Read Pashto (Nangahari) — د پښتو مقدس کتاب تاريخ اول 15 Bible Online

تاريخ اول 15 - Pashto (Nangahari) — د پښتو مقدس کتاب bible

تاريخ اول 15

¹داؤد د ځان دپاره د داؤد په ښار کښې کورونه جوړ کړل. هغۀ د خُدائ پاک د لوظ صندوق دپاره هم يو ځائ تيار کړو او د دې دپاره يې يوه خېمه ودروله.

²بيا هغۀ ووئيل، ”صِرف ليويان به د لوظ صندوق وړى، ځکه چې هغوئ هغه څوک دى چې مالِک خُدائ د دې د اوړلو دپاره خوښ کړى دى او چې د همېشه دپاره د هغۀ خِدمت کوى.“

³نو داؤد ټول بنى اِسرائيليان د دې دپاره راغونډ کړل چې د لوظ صندوق هغه ځائ ته راوړى چې کوم يې ورله تيار کړے وو.

⁴نو بيا هغۀ د هارون او ليويانو اولاد راوغوښتلو.

⁵د قُهات د ډلې اورى اېل خوښ کړے شو، چې د خپلې ډلې د يو سل او شلو کسانو مشر وو،

⁶او د مرارى ډلې نه عساياه، چې د خپلې ډلې د دوو سوو او شلو کسانو مشر وو،

⁷د جيرسون ډلې نه يوئيل، چې د خپلې ډلې د يو سل او دېرشو کسانو مشر وو،

⁸د اليصفن ډلې نه سمعياه، چې د دوو سوو کسانو مشر وو،

⁹د حبرون ډلې نه اِلى ايل، چې د اتياو کسانو مشر وو،

¹⁰د عُزئيل ډلې نه عميناداب، چې د خپلې ډلې د يو سل او دولسو کسانو مشر وو.

¹¹داؤد صدوق او ابياتار اِمامان او دا شپږ ليويان يې راوغوښتل: اورى اېل، عساياه، يوئيل، سمعياه، اِلى ايل او عميناداب.

¹²هغۀ ورته ووئيل، ”تاسو د ليويانو ډلې مشران يئ. خپل ځانونه او خپل ليويان پاک کړئ، نو چې تاسو د مالِک خُدائ د بنى اِسرائيلو د خُدائ پاک د لوظ صندوق هغه ځائ ته راوړئ چې ما ورله تيار کړے دے.

¹³په وړومبى ځل تاسو دا رانۀ وړو، نو ځکه مالِک خُدائ زمونږ خُدائ پاک مونږ له سزا راکړې ده چې مونږ د هغۀ نه دا تپوس نۀ دے کړے چې څنګه يې يوسو.“

¹⁴بيا اِمامانو او ليويانو د دې دپاره خپل ځانونه پاک کړل چې د مالِک خُدائ د بنى اِسرائيلو د خُدائ پاک د لوظ صندوق يروشلم ته يوسى.

¹⁵ليويانو دا د بازوګانو په ذريعه په خپلو اولو باندې يوړو، لکه څنګه چې موسىٰ د مالِک خُدائ د حُکم په مطابق حُکم کړے وو.

¹⁶داؤد د ليويانو مشرانو له حُکم ورکړو چې څۀ ليويانو ته سندرې وئيل او په بينجو، رباب او چمټو باندې خوندوره موسيقى غږول حواله کړى.

¹⁷۱۷‏-۲۱ د سندرغاړو د ډلو نه هغوئ دا سړى خوښ کړل چې د زېړو چمټې وغږوى: د يوئيل زوئ هيمان، د هغۀ خپلوان، د برکياه زوئ آسف او د مرارى ډلې د قوسياه زوئ ايتان. د هغوئ د مدد او غږولو دپاره يې دا ليويان خوښ کړل چې د درانۀ آواز والا بينجو وغږوى: زکرياه، يحزى ايل، سميراموت، يحى ايل، عُنى، اِلياب، معسياه او بناياه. د سپک آواز والا بينجو غږولو دپاره هغوئ دا ليويان خوښ کړل: متتياه، الفلهُو، مِقنياه، عززياه او د عِبادتخانې څوکيداران، عوبيد ادوم او يعى ايل.

²²په موسيقۍ کښې د مهارت په وجه کنانياه د دې دپاره خوښ کړے شوے وو چې د ليوى موسيقارانو مشر شى.

²³۲۳‏-۲۴ برکياه او القنه سره د عوبيد ادوم او يحياه، د لوظ صندوق څوکيداران خوښ کړے شوى وُو. دا اِمامان د تلو په وخت د لوظ صندوق په مخکښې د بيګلو غږولو دپاره خوښ کړے شوى وُو: شبنياه، يوسفط، نتانى ايل، عماسى، زکرياه، بناياه او اِلعازار.

²⁵نو داؤد بادشاه، د بنى اِسرائيلو مشران او فوجى مشران د عوبيد ادوم کور ته لاړل چې د مالِک خُدائ دلوظ صندوق راوچت کړى. او هغوئ يو لوئ جشن جوړ کړے وو.

²⁶هغوئ اووۀ غوَيى او اووۀ ګډان حلال کړل، چې دا خبره يقينى شى چې خُدائ پاک به د هغه ليويانو سره مدد کوى چا چې د لوظ صندوق اوړلو.

²⁷داؤد د مهينې لټې نه جوړه شوې چُوغه اغوستې وه او موسيقارانو، د هغوئ مشر کنانياه او هغه ليويانو هم د مهينې لټې چُوغې اغوستې وې چا چې صندوق اوړلو. داؤد د لټې پېش بند هم اغوستے وو.

²⁸نو داسې ټول بنى اِسرائيليان د لوظ صندوق سره يروشلم ته روان وُو. او د خوشحالۍ نه يې چغې وهلې، د بيګلو، ښکرو، چمټو او بينجو د موسيقۍ آوازونه وُو.

²⁹کله چې د لوظ صندوق ښار ته راوړلے شو، نو په دې وخت کښې د ساول لور او د داؤد ښځې ميکل د کړکئ نه بهر وکتل او وې ليدل چې داؤد بادشاه د خوشحالۍ نه ټوپونه وهل، نو هغې ورته په زړۀ کښې سپک وکتل.