Read Pashto (Nangahari) — د پښتو مقدس کتاب بادشاهانو دويم 23 Bible Online

بادشاهانو دويم 23 - Pashto (Nangahari) — د پښتو مقدس کتاب bible

بادشاهانو دويم 23

¹بيا يوسياه بادشاه د يهوداه او يروشلم ټول مشران راوغوښتل،

²او هغوئ په يو ځائ د مالِک خُدائ کور ته لاړل، چې اِمامان، پېغمبران او باقى نور ټول خلق د واړو نه واخله تر غټو پورې ورسره وُو. د هغوئ ټولو په وړاندې، بادشاه د تړون هغه ټول کِتاب ولوستلو کوم چې د مالِک خُدائ په کور کښې موندلے شوے وو.

³هغه د شاهى ستنې سره ودرېدو او د مالِک خُدائ سره يې يو تړون وکړو چې د هغۀ تابعدارى به کوى او د زړۀ د اخلاصه به د هغۀ ټول قانون او حُکمونه منى او چې د هغه تړون په مطالبو به عمل کوى، څنګه چې په کِتاب کښې ليکلے شوى دى. او ټولو خلقو دا تړون ومنلو.

⁴بيا يوسياه مشر اِمام خلقياه له، د هغۀ لاندې اِمامانو او د مالِک خُدائ د کور د ننوتلو د دروازې څوکيدارانو له حُکم ورکړو چې د مالِک خُدائ د کور هغه ټول څيزُونه وباسى چې د بعل، د اشيرې بُت او د ستورو په عِبادت کښې اِستعمال شوى وى. بادشاه دا ټول څيزُونه د قِدرون د وادۍ په پټو کښې د ښار نه بهر وسوزول او د دې ايرې يې بيت‌اېل له يوړې.

⁵هغۀ بُت پرسته اِمامان لرې کړل چې د يهوداه بادشاهانو مقرر کړى وُو چې کومو د يهوداه په ښارونو کښې د غېرو قومونو په قربان‌ګاه او يروشلم ته نزدې ځايُونو کښې قربانۍ پېش کولې، هغه ټول اِمامان يې لرې کړل چا چې بعل، نمر، سپوږمۍ، سيارو او ستورو ته قربانۍ پېش کولې.

⁶هغۀ د مالِک خُدائ کور نه د اشيرې بُت نښه لرې کړله، د ښار نه بهر د قِدرون وادۍ ته يې يوړه، وې سوزوله او خاورې يې کړه او د دې ايره يې د عامو خلقو په قبرونو باندې وشيندله.

⁷هغۀ د مالِک خُدائ په کور کښې د اوسېدو هغه کوټې ورانې کړې چې د هغه کور نرانو کنجرانو نيولې وې، چرته چې ښځو د اشيرې بُت دپاره چُوغې جوړولې.

⁸د يهوداه په ښارونو کښې چې کوم اِمامان وُو هغه يې يروشلم ته راوستل او په ټول مُلک کښې يې د هغه قربان‌ګاه بې‌عزتى وکړه چرته چې هغوئ قربانۍ پېش کړې وې. هغۀ د ښار حُکمران يشوَع د دروازې په خولهٔ کښې زيارتُونه تباه کړل. دا دروازه ښار ته د ننوتو د دروازې په ګڅ طرف باندې وه.

⁹هغه اِمامانو ته دا اِجازت نۀ وو چې په يروشلم کښې يې د مالِک خُدائ د قربان‌ګاه خِدمت کړے وے، خو چې د هغوئ ملګرو اِمامانو ته کومه پتيره روټۍ مِلاو شوې وې نو هغه يې خوړلے شوه.

¹⁰او هغۀ د هنوم په وادۍ کښې د غېرو قومونو د عِبادت ځائ توفت هم ناپاکه کړو، نو چې هيڅ څوک خپل زوئ يا لور مولک بُت ته د سوزېدونکې نذرانې په توګه نۀ شى قربانى کولے.

¹¹د اسونو هغه مجسمې يې هم لرې کړې چې د يهوداه بادشاه نمر ته وقف کړې وې او چې په دې کښې کومې جنګى ګاډۍ اِستعمالېدلې هغه يې وسوزولې. (دا د مالِک خُدائ د کور په دربار کښې ايښے شوې وې، چې د دروازې او د مشر آفسر ناتن مُلک د اوسېدو د کوټې سره نزدې وې.)

¹²هغه ټولې قربان‌ګاه چې د يهوداه بادشاهانو د محل په چت باندې د احاز بادشاه د کوټې نه بره جوړې کړې وې نو يوسياه بادشاه هغه راوغورزولې، سره د هغه قربان‌ګاه چې منسى بادشاه د مالِک خُدائ کور په دوو دربارونو کښې ايښې وې، هغۀ قربان‌ګاه زرې زرې کړلې او د دې ټُکړې يې د قِدرون په وادۍ کښې واچولې.

¹³يوسياه هغه قربان‌ګاه ناپاکه کړې چې سليمان بادشاه د يروشلم نَمرخاتۀ طرف ته او د زيتُونو غرۀ جنوبى طرف ته د بې‌کاره بُتانو عِبادت دپاره جوړې کړې وې، يعنې د صيدان عستاراتې بُت، د موآب بُت کموس او د عمون بُت مولک.

¹⁴يوسياه بادشاه د کاڼو ستنې ټوټې کړې، د اشيرې بُت نښې يې راوغورزولې او چې دا چرته ولاړې وې نو هغه ځائ يې د بنيادمو په هډُوکو باندې پټ کړو.

¹⁵يوسياه په بېت اېل کښې د عِبادت هغه ځائ هم راوغورزولو چې د نباط زوئ يربعام بادشاه جوړ کړے وو، چا چې بنى اِسرائيليان د ګناه طرف ته بوتلى وُو. يوسياه قربان‌ګاه راوغورزوله، د دې کاڼى يې ټوټې ټوټې او خاورې کړل، هغۀ د اشيرې مجسمه هم وسوزوله.

¹⁶يوسياه مخ واړولو او هلته يې په غر باندې څۀ قبرونه وليدل، هډُوکى يې ترې نه رابهر کړل او په قربان‌ګاه باندې يې وسوزول. نو هغه قربان‌ګاه يې ناپاکه کړه، چې د دې هغه پېغمبر ډېر پخوا پېشګوئې کړې وه چې د اختر په وخت کښې يربعام بادشاه د قربان‌ګاه سره ولاړ وو. يوسياه بادشاه وکتل او د هغه پېغمبر قبر يې وليدو چې کوم دا پېشګوئې کړې وه.

¹⁷هغۀ تپوس وکړو، ”دا د چا قبر دے؟“ د بيت‌اېل خلقو ورته ووئيل، ”دا د هغه پېغمبر قبر دے کوم چې د يهوداه نه راغلے وو او د دې پېشګوئې يې کړې وه چې تا د قربان‌ګاه سره وکړل.“

¹⁸يوسياه حُکم وکړو، ”دا هم داسې پرېږدئ، د هغۀ هډُوکى دې څوک نۀ لرې کوى.“ نو د هغۀ هډُوکى لرې نۀ کړل او نۀ د هغه پېغمبر هډُوکى لرې کړے شول چې د سامريه نه راغلے وو.

¹⁹د بنى اِسرائيلو په هر يو ښار کښې يوسياه بادشاه د غېرو قومونو د عِبادت هغه ټول ځايُونه راوغورزول چې کوم د بنى اِسرائيلو بادشاهانو جوړ کړى وُو او د مالِک خُدائ غصه يې راپارولې وه. هغۀ په هغه ټولو قربان‌ګاه باندې هم هغه شان وکړل چې څنګه يې په بيت‌اېل کښې کړى وُو.

²⁰هغۀ د غېرو قومونو هغه ټول اِمامان په قربان‌ګاه باندې ووژل چرته چې هغوئ خِدمت کولو او هغۀ په هره قربان‌ګاه باندې د بنيادمو هډُوکى وسوزول او بيا هغه يروشلم ته راواپس شو.

²¹نو يوسياه بادشاه خلقو له حُکم ورکړو چې د مالِک خُدائ د هغوئ د خُدائ پاک په درناوى کښې د فسحې اختر وکړئ، لکه څنګه چې د تړون په کِتاب کښې ليکلے شوى دى.

²²د قاضيانو د حکومت د وخت نه پس، د دې په شان د فسحې اختر د بنى اِسرائيلو يا يهوداه يو بادشاه هم نۀ وو کړې.

²³او د يوسياه د بادشاهۍ په اتلسم کال په يروشلم کښې د فسحې اختر وکړے شو. د يوسياه نور بدلون راوستل

²⁴په هغه کِتاب کښې د ليکلى شوى قانون عملى کولو دپاره چې خلقياه اِمام د مالِک خُدائ په کور کښې موندلے وو، يوسياه بادشاه د يروشلم او د نور ټول يهوداه نه ټول جادوګر او قسمت ښودونکى او کورنى ټول بُتان او د غېرو قومونو د عِبادت نور ټول څيزُونه لرې کړل.

²⁵د هغۀ نه مخکښې هيڅ کله هم د هغۀ په شان بادشاه نۀ وو تېر شوې، چا چې د زړۀ د اخلاصه، د ټول عقل او طاقت سره د مالِک خُدائ خِدمت کړے وى او د موسىٰ ټول قانون يې منلے وى، او نۀ وروستو د هغۀ په شان بادشاه پېدا شوې وو.

²⁶خو منسى بادشاه چې څۀ کړى وُو نو د هغې په وجه د مالِک خُدائ سخته غصه رااُوچته شوې وه او لا سړه شوې نۀ وه.

²⁷مالِک خُدائ ووئيل، ”ما چې د بنى اِسرائيلو سره څۀ کړى دى نو هغه به په يهوداه هم وکړم: د يهوداه خلق به زۀ د خپل نظر نه لرې کړم او زۀ به يروشلم رد کړم، کوم ښار او کور چې ما خوښ کړے وو او چې ما وئيلى وُو چې هلته به زما عِبادت کېږى.“

²⁸يوسياه بادشاه چې نور څۀ هم کړى دى هغه د يهوداه د بادشاهانو په تاريخ کښې ليکلے شوى دى.

²⁹چې کله يوسياه بادشاه وو، نو د مِصر بادشاه نِکوه د فرات سيند له يو لښکر بوتلو چې د اسور بادشاه مدد وکړى. يوسياه بادشاه په مجدو کښې د مِصرى لښکر سره مخامخ شو او په جنګ کښې ووژلے شو.

³⁰د هغۀ آفسرانو د هغۀ لاش په يوه جنګى ګاډۍ کښې کېښودو او يروشلم ته يې يوړو او هلته په شاهى اديره کښې ښخ کړے شو. د يهوداه خلقو د يوسياه زوئ يوآخز خوښ کړو او هغه يې بادشاه مقرر کړو.

³¹يوآخز د درويشتو کالو وو چې هغه د يهوداه بادشاه شو او هغۀ په يروشلم باندې درې مياشتې حکومت وکړو. د هغۀ مور حموطل وه، چې د لِبناه د ښار د يرمياه لور وه.

³²هغه د خپل پلار نيکۀ په نقش قدم باندې روان وو او هغۀ د مالِک خُدائ خِلاف ګناه وکړه.

³³د هغۀ بادشاهى په هغه وخت ختمه شوه چې د مِصر بادشاه نِکوه د حمات مُلک رِبله ته هغه قېدى بوتلو، يهوداه هغۀ له درې زره څلور سوه کيلو سپين زر او څلور دېرش کيلو سرۀ زر محصُول ورکولو.

³⁴نِکوه بادشاه د يوسياه زوئ اِلياقيم د يوسياه نه پس د يهوداه بادشاه جوړ کړو او د هغۀ نوم يې يهوياقيم ته بدل کړو. نِکوه بادشاه يوآخز مِصر ته بوتلو او هلته مړ شو.

³⁵يهوياقيم بادشاه د خلقو د دولت په مطابق د هغوئ نه محصُول راغونډولو، چې هغه غوښتُونکې پېسې پوره کړى چې د مِصر بادشاه له په محصُول کښې ورکولے شوې.

³⁶يهوياقيم د پينځۀويشتو کالو وو چې هغه د يهوداه بادشاه جوړ شو او هغۀ په يروشلم باندې يولس کاله بادشاهى وکړه. د هغۀ مور زبوده وه چې د روماه ښار د فداياه لور وه.

³⁷هغۀ د خپل پلار نيکۀ په نقش قدم باندې روان وو، يهوياقيم د مالِک خُدائ خِلاف ګناه وکړه.