Read Pashto (Nangahari) — د پښتو مقدس کتاب تاريخ اول 17 Bible Online

تاريخ اول 17 - Pashto (Nangahari) — د پښتو مقدس کتاب bible

تاريخ اول 17

¹نو کله چې داؤد بادشاه په خپل محل کښې اوسېدو، يوه ورځ هغۀ ناتن پېغمبر راوغوښتو او ورته يې ووئيل، ”زۀ دلته په يو داسې ښائسته کور کښې اوسېږم چې د دِيار د لرګى نه جوړ دے، خو د مالِک خُدائ د لوظ صندوق په خېمه کښې پروت دے!“

²ناتن ورته ووئيل، ”ستا په زړۀ کښې چې څۀ وى نو هم هغه شان وکړه، ځکه چې خُدائ پاک ستا مل دے.“

³خو په هغه شپه خُدائ پاک ناتن ته ووئيل،

⁴”لاړ شه او زما خِدمت کوُونکى داؤد ته ووايه چې مالِک خُدائ داسې وائى چې تۀ هغه څوک نۀ يې چې زما د اوسېدو دپاره يو کور جوړ کړې.

⁵د هغه وخت نه واخله چې ما بنى اِسرائيليان د مِصر نه راويستلى دى تر اوسه پورې، زۀ هيڅ کله په يو کور کښې نۀ يم اوسېدلے، زۀ همېشه په يوه خېمه کښې اوسېدلے يم چې د يو ځائ نه به بل ځائ ته تلم.

⁶ما چې د بنى اِسرائيلو سره څومره سفر هم کړے دے او چې ما څوک د خپلو خلقو د راهنمايۍ دپاره مقرر کړى دى ما د هغوئ يو کس ته هم نۀ دى وئيلى چې هغوئ زما دپاره د دِيار نه يو کور ولې نۀ دے جوړ کړے.

⁷نو زما خِدمت کوُونکى داؤد ته ووايه چې زۀ رب‌الافواج هغۀ ته وايم چې ما تۀ په پټو کښې د ګډو د شپونتوب نه اُوچت کړې او د خپلو خلقو بنى اِسرائيلو بادشاه مې جوړ کړې.

⁸تۀ چې چرته هم تلے يې نو زۀ ستا مل وم او چې تۀ مخ په وړاندې تلې نو ما ستا ټولو دشمنانو له شکست ورکړے دے. زۀ به تا د دنيا د لويو مشرانو په شان مشهُور کړم.

⁹۹‏-۱۰ ما د خپلو خلقو بنى اِسرائيلو دپاره يو ځائ خوښ کړے دے او هلته مې آباد کړى دى، چې هلته به هغوئ بغېر د څۀ تکليف نه ژوند تېروى. د کوم وخت نه چې هغوئ دې مُلک ته ننوتلى دى او ما ورباندې قاضيان مقرر کړى وُو تر نن پورې په هغوئ باندې ظالِمان خلق زياتے کوى، خو داسې به بيا نۀ کېږى. زۀ دا وعده کوم چې زۀ به ستا ټولو دشمنانو له شکست ورکړم او ډېر اولاد به درکړم.

¹¹کله چې تۀ مړ شې او د خپل پلار نيکۀ سره ښخ شې، نو زۀ به ستا يو زوئ بادشاه جوړ کړم او د هغۀ بادشاهى به مضبوطه کړم.

¹²هغه به هغه څوک وى چې زما دپاره يو کور جوړ کړى او زۀ به دا خبره يقينى کړم چې د هغۀ بادشاهى به د همېشه دپاره قائمه وى.

¹³زۀ به د هغۀ پلار يم او هغه به زما زوئ وى. زۀ به د هغۀ نه خپله نۀ ختمېدونکې مينه نۀ لرې کوم لکه څنګه چې ما د ساول نه لرې کړه، چې هغه ما د دې دپاره لرې کړو چې تۀ بادشاه شې.

¹⁴زۀ به هغه زما د کور او زما د بادشاهۍ د همېشه دپاره مشر جوړ کړم. د هغۀ بادشاهى به هيڅ کله نۀ ختمېږى.“

¹⁵ناتن داؤد ته هغه هر څۀ ووئيل چې مالِک خُدائ ورته په رويا کښې ښودلې وو او کلام يې هم ورسره کړے وو.

¹⁶بيا داؤد بادشاه د مالِک خُدائ د حضُور خېمې ته وردننه شو، کښېناستو او دعا يې وکړه، ”مالِکه خُدايه، خُدايه پاکه! زۀ څوک يم او زما کورنۍ به څۀ وى چې تا مونږ د دې پورې راورسولو.

¹⁷خو تۀ نور هم ډېر څۀ کوې، تا په راتلونکى وخت کښې زما د اولاد په باره کښې وعدې کړى دى او مالِکه خُدايه، خُدايه پاکه! تۀ زما سره د يو اُوچت مقام لرونکى کس په شان سلوک کوې.

¹⁸زۀ نور تا ته څۀ ووايم! تۀ ما ښۀ پېژنې او بيا هم د خپل خِدمت کوُونکى يعنې زما درناوے کوې.

¹⁹اے مالِکه خُدايه، د خپل خِدمت کوُونکى د خاطره، او د خپلې مرضۍ په مطابق تا دا ټول لوئ لوئ کارونه کړى او ښودلى دى.

²⁰مالِکه خُدايه! ستا په شان هيڅ څوک هم نشته، مونږ هيڅ کله دا نۀ دى اورېدلى چې ستا په شان بل خُدائ پاک شته!

²¹د زمکې په مخ د بنى اِسرائيلو په شان بل قوم نشته، کوم چې تا په بيعه د غلامۍ نه آزاد کړل چې ستا خپل خلق شى. تا چې کوم لوئ او عجيبه کارونه کړى دى د هغې په وجه ستا نوم مشهُور شو. تا خپل خلق د مِصر نه آزاد کړل او چې کله هغوئ مخ په وړاندې تلل نو تا هغه نور قومونه وشړل.

²²تا بنى اِسرائيليان د همېشه دپاره خپل خلق جوړ کړى دى او مالِکه خُدايه او اوس تۀ د هغوئ خُدائ پاک جوړ شوے يې.

²³نو اوس، اے مالِکه خُدايه! تا چې زما او زما د اولاد په باره کښې کومې وعدې کړې دى هغه د همېشه دپاره پوره کړه او هغۀ څۀ وکړه چې تا د څۀ په باره کښې وئيلى دى.

²⁴ستا شهرت به لوئ وى او خلق به د همېشه دپاره وائى چې رب‌الافواج د بنى اِسرائيلو خُدائ پاک دے او تۀ به همېشه زما د اولاد د بادشاهۍ حِفاظت کوې.

²⁵زما خُدايه پاکه! زۀ دا جرأت کوم چې زۀ ستا نه دا سوال وکړم، ځکه چې دا هر څۀ تا خپل خِدمت کوُونکى يعنې ما ته څرګند کړى دى او تا ما ته وئيلى دى چې تۀ به زما اولاد نه بادشاهان جوړوې.

²⁶مالِکه خُدايه، تۀ خُدائ پاک يې او تا د خپل خِدمت کوُونکى سره د دې ښو څيزُونو وعده کړې ده.

²⁷نو زۀ تا ته سوال کوم چې زما اولاد له برکت ورکړه. مالِکه خُدايه! هغوئ به د همېشه دپاره ستا په برکت کښې پاتې شى او ستا برکت دې د همېشه دپاره د هغوئ سره وى.“