Read Pashto (Nangahari) — د پښتو مقدس کتاب تاريخ اول 19 Bible Online

تاريخ اول 19 - Pashto (Nangahari) — د پښتو مقدس کتاب bible

تاريخ اول 19

¹څۀ موده وروستو عمونے بادشاه ناحس مړ شو او د هغۀ زوئ حنون بادشاه جوړ شو.

²داؤد بادشاه ووئيل، ”زۀ به حنون ته خپله وفادارى هم هغه شان ښايم لکه څنګه چې د هغۀ پلار ناحس ما ته وفادارى ښودلې وه.“ نو داؤد پېغام وړُونکى ورولېږل چې هغۀ ته د خپلې غم رازۍ اظهار وکړى. کله چې هغوئ عمون ته ورسېدل او حنون بادشاه هغوئ راوغوښتل،

³نو د عمونيانو مشرانو بادشاه ته ووئيل، ”ستا خيال دا دے چې داؤد د غم رازۍ دپاره کوم سړى رالېږلى دى نو په دې وجه ستا د پلار عزت کېږى څۀ؟ په حقيقت کښې داسې نۀ ده! هغۀ دا د جاسوسۍ دپاره رالېږلى دى چې مُلک ولټوى، او فتح يې کړى!“

⁴نو حنون د داؤد پېغام وړُونکى ونيول او د هغوئ نه يې ګېرې کلې کړې، د هغوئ چُوغې يې د کوناټو سره پرې کړې او هغوئ يې ولېږل.

⁵نو هغوئ دومره سخت شرمېدل چې خپلو کورونو ته نۀ شول واپس کېدلې. کله چې داؤد خبر شو چې څۀ شوى وُو، نو هغۀ هغوئ له خبر ورولېږلو چې په يريحو کښې ايسار شئ او تر هغې پورې واپس مۀ راځئ چې تر څو پورې مو ګيرې بيا نۀ وى راشوې.

⁶حنون بادشاه او عمونيانو ته پته ولګېده چې هغوئ داؤد بادشاه غصه کړے دے، نو هغوئ څلور دېرش زره کيلو سپين زر ورکړل چې د برنى ميسوپوتاميه او د شامى علاقو معکه او ضوباه نه جنګى ګاډۍ او د ګاډو چلوُونکى په مزدورۍ ونيسى.

⁷هغوئ دوه دېرش زره جنګى ګاډۍ په کرايه ونيولې او د معکه بادشاه لښکر راغلو او د ميدباه سره نزدې يې خيمې ولګولې. عمونيان هم د خپلو ټولو ښارونو نه راووتل او د جنګ دپاره تيار شول.

⁸کله چې داؤد د حالاتو نه خبر شو، نو هغۀ يوآب او ټول لښکر ورولېږلو.

⁹عمونيان روان شول او د شاهى ښار ربه دروازې سره يې د جنګ دپاره صفونه جوړ کړل او هغه بادشاهان چې کوم د مدد پاره راغلى وُو نو هغوئ هم په کولاو مېدان کښې صفونه جوړ کړل.

¹⁰يوآب ته پته ولګېده چې د دشمن لښکر به په هغۀ باندې د مخې او شا د طرف نه حمله وکړى، نو هغۀ ښۀ تکړه بنى اِسرائيلى فوجيان خوښ کړل او هغوئ يې د جنګ دپاره شاميانو ته مخامخ ودرول.

¹¹هغۀ باقى پاتې فوجيان د خپل ورور ابيشى د مشرۍ لاندې راوستل، چې هغۀ دوئ د جنګ دپاره عمونيانو ته مخامخ ودرول.

¹²يوآب هغۀ ته ووئيل، ”که تا ته پته ولګى چې شاميان ما له شکست راکوى، نو راشه او زما مدد وکړه او که عمونيان تا له شکست درکوى، نو زۀ به درشم او ستا مدد به وکړم.

¹³تکړه شه او حوصله مضبوطه کړه! راځئ چې د خپلو خلقو او زمونږ د خُدائ پاک د ښارونو دپاره سخت جنګ وکړُو. او د خُدائ پاک مرضى دې پوره شى.“

¹⁴يوآب او د هغۀ سړى د حملې کولو دپاره وړاندې شول او شاميان وتښتېدل.

¹⁵کله چې عمونيانو وليدل چې شاميان منډې وهى، نو هغوئ د ابيشى نه وتښتېدل او ښار ته واپس ننوتل. بيا يوآب يروشلم ته واپس لاړو.

¹⁶شاميانو ته پته ولګېده چې هغوئ د بنى اِسرائيلو نه شکست خوړلے دے، نو هغوئ د فرات سيند نَمرخاتۀ طرف ته د شام علاقو نه فوجيان راوستل او هغوئ يې د سوفک د مشرۍ لاندې کړل، چې د ضوباه د هدد‌عزر بادشاه د لښکر مشر وو.

¹⁷کله چې داؤد د دې نه خبر شو، نو هغۀ د بنى اِسرائيلو فوجيان راغونډ کړل، د اُردن سيند نه پورې وتل او شاميانو ته يې مخامخ د جنګ دپاره ودرول. او جنګ شروع شو،

¹⁸او بنى اِسرائيلو د شاميانو فوج واپس وشړلو. داؤد او د هغۀ سړو اووۀ زره د شام د جنګى ګاډو چلاوُونکى او څلوېښت زره پېدل فوجيان ووژل. هغوئ د شاميانو د فوج مشر، سوفک هم ووژلو.

¹⁹کله چې هغه بادشاهانو ته پته لګېده کوم چې د هدد‌عزر د بادشاهۍ لاندې وُو چې هغوئ د بنى اِسرائيلو نه شکست خوړلے دے، نو هغوئ د داؤد سره د آمن تړون وکړو او د هغۀ د بادشاهۍ لاندې راغلل. شاميانو بيا هيڅ کله دا ونۀ غوښتل چې د عمونيانو مدد وکړى.