورى ورکوى او چې په مرمت کښې څۀ لرګى او کاڼى اِستعمالېږى نو هغه دې اخلى.

⁷خو چې هغوئ له کومې پېسې ورکړے شوې وى نو د هغې حِساب کِتاب ورسره مۀ کوئ، ځکه چې هغوئ د ايماندارۍ سره لېن دېن کوى.“

⁸سافن منشى خلقياه ته د بادشاه حُکم ورسولو او خلقياه هغۀ ته ووئيل چې هغۀ د مالِک خُدائ په کور کښې د تورات کِتاب موندلے دے. خلقياه کِتاب ورکړو او سافن ولوستلو.

⁹بيا هغه واپس بادشاه له لاړو او د دې نه يې خبر کړو، ”د مالِک خُدائ په کور کښې چې کومې پېسې جمع شوې وې هغه ستا خِدمت کوُونکو اخستې دى او هغه سړو له يې ورکړې دى چې د مرمت مشران دى.“

¹⁰او هغۀ ووئيل، ”زما سره دلته يو کِتاب دے چې خلقياه راکړے دے.“ او بادشاه ته يې دا ولوستلو.

¹¹کله چې بادشاه د شريعت د کِتاب خبرې واورېدې، نو هغۀ د خفګان نه خپلې جامې وشلولې،

¹²او خلقياه اِمام، د سافن زوئ اخى قام، د ميکياه زوئ عکبور، د دربار منشى سافن او د بادشاه نوکر عساياه له يې دا حُکم ورکړو،

¹³”لاړ شئ او د مالِک خُدائ سره، زما او د يهوداه د ټولو خلقو دپاره د دې کِتاب د تعليماتو خبره وکړئ. مالِک خُدائ مونږ ته سخت غصه دے ځکه چې دا کِتاب کومې خبرې کوى نو زمونږ پلار نيکۀ په دې باندې عمل نۀ دے کړے.“

¹⁴نو خلقياه، اخى قام، عکبور، سافن او عساياه لاړل چې د خُلده نومې ښځې سره مشوره وکړى، هغه يوه پېغمبره وه چې د يروشلم په نوې محله کښې اوسېدله. (د هغې خاوند سلوم، د تِقوه زوئ او د خرخس نمسے، د مالِک خُدائ د کور د چُوغو مشر وو.) نو هغوئ ورته خبره وکړه،

¹⁵او هغې هغوئ ته ووئيل چې واپس بادشاه له لاړ شئ

¹⁶او د مالِک خُدائ دا پېغام هغۀ له ورکړئ، ”زۀ به يروشلم او د دې ټولو خلقو له سزا ورکړم لکه څنګه چې په هغه کِتاب کښې ليکلے شوى دى چې بادشاه ولوستلو.

¹⁷هغوئ زۀ رد کړے يم او نورو خُدايانو ته يې نذرانې پېش کړې دى او چې هغوئ څۀ کړى دى د هغې په وجه يې زما غصه راپارولې ده. زما غصه د يروشلم خِلاف راپاڅېدلې ده او دا به نۀ سړېږى.

¹⁸او په خپله بادشاه ته، زۀ مالِک خُدائ د بنى اِسرائيلو خُدائ پاک داسې وايم: چې په کِتاب کښې څۀ ليکلى وُو تا هغې ته غوږ ونيولو،

¹⁹او کله چې تا واورېدل چې ما يروشلم او د دې خلقو له د سزا ورکولو خبره کړې ده، نو توبه دې وويستله او عاجزى دې ښکاره کړه، جامې دې وشلولې او ودې ژړل. دا به شاړ او وېجاړ کړم چې خلق به ورباندې لعنت وائى. خو ما ستا سوال اورېدلے دے،

²⁰خو چې زۀ کومه سزا يروشلم له ورکوم هغه به ستا په ژوند کښې نۀ راځى. تۀ به په خېر سره مړ شې.“ نو هغه سړى د دې پېغام سره يوسياه بادشاه له راواپس شول.