Read Pashto (Nangahari) — د پښتو مقدس کتاب بادشاهانو دويم 25 Bible Online

بادشاهانو دويم 25 - Pashto (Nangahari) — د پښتو مقدس کتاب bible

بادشاهانو دويم 25

¹نو د صدقياه د بادشاهۍ په نهم کال، د لسمې مياشتې په لسمه ورځ، د بابل بادشاه نبوکدنضر د خپل ټول لښکر سره د يروشلم خِلاف روان شو. هغۀ د ښار نه بهر خېمې ولګولې او د ښار نه ګېرچاپېره يې د محاصرې دېوالونه تاو کړل.

²او د صدقياه د بادشاهۍ تر يولسم کال پورې يې دا محاصره کړے وو.

³هم د هغه کال د څلورمې مياشتې په نهمه ورځ، کله چې قحط دومره سخت وو چې د خلقو سره د خوراک هيڅ هم پاتې نۀ وُو،

⁴نو په يو ځائ کښې د ښار دېوال وغورزولے شو او ټول فوجيان وتښتېدل. اګر چې ښار بابليانو محاصره کړے وو خو هغوئ د شپې د دوو دېوالونو په مينځ کښې په دروازه باندې ووتل، چې دا د شاهى باغ نه شاته وه او هغوئ د اُردن وادۍ طرف ته روان شول.

⁵خو د بابليانو لښکر په صدقياه بادشاه پسې وو، يريحو ته نزدې په مېدانونو کښې يې ونيولو او خپل ټول فوجيان ترې نه لاړل او هغه يې يواځې پرېښودو.

⁶صدقياه نبوکدنضر بادشاه له بوتلے شو، چې هغه د رِبله په ښار کښې وو او هلته نبوکدنضر په هغۀ باندې سزا وخېژوله.

⁷نو د صدقياه په مخکښې د هغۀ دوه زامن ووژلے شول، نبوکدنضر د صدقياه نه سترګې وويستلې، هغه يې د زېړو په هتکړو کښې وتړلو او بابل ته يې بوتلو.

⁸د بابل بادشاه نبوکدنضر د بادشاهۍ د نولسم کال د پينځمې مياشتې په اوومه ورځ، د بادشاه مشير او د هغۀ د لښکر مشر نبوزردان يروشلم ته وردننه شو.

⁹هغۀ د مالِک خُدائ کور، شاهى محل او د يروشلم ټول کورونه وسوزول، هغۀ د ښار هر يو لوئ عمارت وسوزولو.

¹⁰او د هغۀ فوجيانو د ښار دېوالونه راوغورزول.

¹¹د شاهى محافظانو مشر نبوزردان، هغه خلق وويستل کوم چې په ښار کښې پاتې وُو، په دې کښې ماهِر کاريګران او هغه خلق شامِل وُو چا چې د بابل بادشاه خِلاف يې بغاوت کړے وو.

¹²خو هغۀ په يهوداه کښې سخت مسکينان خلق پرېښودل، چې د انګور په باغونو او پټو کښې کَرل رېبل کوى.

¹³بابليانو د زېړو ستنې او هغه ګاډۍ ټوټې ټوټې کړې چې کومې د مالِک خُدائ په کور کښې وې، سره د زېړو هغه لويه ډيګۍ او ټول زېړ يې بابل ته يوړل.

¹⁴هغوئ بېلچې او د قربان‌ګاه د پاکولو د ايرو لوښى هم يوړل، د ډيوو د خيال ساتلو سامان، د قربانۍ د وينې جامونه، د خوشبويۍ سوزولو لوښى او د زېړو نور ټول سامان چې د مالِک خُدائ د کور په کار کښې اِستعمالېدو.

¹⁵هغوئ هغه هر څۀ يوړل چې د سرو زرو يا سپينو زرو نه جوړ وُو، سره د هغه وړو جامونو او لوښو چې د بلو سکارو وړلو دپاره اِستعمالېدل.

¹⁶سليمان بادشاه د مالِک خُدائ د کور دپاره جوړ کړے د زېړو سامان، دوه ستنې، ګاډۍ او لويه ډيګۍ يوړه، دا دومره وزن وو چې تللے نۀ شو.

¹⁷دواړه ستنې يو شان وې: هره يوه تقريباً نهۀ ګزه اُوچته وه چې د بره د زېړو سر يې تقريباً دوه ګزه اُوچت وو. د هر يو سر نه ګېرچاپېره يې د زېړو جال وو چې د زېړو نه جوړ شوو انارو باندې ښائسته کړے شوى وُو.

¹⁸د دې نه علاوه، فوجى آفسر، مشر اِمام سراياه، ورپسې اِمام صفنياه او د مالِک خُدائ د کور نور درې اهم آفسران قېديان بوتلل.

¹⁹د ښار نه يې هغه آفسر بوتلو چې د فوجيانو مشر وو، پينځۀ د بادشاه ذاتى مشيران چې لا په ښار کښې وُو، د فوجى مشر مدد کوُونکے، چې هغه د فوجى حِساب کِتاب مشر وو او شپېتۀ نور اهم سړى يې بوتلل.

²⁰نبوزردان هغوئ د بابل بادشاه له بوتلل، چې هغه د رِبله په ښار کښې وو

²¹چې دا د حمات په علاقه کښې دے. هلته بادشاه هغوئ ووهل او مړۀ شول. نو داسې د يهوداه خلق پردى مُلک ته بوتلے شول.

²²د بابل نبوکدنضر د سافن نمسے او د اخى قام زوئ جدليا، د يهوداه حُکمران جوړ کړو. او هغه يې په هغه ټولو باندې مشر مقرر کړو کوم چې بابل ته نۀ وُو بوتلے شوى.

²³کله چې د يهوداه آفسران فوجيان د دې نه خبر شول کوم چې تسليم شوى نۀ وُو، نو هغوئ په مصفاه کښې د جدلياه سره مِلاو شول. هغه آفسران دا وُو: د نتنياه زوئ اِسمٰعيل، د قريح زوئ يوحانان، د تنحومت زوئ سراياه چې د نطوفاه د ښار وو او د معکه يازنياه.

²⁴جدلياه هغوئ ته ووئيل، ”زۀ تاسو ته دا خبره کوم چې د بابل د آفسرانو نه مۀ يرېږئ. په دې مُلک کښې اوسېږئ، د بابل د بادشاه خِدمت کوئ، نو ستاسو هر کار به سم وى.“

²⁵خو د هغه کال په اوومه مياشت، د شاهى کورنۍ اليسمع نمسے او د نتنياه زوئ اِسمٰعيل د لسو کسانو سره مصفاه ته لاړو، په جدلياه يې حمله وکړه او وې وژلو. د هغۀ سره چې کوم بنى اِسرائيليان او بابليان وُو هغه يې هم ووژل.

²⁶بيا ټول بنى اِسرائيليان، مالداره او غريبانان، سره د فوج آفسرانو روان شول او مِصر ته لاړل، ځکه چې هغوئ د بابليانو نه يرېدل.

²⁷په کوم کال چې اويل مرودک د بابل بادشاه شو، نو هغۀ د يهوداه بادشاه په يهوياکين باندې رحم وکړو او هغه يې د قېدخانې نه آزاد کړو. دا د يهوياکين د قيدى بوتلې کېدو په اووۀ دېرشم کال د دولسمې مياشتې په اووۀ‌ ويشتمه ورځ باندې وشول.

²⁸اويل مرودک د هغۀ سره ښۀ سلوک وکړو او د هغه نورو بادشاهانو نه يې هم د لوئ عزت ځائ ورکړو کوم چې د هغۀ سره په بابل کښې جلاوطن وُو.

²⁹نو يهوياکين د قېدخانې جامې بدلې کړې او باقى ټول عُمر يې د بادشاه په دسترخوان روټۍ خوړله.

³⁰چې تر څو هغه ژوندے وو، نو هره ورځ هغۀ ته باقاعده خرچه مِلاوېدله.